نازی محــەمەد شەریف
ئەگەر ئەم بەرپەرێن دیروکێ ڤەدەین ئەڤ قەوارێ هەرێما کوردستانێ کو کورد حوکمی لێ دەکەن و ژ لایێ نێڤ دەولەتڤە دانپێدان پێ هاتیە کرن د چارچوڤێ دەولەتا عیراقا فیدرالیدا، چ جارا کوردا چ قەوارێن سیاسی یێن بڤی رەنگی نەبوویە و ئەڤە هەمی ژ ئەنجامێ وێ پالشتیا ئەمریکا و هەڤپەمانێت وێ بوویە، ئەگەر ئەمریکا نە بیت کو ئەڤە سی سالە ڤی قەوارێ سیاسی و مللەتێ دپارێزیت ژ ڤان چار دەولەتێت داگیرکەر نها ژ مێژە ڤان دەولەتا ئەم ژ ناڤ بربایین.
ئەڤرۆ زۆر تێتە گوتن کو یا فەرە ئەم وەک کورد پشتا خۆ ب ئەمریکا گەرم نەکەین، ئەرێ پا پشتا خۆ ب کێ گەرم بکەین؟ ئەم بخازین و نەخازین ئەڤرۆ ئەمریکا بهێزترین یاریکەرێ نێڤدەولەتیە و مەزنترین رۆل یێ هەی د رویدانێن دەڤەرێدا ، لەورا زور کارەکێ سروشتی و لوژیکیە کو تو پشتا خۆ ب دەولەتەکا بهێزڤە گرێدەی نە دەولەتەکا لاواز.
هەروەسا مە چەندین نمونە هەنە کو ئەگەر ئەمریکا و هەڤپەیمان نەبن، چەندین جارا هەرێما کوردستانێ دا کەڤیتە بن گەفێت نەمانێ مینا هێرشێن داعش و حەشدا شەعبی و …
لەورا ئەڤە هەمی ئیماژەنە کو مە پێدڤی ب پشتەڤانیا ئەمریکا هەیە، چونکی مە د نهادا چ بەدیل نینن بۆ هندێ ل جهێ ئەمریکا ئەم پشتا خۆ پێ گەرم بکەین، باش بیت یان خراپ بیت و جهێ باوەريێ بیت یان نەبیت، ئەم نەچارین پشتا خۆ پێ گەرم بکەین، و پشت گەرم کرنا مە ب ئەمریکا ژی نە ژ حەژێکرن و ڤیانا مە یە بۆ ئەمریکا، بەلکو بتنێ ژبەر هندێ یە کو ئەڤرۆ ئەمریکا یا مە دپارێزیت.
لێ بابەتێ سەرەکی ئەڤەیە کا مە وەک کورد چ بۆ خۆ کریە هەر چ نەبیت د ڤان سی سالیێت حوکمرانیا کوردیدا،
براستی ئەڤە سی سالە ئەمریکا مە د پارێزیت ژبۆ هندێ کو ئەم خۆ ئاڤا بکەین و ولاتەکی ئاڤابکەین کو یاسا سەروەر بیت و بنەمایێن دیموکراسیێ و ژیانا مەدەنی خورت بکەین و خۆ دویر بکەین ژ وی ئەقلێ شەرەنگیز و کاڤلکەر، لێ مخابنڤە مە وەکی پێدڤی مفا ژ ڤێ پشتەڤانیا ئەمریکا نەدیت ژ بۆ پێشڤەبرنا ولاتی و دابینکرنا وەلاتەکەکێ یاسا سەروەر بیت، بەلکو مە زێدەتر گرنگی ب هەڤرکیێن حزبی و کورسیکێ دایە.
براستی یا فەرە حکومەت و پارتێن کوردی لەزێ بکەن د ئاڤاکرنا وەلاتەکێ یاسا سەروەر بیت و چاکسازیێت بنەرەتی بکەن و چاکسازیێ ژ سەری دەستپێبکەن و کەس ژ یاسا مەزنتر نەبیت و حکومەت و سازی و لەشکرەکێ بهێز ئاڤا بکەین و خۆ بەرهەڤبکەین ژبۆ هەر پێشهات و رویدانەکێ، گیرو کرنا چاکسازییێن راستەقینە د بەرژوەندیا هەرێمێ دا نینە و رویدان بلەز یێت سەر مەدا دبۆرن و زەمەن و دەم نە رەحمێ ب مەدا دبەن و نە خۆ ل مەدگرن، چونکی ئەم بڤێ ناڤ مالا هەلوەشیای و لاواز رەنگە نکارین هەتا شەرێ بەرگریێ دگەل گرۆپەکێ تیروریستێ لاوز ژی بکەین.
نازی محمدشریف
٢١/٨/٢٠٢١
Comments are closed, but trackbacks and pingbacks are open.