ئه‌نفال
مه‌ردان ئه‌بوزید هه‌رنى
دێ ڤه‌هینم ئه‌ڤێ هه‌لبه‌ستێ و هۆزانێ
سه‌ر ئه‌نفال و كوشتن و سێداره‌دانى
نه‌جاره‌كێ گه‌له‌ك جاران سته‌مكارا
سه‌رسه‌رێ مه ئاگر باراند وه‌ك بارانێ
ته‌رم و لاشێن مه هاڤێتن ده‌شت و چۆلان
گه‌له‌ك قه‌بر و گۆڕێن ب كۆم بۆمه كولان
سێداره‌دان گه‌نج و لاوێن وه‌ڵاتێ من
یان كرى نه‌كرى یه چ دین و ئولان
ئه‌و دوژمنێ بێ ویژدان و پیس و چه‌په‌ل
كریار مینا گورگێ برسى و ڕیڤى و چه‌قه‌ل
پێكڤه كۆشتن ژن و زارۆك بێ جوداهى
دروست كرن بۆ كوردا گۆڕێن ب كومه‌ل
كور ل دایكا جودا كرن بێ ویژدانا
كاڵێن هه‌شتێ ساڵ ژى برن بۆ زیندانا
ئه‌و ڕۆژێن ڕه‌ش چ جار ناچن ل بیرامه
ده‌مێ كه‌فتینه ژێر ئه‌شكه‌نجه و لێدانا
كێمیا باران كۆمه‌ڵكوژى و ڕه‌شه ئه‌نفال
فه‌توا پێدا سه‌ر مه كوردا كرن حه‌لال
دلێ هزاره‌ها دایكان هاته سۆتن
ل مه كوشتنَ باب و برا و پسمام و خال
پیرۆ جحێل برن به‌ره‌ڤ بیابانێ
بن ئاخ كرن ژبیر ناكه‌ین وێ تاوانێ
ب ده‌نگه‌كێ بلند مه كر قیرى و گازى
لێ كه‌ڕ ببوون گوهێن خه‌لكێ ڤێ جیهانێ
گه‌له‌ك كچ و شه‌نگه‌زه‌ریێن ماره‌كرى
یێت مایى ناڤ مالا بابى هێش نه‌برى
كه‌زى و بسك و گولیێن سپى به‌ردان ملا
كراسێن شاهى و داوه‌تێ وان نه‌درى
چه‌ند ئه‌م بێژین هندى هه‌بین ل دونیایێ
ئه‌و كول و خه‌م ل ناڤ دلێ مه ده‌رنایێ
ب خوینا سۆر دێ نڤیسین بۆ دیرۆكێ
دا ب مینیت هه‌ر هه‌بیت هه‌تا هه‌تایێ
Comments are closed, but trackbacks and pingbacks are open.