ئه‌رێ ئیران ژى دێ چیته‌ بن چادرا سه‌فوان

غیاس خالد زێبارى

چادرا سه‌فوان ئه‌و چادر بوو ئه‌وا ل باژارۆكێ سه‌فوان یێ سه‌ر ب پارێزگه‌ها به‌سرا ل باشوورێ ئیراقێ نێزیكى سنوورێ وه‌ڵاتێ كوێتێ بۆ دانۆستاندنێن شاندێ هه‌ڤپه‌یمانیا نیڤده‌وله‌تى ب سه‌رۆكاتیا ئه‌مریكا و حوكمه‌تا ئیراقێ یا سه‌رده‌مێ رژێما به‌عس هاتیه‌ ڤه‌دان،

دبن وێ چادرێدا لرۆژا 3/3/1991 ێ هه‌ردو شاندنا چاره‌نڤیسێ شه‌رێ كه‌نداڤێ دویێ دیاركر پشتى لرۆژا 2 ێ ته‌باخا سالا 1990 ێ وه‌لاتێ كوێتێ ژلایێ له‌شكرێ ئیراقێ هاتیه‌ داگیركرن و پشتى چه‌ند بریارێن نه‌ته‌وه‌یێن ئێكگرتى و داخازی و ناڤبه‌ینكاریا وه‌لات ئیراق لسه‌ر مانه‌ڤا داگیركاریا كوه‌یتێ یا رژد بوو و خوه‌ ڤه‌نه‌كێشا، لرۆژا 17 كانوونا ئێكێ هێزێن هه‌ڤپه‌یمانا ده‌ست ب هێرشێن ئاسمانى كرو دربێن مه‌زن ب له‌شكرێ ئیراقێ كه‌فتن و لرۆژا 26/2/1991 له‌شكرێ ئیراقێ ب شه‌رمزارى ده‌ست ب خوه‌ ڤه‌كێشانێ كر . هه‌رچه‌نده‌ بۆچوونێن جودا لسه‌ر رێكه‌فتنا چادرا سه‌فوان هه‌نه‌، لێ ئه‌وا به‌ر به‌ڵاڤ ئه‌وه‌ شاندێ ئیراقێ بێ گه‌نگه‌شه‌ لسه‌ر هه‌مى مه‌رجێن هێزێن هه‌ڤپه‌یمانا رازیبوو ئاخفتنا وان ( به‌لێ … به‌لێ .. دیسان به‌لێ …) بوو . راسته‌ پشتى داگیركرنا كوێتى ده‌وله‌تا ئیراقێ لسه‌ر ئاستێ نیڤده‌وله‌تى زۆر لاواز بوو و ل ناڤ خوه‌ ژى خه‌لكێ باكوور و باشوور سه‌رهه‌لدان كرن و زۆر ده‌ڤه‌ر لبن ده‌ستهه‌لاتا رژێمێ رزگاركرن، لێ حوكمه‌تا ئیراقێ ژبووى مانه‌ڤا خوه‌ هه‌مى مه‌رج قه‌بوولكرن، چونكى ئه‌گه‌ر كۆمبوونا بن چادرا سه‌فوان نه‌با ل سالا 1991 رژێما ئیراقا به‌عسى دا ژ ناڤ چیت . نهۆ شه‌رێ ئسرائیل و ئیرانێ بیرا مرۆڤى ل شه‌رێ كه‌نداڤێ دویێ دئینیت، چونكى دبیت هه‌ڤپه‌یمانیه‌كا مه‌زن بۆ پشته‌ڤانیا ئسرائیل دژى ئیرانێ بهێته‌ پێكئینان ب تایبه‌ت هاتنا راسته‌وخوه‌ یا ئه‌مریكا بۆ ناڤ شه‌رێ دژى ئیرانێ، چ ب هاتنا راسته‌وخوه‌ یا ئه‌مریكا بۆ ناڤ شه‌رى یان پێكئینانا هه‌ڤپه‌یمانیه‌كێ دژى ئیرانێ . پێدڤى یه‌ ئیران به‌رهه‌ڤیا بۆ هه‌مى پێشهاتان بكه‌ت ب تایبه‌ت قه‌بۆلكرنا هه‌مى مه‌رجێن به‌رامبه‌ر مینا رژێما به‌عسا ل بن چادرا سه‌فوان، ئه‌گه‌ر نه‌ ره‌وشا ئیرانێ ل ره‌وشا ئیراقێ دێ خراپتر بیت، چونكى ژلایێ له‌شكرى هێزا ئیرانێ ل گه‌ل ئه‌مریكا ناهێته‌ به‌راووردكرن و ل ده‌مه‌كێ كۆرت دا ئیران دێ تۆشى شكه‌ستنه‌كا مه‌زن بیت، ل سه‌ر ئاستێ ناڤخوه‌ ژى ده‌رفه‌ت دێ بۆ هێزێن دژبه‌رێن رژێما نهۆ یا ئیرانێ هه‌لكه‌ڤیت چالاكیان بكه‌ن و جاددى ب ئازرینن، پاشى حوكمه‌ت نه‌شێت كۆنترۆل بكه‌ت . بڤى ره‌نگى ژى ره‌وشه‌كا نه‌ ئارام و بازاره‌كێ گران دێ به‌رسینگێ گه‌لێن ئیرانێ گریت و شێوازێ ده‌ستهه‌لاتا داهاتى دێ كه‌ڤیته‌ د ده‌ستێ وه‌لاتێن دیتر دا . له‌وما گرنگه‌ ئیران خوه‌ ل ته‌شه‌نه‌كرنا ڤى شه‌رى ب پارێزیت و نهۆ ده‌ستێ ئاشتیێ درێژ بكه‌ت و مه‌رجێن ئه‌مریكا و نه‌ته‌وه‌یێن ئێكگرتى لسه‌ر پرۆگرامێ ئه‌تۆمى قه‌بۆل بكه‌ت به‌رى لبن چادره‌كا مینا چادرا سه‌فوان ئاخفتنا وان ئا ئێكێ و دوماهیێ (به‌لێ و به‌لێ و به‌لێ ) بیت .