زێ بادینان
سیاسه‌تمه‌دارێ كورد ئه‌دهه‌م بارزانى راگه‌هاند، ،دڤێت جوداهى و ده‌رزا د ناڤبه‌را به‌رپرس و پله‌داران دگه‌ل هه‌ژار و بێ ده‌ستهه‌لاتان نه‌مینیت ئه‌گه‌ر نه پاشه‌رۆژه‌كا خراب چاڤه‌رێى هه‌میانه.
سیاسه‌تمه‌دار و ئه‌ندامێ پێشتر یێ سه‌ركرداتیا پارتى، ئه‌دهه‌م بارزانى ل په‌یجێ خۆ یێ فێسبۆكى ده‌رباره‌ى كۆچبه‌ربوونا ب كۆم یا گه‌نج و وه‌لاتیێن هه‌رێمێ د په‌یامه‌كێ دا راگه‌هاند، دیمه‌نێن كۆچبه‌رێن هه‌رێما كوردستانێ د ره‌وشه‌كا خراب و سه‌قایه‌كێ سار و د ناڤ هه‌ریێ دا ل سه‌ر سنورێن ئێكه‌تیا ئه‌ورۆپا، ناخێ وى هژاندى یه و ئه‌و خه‌مبار كرى یه.
ئه‌دهه‌م بارزانى د په‌یاما خۆ دا دبێژیت “ب هه‌مى باوه‌ریا خۆ دگه‌ل وێ ئێكێ مه كو دڤێت سه‌قایه‌كێ ئابۆرى و ژیانه‌كا خۆش و ژ هه‌ژى و سه‌ربلندانه بۆ گه‌نجێن كوردستانێ بهێته دابینكرن داكو ئه‌وژى شیان و ئه‌زموون و ژیانا خۆ بێخنه د خزمه‌تا ئاڤاكرن و پێشڤه‌برنا كوردستانێ دا”.
بارزانى دیاركر ژى، دڤێت پلانه‌كا دروست و رێكارێن دادپه‌روه‌رانه بهێنه دانان كو جوداهیا د ناڤبه‌را پله‌دار و به‌رپرس و زه‌نگینان دگه‌ل هه‌ژار و بێ ده‌ستهه‌لاتان دا نه‌مینیت، رێز ل كه‌ساتیا هه‌ر تاكه‌كێ ڤى وه‌لاتى بهێته گرتن، تاكێ كورد بهێته ئاشتكرن و وه‌لاتێ وى ل ده‌ڤ ژ هه‌مى جیهانێ شرینتر بیت، ئه‌گه‌ر ئه‌ڤه نه‌هێته كرن پاشه‌رۆژه‌كا خراب چاڤه‌رێى مه هه‌میانه
Comments are closed, but trackbacks and pingbacks are open.