ئامێدیێ، مه‌حمود نهێلى:
زێده‌بارى وێ یه‌كێ كو ئامێدیێ ئێكه ژ ده‌ڤه‌رێن پترین جهێن شوونه‌وارى لێ هه‌ى و باژاره‌كى هه‌رى كه‌ڤن و دیرۆكى و شوونه‌وارى یه لێ تا نها چ رێڤه‌به‌ریه‌ك یان ژی فه‌رمانگه‌هه‌كا گرێدایى ب شوونه‌واران، لێ نینه بو وێ یه‌كێ بشێت ب دروستى ئه‌ركێ پاراستن و ستووگرتنا ڤان جهێن شوونه‌وارى ب خوه ڤه بگریت.
موراد موحه‌مه‌د ئامێدى ئێك ژ ره‌وشه‌نبیرو ئاكنجیێن سه‌نته‌رێ ده‌ڤه‌رداریا ئامێدیێ بو رۆژناما ئه‌ڤرۆ دیاركر، كو زۆر مخابن تا نوكه چ فه‌رمانگه‌هه‌كا شوونه‌وارى ل ده‌ڤه‌رێ نینه و گۆت: هه‌بوونا فه‌رمانگه‌هه‌نه‌كا شوونه‌وارى ل ده‌ڤه‌را ئامێدیێ ئێكه ژ كارێن فه‌ر و پێدڤی ب كار كرنێ هه‌یه ل سه‌ر چونكه زێده‌بارى وێ یه‌كێ ئامێدیێ هه‌ژماره‌كا زۆرا جهێن شوونه‌وارى هه‌یه كه‌ڤنترین قوتابخانه و زانینگه‌ه ژی ل ئامێدیێ بووینه و سه‌دان سالان خزمه‌تا زانست و زانینێ كریه ل ده‌ڤه‌رێ.
ناڤهاتى ئاشكرا ژی كر، كو فه‌رمانبه‌ره‌ك بو ڤێ مه‌ره‌مێ هاتیه دامه‌زراندن لێ چ جهه‌كى نینه لێ ده‌وامێ بكه‌ن و وه‌ك فه‌رمانبه‌ر و هه‌كه ئێكێ كاره‌ك هه‌بیت دڤێت ل ده‌رڤه ببینت و وه‌ك نوونه‌رێ شوونه‌واران كار دكه‌ت ، لێ ئه‌ڤه پێدڤى ب جهه‌كى نه و پێدڤى ب فه‌رمانگه‌هه‌كى و ستافه‌كى نه بو وێ یه‌كێ بشێن كار و بارێن خوه پێ رێڤه ببه‌ن.
سه‌ردار حاجى، وه‌ك شوونه‌وار ناسه‌ك دبێژیت : هه‌بوونا فه‌رمانگه‌هه‌كى ب ناڤێ شوونه‌واران ل ده‌ڤه‌را ئامێدیێ دێ گه‌له‌ك ژ كاروبارێن گرێدایى ب شوونه‌واران ڤه ب ساناهى تر لێ كه‌ت تایبه‌تى ژی سه‌ره‌دانكرنا شاندێن بیانى بو ده‌ڤه‌رێ و بابه‌تێ نووژه‌نكرنا ڤان جهان و خوه حه‌تا پاراستن و گرنگى دان و كاروبارێن گرێدایى ب راگه‌هاندنێ ژی هه‌بوونا فه‌رمانگه‌هێ دێ كارتێكرنا خوه‌یا باش هه‌بیت. و گۆت: دیرۆك و شوونه‌وارێن كوردى پتریا وێ ل ده‌ڤه‌را ئامێدیێ دیار دبیت چونكه ده‌ڤه‌را ئامێدیێ ده‌ڤه‌ره‌كا ره‌سه‌نا كوردیه ژ هه‌موولایه‌كى ڤه .
ژ به‌ر وێ یه‌كێ ناڤبرى ڤه‌كرنا فه‌رمانگه‌هه‌كا شوونه‌وارى یان ژی رێڤه‌به‌ریه‌ك ل ده‌ڤه‌را ئامیدیێ ب گرنگ زانى و هیڤى ژی خواستن كو ئه‌ڤ فه‌رمانگه‌هه ل ده‌ڤه‌رێ بهێته دامه‌زراندن و ستافه‌كى باش و یێ ئه‌كتیڤ و شاره‌زا بو بهێته دامه‌زراندن.
ل سه‌ر ڤێ یه‌كێ هه‌یوار ئامێدى ، نوونه‌رێ شوونه‌واران ل ئامێدیێ بو رۆژناما ئه‌ڤرۆ دیاركر، راسته ڤه‌كرنا رێڤه‌به‌ریه‌كا شوونه‌وارى ل ده‌ڤه‌رداریا ئامێدیێ كاره‌كێ گه‌له‌ك فه‌ره و ل سالا 2012 مه بزاڤ كرینه بو ڤه‌كرنا رێڤه‌به‌ریه‌كى نه‌ك فه‌رمانگه‌هه‌كى چوونكه ده‌ڤه‌را ئامێدیێ ب ده‌ڤه‌ره‌كا شوونه‌وارى دهێته نیاسین و ده‌مێ ئه‌م دبێژین شوونه‌وار، ده‌ڤه‌را ئامێدیێ دهێته پێشچاڤێن مه ، چونكه هه‌ژماره‌كا هه‌رى زۆر یا جهێن شوونه‌وارى ل ئامێدیێ هه‌نه.
ناڤهاتى ئاشكرا ژی كر، ل پرانیا ده‌ڤه‌ردارێن كوردستانێ رێڤه‌به‌ریێن شوونه‌وارى هه‌نه و پێدڤیه ل ئامێدیێ ژی هه‌بیت و گۆت: هه‌ژماره‌كا زۆرا ده‌رچووێن كولیژا شوونه‌واران ل ده‌ڤه‌رێ هه‌نه و هه‌كه رێڤه‌به‌ریه‌ك ب ڤى ره‌نگى ل ده‌ڤه‌رێ هه‌بیت دێ ئه‌و ژی شێن رۆله‌كى باش تێدا گێرن .
و گۆت ژی : هه‌كه رێڤه‌به‌ریه‌ك هه‌بیت ل ده‌ڤه‌رێ یا گرێدایى شوونه‌وارى دێ شێت پتر خزمه‌تا ده‌ڤه‌رێ كه‌ت هه‌م ژلایێ پاراستنا جهێن شوونه‌وارى هه‌م ژی ژلایێ نووژه‌نكرنێ ڤه و نوكه ژی ل رێڤه‌به‌ریا دهوكى كار دكه‌م .
و دیار كر، هه‌بوونا شه‌رێ په‌كه‌كێ و له‌شكه‌رێ توركیا ل ده‌ڤه‌رێ گه‌له‌ك كارتێكرن ل جهێن شوونه‌وارى كریه و بوویه ئه‌گه‌رێ ژ ناڤچوونا هه‌ژماره‌كا زۆرا جهێن شوونه‌وارى .
Comments are closed, but trackbacks and pingbacks are open.