نەوزاد محەمەد
ئەوەی باوە لەسەر ئاستی وڵاتان، کاتێک ئامادەکاری بۆ ئەنجامدانی پڕۆژەیەک دەکرێت، یان پلانێکی ستراتیجی درێژ خایەن، کە پەیوەندی بە ژێرخانی ئابوری وڵات و گەشەکردنەوە هەبێت، لە ئامادەکاری و پلان دانان دا ئاستی هەژاری، یان بە زۆری ئاستی مامناوەندی هاووڵاتی لەبەر چاو دەگیرێت و دەکرێتە پێوەر بۆ دارشتنی بەرنامەی کار، ئەوەش لە پێناوی ئەوەی رێژەیەکی زۆری هاووڵاتیان سوود مەند بن و ئاستی داهاتی تاک بەرز ببێتەوە و بە تایبەت چارەسەر کردنی کێشەی هەژاری، کە ئەمەش کاریگەری ئەرینی دەکاتە سەر گەشەی ئابوری و کۆمەڵایەتی وڵات.
ئیتر حکومەتەکان بە پێی داتا و سەرژمێری و هەرچی پێزانینی پێویست لەبەر دەستیان بێت، پلان و بەرنامەی خۆیان دادەرێژن.
بە ڕاشکاوی دەیڵێم، ئەوەی بیستومانە، لە هەرێمی کوردستان، وەکو کۆمەڵگایەتی تازە پێگەیشتوو، لە زۆربەی دیاردەکاندا ڕێک پێچەوانەکە کراوە، لە جیاتی ئاستی هەژاری، ئاستی سەروی مامناوەندی، واتا دەوڵەمەندان و ئاستی ژیانیان کراوەتە پێوەر و پلان و پرۆژەکان بە پێی ئاستی داهاتی ئەوان رێک خراون.
بۆیە لە %٨٠ ی پرۆژەکان، هەژاران سوودمەند نەبونە، واتا هەوڵی باشتر کردن و بەرز کردنی ئاستی داهاتی تاک و گەشە سەندن لەبەر چاو نەگیراوە، بەڵکو ئەوەی کراوە زیاتر خۆشگوزەرانی دەولەمەندەکانە، کە پلانی ئابوری پێویستی بەوە نیە، ئەمەش هەڵەیەکی ستراتیجی ئابوری یە و کاریگەریە نەرینیە درێژ خایەنەکانی دەبنە هۆکاری بێ بەش بوونی هەژاران، بەڵکو بەرز بوونی ئاستی هەژاری و هەڵاوسانی ئابوری.
لەبەر ئەم هۆکارە، کۆمەڵگای کوردەواری لە هەرێمی کوردستان بوونەتە دوو بەش، یان دەوڵەمەند، یان هەژار، لێکترازانی کۆمەڵایەتی و دور کەوتنەوە لە یەکتری و دروست بوونی دوو چینی کۆمەڵایەتی و لێک تێنەگەیشتوو.
ئەمەش هۆکارێکە بۆ زیاد بوونی کێشەکان، لە تێکدانی دۆخی دەرونی و پەیدا بوونی هەستیاری و لێک دور کەوتنەوە لە نێوان ئەم دوو چینەدا، کە دیاردەیەکی نا تەندروستە لە ناو کۆمەڵگاکان دا.
لە کۆمەڵگا تازە پێگەیشتووەکان، زیاتر پێویست بە ئاشتەوایی کۆمەڵایەتی و بوژانەوەی ئابوری هەیە، بە مەبەستی تێپەراندتی کۆمەڵێک کێشە و گەیشتن بە گەشە کردن و بوژانەوە، کە رێگا خۆشکەرێکە بۆ یەکریزی و پێکانی ئامانجە نەتەوەییەکان.
باشە، هۆکارەکان چین، کێن ئەوانەی شیکرنەوەی هەڵە دەکەن و پلانەکان بە لاری دا دەبەن و داهات و تواناکانی حکومەت بە هەدەر دەدەن، دور لە بەرژەوەندی گشتی و چینی زۆرینە !؟.
هیوادارم لەم کورتە باسە، توانیبێتم پەیامەکەم بگەییێنم.