غیاس خالد زێباری
ئەندامێن کۆنگرێن حزبێن سیاسی چەندین ئەرک هەنە، هەر ل دارشتنا پڕۆگرام و پەیڕەوێ ناڤخوو و دارشتنا سیاسەتا حزبێ بۆ دەمێن داهاتی و هەلبژاردنا سەرکردایەتیێ.
بریارە پارتی دیموکراتی کوردستان ل ڤان رۆژێن داهاتی کۆنگرێ خۆ یێ چاردێ گرێبدەت. ژبەرکۆ پارتی کاریگەرترین و دێرینترین حزبا کوردستانی یە، زێدەتر ل هەمی حزبا خەلک پێڤە هاتیە گرێدان و خەلک پاشە رۆژا خۆ و گەل و وەڵاتی ب پاشەرۆژا پارتی دیموکراتی کوردستان را دبینیت.
چونکێ ڤێ پارتیێ پێشەنگیا خەباتا رزگاریخوازیا کوردستانی کریە و دکەت و دەستکەفتێن مە یێن نەتەوی و نشتیمانێ لسەر دەستێ ڤێ پارتیێ بدەست هاتیە و ب هەڵویست و بریارێن وێ ژی دهێنە پاراستن، لەوما پارتی و خەلکێ کوردستانێ پێکڤە هاتینە گرێدان، چ ژلایێ سیاسی و کارگێری بیت، یان ژلایێ جڤاکی، راستە ئەنجامدانا کۆنگرێ چالاکیەکا سەد دەر سەد حزبی و رێکخستی یە، لێ ژبەر وان ئەگەرێن مە دیارکری چاڤێ پڕانیا خەلکێ کوردستانێ لسەر کۆنگرێ چاردێ یێ پارتی یە.
ژلایەکێ دیتر پرانیا دەستهەڵاتا کوردستانێ د دەستێ پارتی دایە، لەوما خەلکی دڤێت کۆنگرێ چاردێ یێ پارتی ببیتە ئەگەرێ ئەنجامدانا گۆڕانکاری و چاکسازیێن بنەڕەتی، هەرچەندە پارتی د ڤێ کابینا نەهێ دا دەست ب گۆڕانکاری و چاکسازیا کریە، لێ هەلبژاردنا ئەندامێن سەرکردایەتیا پارتی یێن دەستپاکتر و چاکسازخوازتر و دلسۆزتر، دێ پاڵپشتیەکا زێدەتر بۆ حکومەتا هەرێما کوردستانێ هەبیت ژلایێ چاکسازیێن مەزنتر و ئەنجامدانا پرۆژێن زێدەتر یێن خزمەتگۆزاری ب دەستپاکی، هەر وەسا ژلایێ رێکخستنا پارتایەتی، کەسێن هەژی و دلسۆز و خەمخۆر و دەستپاک ل سەرکردایەتیا پارتی،
“ب هەلبژارتنا ئەندامێن سەرکردایەتیێ لسەر بنەمایێ شیان و دلسۆزیێ و دەستپاکیێ”
دێ شێن زووترین دەم ئاریشە و کێماسیێن ئۆرگان و کادرێن پارتی چارەسەر بکەن، کۆ ئەڤرۆ د ئاریشەکا مەزن دانە، ئەڤە ژی ئەرکێ ئەندامێن کۆنگرا چادێ یا پارتی یە، ب هەلبژارتنا ئەندامێن سەرکردایەتیێ لسەر بنەمایێ شیان و دلسۆزیێ و دەستپاکیێ، نەک لسەر بنەمایێ سۆزدایێ و خزم خزمانێ و دەڤەرکاتیێ و عەشیرکیێ، بلا دەنگێن ئەندامێن کۆنگرێ بۆ وان بەربژێن سەرکردایەتیێ بن ، ئەوێن نێزیکی خەلکی و کادر و جەماوەرێ پارتی کۆ دەرگەهــ و موبایلێن وان بەرامبەر وان د ڤەکری بن وخۆ ل گلە و گازندێن وان بکەن خودان، نەک دەنگ بۆ وان بەرپرسان بیت ئەوێن بووینە ئەگەرێ ڤێ ڤالاهیا دناڤبەرا خەلکی و سەرکردایەتیێ ژلایەکی، و ئۆرگانێن خوارێ و سەرکردایەتیێ ژلایەکێ دیتر، ئەوێن هەتا دوینێ دەرگەهێن خۆ ل خەلک و کادرێن دلسۆز گرتی و ژمارێن موبایلێن خۆ ژی نیشا کەسی نە ددان و بەرسڤا مەسج و نامێن وان ژی نە ددان و چ جارا خۆ ل گلە و گازندێن وان نەکریە خودان ، ئەڤرۆ بۆ بەرژەوەندێن خۆ یێن تایبەت و راکێشانا سرنجا ئەندامێن کۆنگرێ بۆ دەنگپێدانێ دەرگەهێن بارەگایێن خۆ ڤاڵا کرنە و دەست ب پەیوەندیا کریە چ راستەوخۆ یان ب موبایلا و گرێیێن ناڤچاڤێن خۆ نەهێلای و ب گرنژین دەست سوعبەتا دکەن.
ئەرکەکێ ئەخلاقی یێ ئەندامێن کۆنگرێ چاردێ یێ پارتی یە ب ووژدان و بۆ باشتر خزمەتکرنا گەل و وەڵاتی و چەسپاندنا بنەمایێن رێبازا بارزانی و چارەسەرکرنا کێماسی و ئاریشێن ئۆرگان و کادر و رێخستنێن پارتی ، ئەندامێن سەرکردایەتیێ هەلبژێرن، ئەگەر نە، ل هەر کێماسیەکا داهاتی ئەو گۆنەهبارن و پاشان بلا گازندێ ل سەرکردایەتیێ نەکەن .
Comments are closed, but trackbacks and pingbacks are open.