جۆن كێربی، پەیڤدارێ جڤاتا ئاسایشا نەتەوەی یا كۆچكا سپی د پرێسكۆنفرانسەكی دا ل واشنتون سەبارەت ب ئۆپەراسیۆنێن سەربازی یێن ئەنقەرە بۆ سەر رۆژئاڤایێ كوردستانێ راگەهاند، ژبەركو توركیا بەردەوام بوویە قۆربانییا هێرشێن تیرۆرستی ل سنۆرێن وەلاتێ خوە و دنافخۆیا وەلاتی ژی دا، مافێ وێ یە بەرگرییێ ژ خوە و وەلاتییێن خوە بكەت ل بەرامبەر وان ھێرشان.
دیار ژی كر، هەرچەندە توركیا بوویە قۆربانییا هێرشێن تیرۆرێ، لێ واشنتون نەڤێت هیچ كریارەكا سەربازی ژلایێ توركیا یان هەر لایەنەكێ دی ل سووریا بهێتەكرن كو ببیتە ئەگەرێ درۆستبوونا مەترسییێ ل سەر گیانێ سەربازێن ئەمریكی یێن كو هاریكاریا هێزێن سووریا دیمۆكرات دكەن ل وی وەلاتی.
دوهی رۆژا دووشەمبی رەجەب تەیب ئەردوگان، سەرۆككۆمارێ توركیا راگەهاند، ژبۆ ئەنجامدانا ئۆپەراسیۆنان ئەو رازەمەندییا چ لایەنان نا وەرگرن و دۆپات ژی كر ئەو ئۆپەراسیون دێ د بەردەوام بن.
رۆژا 20/11/2022ێ، توركیا ئۆپەراسیونەكا مەزن بۆ سەر بنكە و پێگەهێن پەكەكێ ل باشوورێ كوردستانێ و پێگەهێن هەسەدێ ل رۆژئاڤایێ كوردستانێ دەستپێكر. ل دویڤ ئامارێن رێڤەبەریا خوەسەر ژی، ب ئەگەرێ وان هێرشان 59 كەسان ژیانا خوە ژدەستدا كو 16 ژوان خەلكێ سڤیل بوون و 19 ژی شەرڤانێن هەسەدێ بوون و 24 سەربازێن سۆپایێ سووریا بوون.
Comments are closed, but trackbacks and pingbacks are open.