ئەز پیشنیار دکەم دەزگەهەکێ تایبەت بۆ کارەساتێن ب سەرێ گەلێ کورد هاتین بێتە سازکرن
سادق سالح ،
یاد کرنا کارەساتا شنگال، کو هێشتا مینا ڤۆلکانێ د ناڤ جەستەیێ مرۆڤێ کورد ب گشتی و ب تایبەت گەلێ شنگالێ دا دکەلیت و هێشتا رۆیبارێن خوین رۆندکا دناڤ چاڤ و دلێن کەس و کارێن قۆربانیاندا هشک نەبووینە، باوەرناکەم ب چ نرخەکێ بێنە هشککرن و ژ بیرکرن.
لێ یاد کرنا کارەساتا شنگال و هەمێ ئەو کارەساتێن ب سەرێ گەلێ کورد هاتین، کو ب درێژیا دیرۆکێ گرنگ و پێویستە و رێز ل وان قۆربانیا بێتە گرتنێ، لێ یا هەری گرنگ ئەوە کو ژ بۆ ئەڤ کارەساتە دووبارە نەبن و دیرۆکا گەلێ کوردستانێ دووبارە نەبیتن، پێویستە لسەر هەستا نەتەوی کارەکێ جددی بێتە کرن و نڤش ل دویڤ نڤشی ژ ئەگەرا روودانا ڤان کارەساتە بێنە هشیار کرن.
ئەو کارەساتێن کو ب سەرێ گەلێ کوردستانێ هاتینە، رۆژەک یان چەند رۆژ بۆ یاد کرنا وان تێرا ناکەت، پێویستە بەردەوام و ب تایبەت د سلکێ پەروەردێ دا ئەڤ کارەساتە وەک بابەتێن دیرۆکی و ل دوویڤ ئاستێ قۆتابیان دناڤ وانێت مێژوویێ دا بێنە گۆنجاندن و ب جددی لسەر بێتە راوەستاندن
.
هەروەسا ئەرکەکێ نەتەوەی نیشتیمانیە، کو راگەیاندن و ماسمێدیا کوردی گەلەک ب پسپۆرانە ڤان کارەساتا بەردەوام دناڤ پرۆگرامێن خۆدا جی بۆ ڤەکەتن و راپۆرت و چاڤپێکەفتن ل گەل پسپۆر و کەس و کارێن قۆربانیان بێنە سازکرن و ئەرشیڤ کرن و هەروەسا کار بێتەکرن، کو ئەڤ کارەساتە دناڤ قاتا ناڤنەتەوی دا وەک جنوساید بێنە ناسین و د دادگەهێن ناڤ نەتەوی دا وەک سکالایێن جنوسایدێ بێنە تۆمارکرن و پێشکەش کرن و کەس و کارێن قۆربانییا، بێنە قەرەبوکرن و هەروەسا رۆژنامەڤان و نڤیسەر و لێکۆڵینەوەر د ڤی بوراریدا، بەردەوام سمینار و بابەتان لسەر بکەن و بنڤیسن و هەروەسا چڤاک بێتە هشیارکرن لسەر دیرۆک و ئەگەر و دەمێ ئەڤ کارەساتە هاتینە ئەنجامدان.
ئەز پیشنیار دکەم دەزگەهەکێ تایبەت ژ پسپۆرێن وارێ کارەسات و جنوساید و دیرۆکێ بێتە ئاڤاکرن و کارو خەباتا وان کۆمکرنا پێزانین و بەلگە لسەر ڤان کارەساتا بن و هەروەسا دێکومێنت و ئەرشیڤکرن و چێکرنا پەیوەندیێن ناڤنەتەوەی بن، هەروەسا مفای ژ سەرپێکێن جهانی د ڤێ واریدا بێتە وەرگرن.
هیڤیدارم چۆجارا ئەم ڤان کارەساتا ژ بیر نەکەین و تم و تم لبەر چاڤێت مەبن و هەروەسا هیڤیدارم، گەلێ کۆردستانێ جارەکا دی ڤان جۆرێن کارەساتا ب خۆڤە نەبینیت
Comments are closed, but trackbacks and pingbacks are open.