ئەنجوومەنا ئاساییشا ناڤدەولەتی یا نەتەوەیێن یەکبوویی جڤینەکا بلەز پێک ئانی

پشتی کو تالیبانێ تەڤاھیا ئەفغانستانێ کۆنترۆل کری، ئەنجوومەنا ئاساییشا ناڤدەولەتی یا نەتەوەیێن یەکبوویی جڤینەکا بلەز پێک ئانی و بانگ ل تەڤگەرا کر.

سەکرەتەرێ گشتی یێ نەتەوەیێن یەکبوویی ئانتۆنۆ گوتەرێس د ئاخافتنا خوەیا ل ئەنجوومەنا ئاساییشا ناڤدەولەتی راگھاند؛ ھەموو جیھان ئالۆزی و ترسا ل ئەفغانستانێ تەماشە دکەت و ژ بۆ ھەموو ئالیان و د سەری دا ژی ژ بۆ تالیبانێ بانگا ئارامیێ کر.

گوتەرێس گۆت: “نھا دەما یەکبوونێ یە. دڤێت جڤاکا ناڤدەولەتی ژ بۆ کو ل ئەفغانستانێ مافێن مرۆڤان بهێنە پاراستن، بهێنە جەم ھەڤ و یەکدەنگ ببن.”

گوتەرێس دیار کر: “ئەز بانگ ل ئەنجوومەنا ئاساییشا ناڤدەولەتی و جڤاکا ناڤدەولەتی دکەم کو ژ بۆ دژاتیا گەفا تەرۆرێ یا جیھانی یا ل ئەفغانستانێ و ژ بۆ پاراستنا مافێن مرۆڤان یێن بنگەھین، ھەموو ئالاڤێن د دەستێ خوە دا ب کار بینین و ببین یەک و ب ھەڤ را تەڤبگەرین.”