هەیا نها ئاگرێ لجێ نەهاتیە کۆنترۆڵ کرن

ناڤچەیا لجێ یێ سەر ب پارێزگەھا ئامەدێ یا باکورێ کوردستانێ ژ دۆھی ڤە ئاگر ب دارستانەکێ کەتیە و ھەولێن کۆنترۆل کرنا ئاگری ھەتا نھا بەردەوامن.

دارستانەکا باژارۆکێ لجێ یێ سەر ب پارێزگەھا ئامەدێ یا باکورێ کوردستانێ ژ دۆھی سێشەمبێ وەرە ئاگر پێڤەیە و لگەل ھەولدانێن بەرەڤانیا شارستانی شەوتینا وێ دارستانێ ھەتا نھا بەردەوامە.

ئاگر دەستپێکێ ل ناڤچەیا کەرواسێ دەستپێ کر و بەر ب ناڤ دلێ دارستانێ ڤە بەرفرەھ بوو.

ئیرۆ ئاگر بەر ب ناڤچەیا لجۆکێ دچیت کو ل وێ دەرێ ھەژمارەک خانیێن نشتەجیبوونێ ھەنە و خەلک د وان دا دژین.

ل گۆر شارەزایێن بەرەڤانیا شارستانی یا ئامەدێ، ئاگر ژ بەر بایێ زێدە بلەز بەلاڤ دبیت و رێیا خوە دگوھریت کو ئەڤ یەک ژ سدەمانە تیمێن ئاگرڤەمراندنێ نکارن ب ئاسانی ئاگری کۆنترۆل بکن.

ھەتا نھا نایێ زانین ئاگر ژ بەر چ درەست بوویە و تیمێن پۆلیسان ل لجێ دەست ب لێکۆلینان کرنە