ویلایەتێن ئێکگرتی یێن ئەمریکی و ئێکەتیا ئەورۆپی رێککەفتنەکا مەزن یا غازا سرۆشتی یا شل راگەھاند، وەک بزاڤەک بۆ کێمکرنا پشتبەستنا ئەورۆپا ل سەر غازا رۆسیا.
ل گۆرەی ئاژانسێن نووچەیان؛ ئەمریکا دێ سالانە رێژەیەکا غازا سرۆشتی بۆ ئەورۆپا ھەر ژ دویماھیا سالا ٢٠٢٢ ھەناردەکەت کو رێژەیا وێ یەکسانە ب ٢٤% ژ وێ غازا ژ رۆسیا بۆ ئەورۆپا دھێتە ھەناردەکرن.
راگەھاندینە ژی؛ ل گۆرەی رێککەفتنێ ئەمریکا دێ سالانە ٥٠ ملیار مترێن موکەعەب یێن غازا سرۆشتی ھناردەی ئەورۆپا کەت.
دیار ژی کرینە: ئەڤ بڕیارە د سەرەدانا سێ رۆژی یا جۆ بایدن دا بۆ برۆکسل ھاتیە ئاشکراکرن پشتی ئێکەتیا ئەورۆپا راگەھاندی کو وان بڕیار دایە ب ئاوایەکێ پراکتیکی ھاوردەرکرنا غازا رۆسی بۆ ئەورۆپا ب دویماھیک بینن.
جۆ بایدن و ئورسۆلا ڤۆن دێر لاین سەرۆکا کۆمیسیۆنا ئەورۆپی ل دۆر پشتەڤانیکرنا ئۆکراینا گۆتوبێژ ئەنجامدان و بایدن تێدا دیارکر “پۆتین داھاتێ ژێدەرێن تێھنێ یێن رۆسی ژ بۆ کونترۆلکرنا وەلاتێن جیران بکاردئینیت و قازانجێن داھاتێ غازێ ژ بۆ تەمویلکرنا شەڕێ ل سەر ئۆکراینا بکاردئینیت”.
بایدن راگەھاند ژی؛ مفایێن دومدرێژ یێن رێککەفتنێ پترن ژ زیانێن دومکورت یێن ژ ئەنجامێ کێمکرنا پشتبەستنێ ل سەر غازا رۆسی پەیدادبن.
سەرۆکێ ئەمریکا گۆت ژی “ئەڤ پێنگاڤە نە ب تنێ ژ روویێ ئەخلاقی ڤە یا گرنگە بەلکو ژ روویێ ستراتیژی ڤە ژی دێ مە دانیتە د جھەکێ بھێزتر دا”.
ئورسۆلا ڤۆن دێر لاین ژ لایێ خۆڤە دیار دکەت “ئارمانجا مە ئەورۆپیان ئەوە ئەم ژێدەرێن خۆ فڕەجۆر بکەین بێی پێدڤی ب بەرھەمێن رۆسیا ببین”.
رۆسیا د نھا دا نزیکی ٤٠% ژ پێدڤیاتیێن وەلاتێن ئەورۆپی یێن غازا سرۆشتی دابین دکەت.
ئەڤ گاڤە ب ئێک ژ سزایێن ئەمریکا و ئێکەتیا ئەورۆپا بۆ سەر رۆسیا دھێتە ھژمارتن پشتی شەڕێ وێ بۆ سەر ئۆکراینا.
Comments are closed, but trackbacks and pingbacks are open.