ئێکەتیا دناڤ پێلێن بیڤەلەرزێ دا

غیاس خالد زێباری

پشتی وەغەرا داویێ یا رەحمەتی مام جەلال تالەبانی سکرتێرێ گشتی یێ ئێکەتیا نشتیمانیا کوردستانێ، ئەڤ حزبە تۆشتی بیڤەلەرزەکا ناڤخۆیی بوو، چونکی پشتی وەفاتا سکرتێرێ گشتی سەرکردایەتی و مەکتەبا سیاسی یا وێ حزبێ وەکی ئۆڕگان و سازی نەمان، سیاسەت و ئارمانجێن وێ یێن ناڤخۆیی و دەرڤە و ئیراقی لسەر سەمت و ئاراستەیەکا دیارکری یا نشتیمانی و نەتەوەیی نەما و بەرەڤ ئاراستەیێ کۆمپانیێن بازرگانی و میلیشیایێن چەکداری و ملیتاریێن پاراستنا بەرژەوەندێن تایبەت چوو .
ژلایێ رێکخستن و پرنسیپان ژی چ ڕەنگ و سیما تێدا نەمان، بتایبەت پشتێ هەلبژارتنا شێوازێ هەڤسەرۆکیێ .

ئەگەر بەرێکڤەدانەکا کۆرت و بلەز یا رەفتار و سەرەدەریێن ئێکەتیا نشتیمانیا کوردستانێ یا سەردەمێ رەحمەتی مام جەلال تالەبانی و پشتی وی بکەین، دێ خۆیا دبیت کۆ ب وەغەرا مام جەلال تالەبانی بیڤەلەرزێ لڤێ حزبێ دایە و هەتا نهۆ رۆژ بۆ رۆژێ پلێن ریختەرێن بیڤەلەرزا ئێکەتیێ بلندتر دبن و کاریگەریێن وێ ژی مەزنتر و زیان بەخشتر دبن، پیلانا خیانەتا پشکەکا سەرکردێن ئێکەتیێ و هەڤسەرۆکێن وێ یا رادەستکرنا کەرکووکێ و پشکەکا دەڤەرێن کوردستانی یێن دەرڤەی ئیدارا هەرێما کوردستانێ ل ١٦ ێ ئکتۆبەرا ساڵا ٢٠١٧ ێ ئێک بوو ژ پێلێن بهێزێن بیڤەلەرزا ئێکەتیێ.
بیڤەلەرز بوو چونکی بەرێ ئێکەتیا نشتیمانیا کوردستانێ ل ئاراستەیێ نشتیمانیبوون و کوردایەی و نەتەوایەتیێ و ئێکرێزیێ و وەڵات پارێزیێ لادا، بۆ ئاراستەیا خیانەتەکا رێکخستی و بجهئینانا مەڕام و ئەجندایێن نەیار و داگیرکرێن کوردستانێ کۆ دژی هیڤی و ئارمانجێن خەلکێ کوردستانێ و بزاڤا رزگاریخوازیا کوردستانی بوون .

پێداگیریا سەرکردایەتیا ئێکەتیێ لسەر ( بەرهەم سالح ) ی وەکی نوونەرێ خەلکێ کوردستانێ بۆ سەرۆک کۆمارێ ئیراقێ، پێلەکا دیترا بیڤەلەرزا دناڤ ئێکەتیێ دا بوو چونکی سەرۆک کۆمار پشکا خەلکێ کوردستانێ یە نەک حزبەکێ .
ناکۆکیێن دناڤ سەرکردایەتیێ ژی دا کۆ ئەڤرۆ پەرت و بەڵاڤ بوونە و هەر ئێک ب شێوازەکی داخۆیانیا ددەت و ژمارەکا وان ژی هاتینە دەرئێخستن و لادان، ئەڤە ژی بۆ ناڤخۆیێ ئێکەتیێ بیڤەلەرزەکا دژوارە ونیشانێن حیبەتیێ و پسیارێ دئێخنە سەر ئێکەتیێ وەکی حزبەکا نشتیمانی .

ئەڤە ڕامانا وێ چەندێ ناگەهینیت کۆ ئێکەتیا نشتیمانیا کوردستانێ لسەردەمێ مام جەلالێ رەحمەتی نەشیایە سەرکردێن نشتیمان پەروەر و رێکخستنەکا لسەر بنەمایێ ڤیانا وەڵاتی و مللەتی پەروەردە نەکرینە، لێ ب وەغەرە مام جەلالێ رەحمەتێ ، ب فەڕامۆشکرنا رۆلێ سەرکردێن دێرین و نشتیمانپەرێن دناڤ ئێکەتیێ دا، زابوونا هندەک کەسایەتیێن بێ ئەزمۆن د وارێ سیاسەت و رێکخستنێ دا لسەر بریارا ئێکەتیێ، ئەڤ بیڤەلەرزە درست کر ، بەردەوام بوونا ئێکەتیێ لدەستێ ڤان بێ ئەزمۆناندا رۆژ بۆ رۆژ ژلایێ جەماوەری و سیاسی پێگەهێ ئێکەتیێ دێ لاواز بیت و ئەو ئکەتیا مایی ژ ئەنجامێ هەبوونا هێزێن چەکداری و ئێمناهی یە لبن فەرمانا سەرۆک و سەرکردایەتیا نهۆ یا ئێکەتیێ دا . ڤەگەڕیانا ئێکەتیێ بۆ سیاسەت و ڕەووشتێ مام جەلالێ رەحمەتی تاکە سیستەمێ ڕاگرتنا ڤێ بیڤەلەرزا دەست کردە ئەوا ئێکەتیێ دهەژینیت .
بەردەوامیدانا ئێکەتیێ لسەر شێوازێ نهۆ دهێتە پەیڕەوکرن ، پێلێن بیڤەلەرزێ دێ بهێزتر بن و ئیفلاسا ئێکەتیێ ل دەمەکێ زوو دێ هێتە ڕاگەهاندن، دۆر نیە پاشمایێن وێ ئەوێن پشتا خۆ ب هێزێن خۆ یێن ئەمنی و چەکداری گرێددەت، بۆ مانەڤا خۆ پەنایێ ببەنە بەر کارێن تیرۆرستی، هەر وەکی ئەڤرۆ بهێزا چەکی و درۆنا گەفا ل کادر و فەرماندێن لایەنەکێ دیارکری دکەن لسنوورێ دەستهەڵاتا خۆ و تیرۆرکرنا فەرماندەکێ دژە تیرۆرا خۆ پێش چاڤێن خێزان و زارۆکێن وی ل هەولێرا پایتەخت ، نیشانێن وێ چەندێ ، دۆر نیە ب بەردەوامیا ڤان کارێن تیرۆرستی ئێکەتیا نشتیمانی بکەڤیتە دناڤ لیستا تیرۆرا جیهانی دا .