پەیڤدارێ هاتنوچوونا هەولێرێ راگەهاند، دگەل کاراکرنا سیستەمێ نوو یێ مۆلەتا شوفێریێ، سزایێ مولەتا شوفێریێ ژی گۆهڕین ب سەردا هاتیە، ل گۆرەی سیستەمێ نوو پشتی دەربازبوونا مەهەکێ لسەر بسەرڤەچوونا دەمێ مۆلەتا شوفێری، دێ سزایێ نووکرنا مولەتێ بۆ هەر مەهەکێ پێنج هزار دینار بن.
رۆژا چوار شەمبی 21-9-2022، فازڵ حاجی، پەیڤدارێ هاتنو چوونا هەولێرێ راگەهاند: ل گۆرەی سیستەمێ نوو یێ مۆلەتا شووفێریێ، هەر کەسەکێ مۆلەتا وی بسەرڤە چووبیت و نوو نەکربیت، بۆ مەهەکێ دێ لێخوشبوون ژێ گریت و بۆ ئاکنجیێن ژ دەرڤەی باژێری دێ بۆ دوو مەهان لێخوشبوون ژێ گریت، بەلێ پشتی وی دەمێ دیارکری ئەگەر دەمێ بسەرڤەچوونا مولەتا شوفێریێ زێدەتر بیت بۆ هەر مەهەکێ دێ پێنج هزار دینار وەکو سزا بۆ هێنە نڤیسین.
ئاژانسا خانی، لسەر بابەتێ بجهئینانا ڤێ بڕیارێ ل پارێزگەها دهۆکێ، پەیوەندی ب پەیڤدارێ ڕێڤەبەریا گشتی یا هاتنو چوونا پارێزگەها دهۆکێ کر، عەقید ئازاد تاها ژ لایێ خۆ ڤە راگەهاند، تا نوکە چ بڕيارەک بۆ وان ژ وەزارەتێ نەهاتیە و د ئاگەهداری وێ بڕیارا سزایێن مەهانە بۆ نوو نەکرنا مۆلەتا شوفێریێ نینن.
پێشتر تا سالا 2019 هەر کەسەکێ مۆلەتا وی یا شوفێریێ بسەرڤەچووبا بتنێ 15 هزار دینار وەکو سزایێ گیروکرنا نوو کرنا مۆلەتا شوفێریێ ژێ دهاتنە وەرگرتن، پاشی گۆرانکاری بسەردا هات و بۆ هەر سالەکێ 30 هزار دینار دهاتنە وەرگرتن، بەلێ ل گۆرەی گوتنا پەیڤدارێ هاتنو چوونا هەولێرێ ئەو هەردوو شێوازە نەماینە و دێ ل دووڤ شێوازێ نوو کار هێتە بڕێڤەبرن.
Comments are closed, but trackbacks and pingbacks are open.