وەزارەتا ساخلەمیا هەرێما کوردستانێ رۆنکرنەک ل دۆر ب قاچاخبرنا جۆرەکێ ڤاکسینێ کۆرۆنایێ بۆ وەلاتەکێ جیران بەلاڤ کر و دیار کر: ئەو ڤیدیۆیا هاتیە بەلاڤکرن، چێکریە و مۆرەکا سەختە ب ناڤێ وەزارەتا ساخلەمیێ هاتیە لێدان.
وەزارەتا ساخلەمیێ د رۆنکرنا خۆ دا ئاشکرا کر: پشتی بەلاڤبوونا وێ ڤیدیۆیێ هەر ئێکسەر سەرپەرشتێن وەزارەتێ دەست ب لێکۆلینێن دەستپێکی کر و ب هەماهەنگی ل گەل وەزارەتا ساخلەمیا ئیراقێ دیاربوویە کو چ راستی بۆ وێ ڤیدیۆیێ نینە و ئەوان ب فەر دیت ڤان راستیان بۆ رایا گشتی رابگەهینن ئەو ژی کو چ فۆرم و مۆرێن ساخلەمیا هەرێما کوردستانێ ل سەر ڤاکسینا فایزەر بکار ناهێن، ژ بەرکو ڤاکسین ئێکسەر بۆ هەرێما کوردستانێ نەهاتیە بەلکۆ ب رێیا وەزارەتا ساخلەمیا ئیراقێ هاتیە.
تێدا هاتیە ژی: جۆرێن ئامیرێن چاڤدیرێ پارامێتری و زانیاریێن ل سەر سندۆقان ب تەمامی جودانە وەک ئەوێن ل هەرێما کوردستانێ هاتینە وەرگرتن و نوینەرێن کۆمپانیا ناڤبری ل گەل هەر سندۆقەکێ ل دەمێ ڤەگوهاستنێ ئامادەنە هەتا دگەهنە سەنتەرێ بکارئینانێ ب سیستەمەکێ وەها چاڤدێریێ دکەن کو کۆمپانی ژ سەنتەرێ سەرەکی چاڤدێر بیت.
وەزارەتا ساخلەمیا هەرێما کوردستانێ هەروەسا دوپات کریە، تا نوکە ٩ سندۆق ل ٨ سەنتەرێن ڤاکسینێ ل هەرێما کوردستانێ هاتینە وەرگرتن و هەر هەمی جهـ و شێوازێ دابەشکرنا وان زەلالە و داتا، زانیاری ب سیستەمەکی هاتینە گرێدان کو ل گەل بەغدا گرێداینە.
ئەڤە د دەمەکی دایە ڤیدیۆیەک ل سەر تۆرێن جڤاکی ب ناڤێ کەنالێ BBC بەلاڤبوویە و ب مۆرەکا سەختە ب ناڤێ وەزارەتا ساخلەمیا هەرێما کوردستانێ نیشان دایە کو ڤاکسینا فایزەر ب قاچاخی دبەنە ئیرانێ.
Comments are closed, but trackbacks and pingbacks are open.