ماوێ زێدەتر ژ دوو حەفتیایە كێشەیێن تەكنیكی و نەبوونا دەرمانێن پێدڤی ل نەخۆشخانا هیوا یا چارەسەركرنا نەخۆشیێن پەنجەشێرێ پەیدابوویینە، دئەنجامدا مەترسی كەتییە سەر ژیانا بدەهان نەخۆشێن پەنجەشێرێ، ئەڤ چەندە بۆ ئەگەر كەمپینەكا فشارێ لسەر حكومەتێ لسەرانسەری هەرێما كوردستانێ بهێتە دورستكرن، دا كێشەیێن نەخۆشخانا هیوا بهێنە چارەسەركرن.
دكتور بڕیار ئەحمەد مستەفا ژ سەنتەرێ (ژیانەوە) ڕاگەهاند، جڤاتا وەزیران سوزدایە دڤێ حەفتیێدا پارێ پێدڤی بۆ چارەسەركرنا كێشەیێن تەكنیكی ل كلینیكێن نەخۆشخانا هیوا خەرج بكەت، بەلێ كێشەیا دابینكرنا دەرمانان مایە هەلاویستی، و ئەگەر جڤاتا وەزیرا پێداچوونەكێ د گرێبەستێن خۆدا نەكەت دگەل كۆمپانیێن دەرمانان دابین دكەن، ڕەوشا نەخشخانا هیوا دێ زێدەتر بەرەڤ ئاڵۆزیێ چیت.
جڤاتا وەزیران تنێ 2% پارێ وان كۆمپانیان خەرج یێن دەرمانا بۆ نەخۆشخانان بگشتی و نەخۆشخانا هیوا بتایبەتی هاوردە دكەن، ژلایێ خۆڤە وان كۆمپانیان كارێ خۆ ڕاگرتییە و ئێدی دەرمانان بۆ نەخۆشخانا دابین ناكەن، لەوڕا پێدڤییە جڤاتا وەزیران پێداچوونەكێ د بڕیارا خۆدا بكەت، ژبەركو نەبوونا دەرمانێن پێدڤی، دێ نەخۆشخانا هیوا ژكاركەڤیت.
دماوێ دوو ڕۆژێن دەربازبووییدا کەمپینەک بۆ پشتەڤانیکرنا نەخۆشخانا هیوا لسەرانسەری هەرێما کوردستانێ هاتە ڕاگەهاندن، بدەهان وەزیر و پەڕلەمانتار و ڕەوشەنبیر و ڕۆژنامەڤان و وەڵاتیان بەشداری تێدا کرییە، هەتا نوکە ئەو کەمپینە یا بەردەوامە، ئارمانج ژێ دورستکرنا فشارێ یە لسەر حکومەتێ پێخەمەت چارەسەرکرنا کێشەیێ نەخۆشخانا هیوا.
Comments are closed, but trackbacks and pingbacks are open.