دیدار/ دلۆڤان ئاکرەیی
ل هەیڤا ئەیلولا بهێت دێ پەرلەمانێ کوردستانێ دەست ب کارێن خۆ یێن ئاسایی و قانوونی کەت
حوکمەتا ئیراقێ وەک زارۆکەکێ شەش هەیڤییە کۆ هێشتا چەمکێن وێ یێن ئیداری ب هێز نەبوویە
ئەندامەکێ مەکتەبا سیاسییا پارتی دیموکراتی کوردستان، دوپات کر، دگەل ئێکەتییا نیشتیمانی ڕێککەفتینە د هەیڤا ئەیلولا بهێتدا، خۆلا شەشێ یا پەرلەمانێ کوردستانێ دەست ب کارێن خۆ ب کەت و گۆت ژی ئیراقێ رەزەمەندی بۆ هنارتنا مووچەیێ هەیڤا شەش یا مووچەخۆرێن هەرێمێ دیارکریە.
عەلی حسێن، ئەندامێ مەکتەبا سیاسی و هەڤدەم بەرپرسێ مەکتەبا ڕێکخستنا پارێزگەها سلێمانی وهەڵەبجە و ڕاپەڕین یا پارتی، ل دۆر دیماهی ئەنجامێن کوومبوونا دناڤبەرا پارتی و ئێکەتیدا و پەیوەندییێن دناڤبەرا هەر دو حوکمەتێن هەولێر و بەغدادا بۆ رۆژنامەیا (ئەڤرۆ) گۆت: د دوماهی کۆمبوونا دناڤبەرا هەردو شاندێن دانوستاندکار یێن پارتی و ئێکەتیدا، هەر دو ئالی گەهشتینە وێ بڕیارێ، کۆ د هەیڤا ئەیلولا ئەڤسالەدا، خۆلا شەشێ یا پەرلەمانێ کوردستانێ دەست ب کارێن خۆ یێن ئاسایی و قانوونی بکەت، کۆ ئەڤە ژی گاڤەکا ئەرێنیە، کۆ بۆ ڤێ مەبەستێ مە وەکۆ پارتی دگەل ئێکەتییێ بۆ پێکینانا حوکمەتێ پێنگاڤێن باش هاڤێتینە، کۆ هەۆلێن هەردولا بۆ وێ چەندێ نە کۆ بەری هەڵبژاردنێن پەرلەمانێ ئیراقێ، کابینەیا دەهێ یا حوکمەتا هەرێما کوردستانێ بهێتە پێکئینان.
دەربارەی ڕێککەفتنا د ناڤبەرا هەولێر و بەغدادا، عەلی حسێن ئاشکرا کر، دەولەتا ئیراقێ وەکۆ زاروکەکێ شەش هەیڤییە کۆ ژ دایک ببیت ، کۆ پرانیا چەمکێن ئیدارییێن وێ د رێڤەبرنێدا د لاوازێن و ب مخابنی ڤە هێشتا بەغدا یا بەردەوامە لسەر دروستکرنا بەهانەیێن بێ بنەما ل سەر هەرێما کوردستانێ و پابەندی ڕێککەفتنان نابیت و بەردەوام کاری بۆ بڕینا مووچەیێ مووچەخۆرێن هەرێمێ دکەت کۆ ئەڤە ژی تاوانە، هەرچەندە د ڤێ قوناغێدا رێکەڤتن ل سەر هندەک پرسان هاتیە کرن و ئیراقێ رەزەمەندی ل سەر هنارتنا مووچەیێ هەیڤا شەش یا مووچەخۆرێن کوردستانێ دایە و تێتە پێشبینیکرن کۆ ل دیماهییا ڤێ حەفتییێ یان ل دەستپێکا حەفتییا بهێت مووچەیێ هەیڤا شەش بهێتە هنارتن ، سەرەرای کۆ حوکمەتا هەرێما کوردستانێ، هەمی پابەندیێن خۆ ل هەمبەر ڕێککەفتنان بجهـ ئیناینە، هەروەسا هەمی پێنگاڤێن ئەرێنی هاڤێتینە بۆ چارەکرنا کێشەیا مووچەی، لێ بەلێ ئەوا پابەندی ڕێککەفتنان نابیت حکومەتا ئیراقێ یە.
عەلی حسێن ئەندامێ مەکتەبا سیاسییا پارتی سەبارەت ب پێکئینانا حوکمەتا بهێت یا ئیراقێ ئاشکرا کر: بۆ وێ مەرەمێ پارتی دێ ل گەل وی ئالیی ڕێککەفتنێ کەت بۆ پێکینانا حوکمەتێ، کۆ پابەندی دەستووری بیت و پرسگرێکان ب رێکا ڤی دەستووری چارەسەر بکەت کۆ خەلکێ ئیراقێ دەنگ بودای ، پارتی هێشتا جهێ باوەرییا خەلکێ هەرێمێ یە، لەوما پارتی هەردەم بهێزتر دبیت و پارتی بەرەڤانیکارەکێ سەرەکی یە ل داخازکرن و پاراستنا مافێن خەلکێ کوردستانێ لەوما پارتی هەر گاڤەکا رێکەڤتنەکێ ئەنجام بدەت بۆ مەبەستا خزمەتکرنا گەلێ کوردستانێ یە چونکو خزمەتکرنا وان ب ئەرک دزانیت.
