١. کارەساتا (کەمپا زێوە)
بەری (٣٧) ساڵان و لـ ڕۆژەکا وەکی ئەڤڕۆ، لـ ڕێکەفتی (۹ / ٦ / ۱۹۸٥)ـێ ژمارەکا فڕۆکێن ڕژێما بەعسا ژناڤچووی و سەدامێ گۆڕ بـ گۆڕ، کەمپا (زێوە) لـ ڕۆژهەڵاتێ کوردستانێ بوردومان کر کو پەنابەرێن باشوورێ کوردستانێ تێدا ئاکنجی ببوون، دوێ بوردومانێ دا دماوێ چەند خۆڵەکەکێن کێم ـدا کارەساتەکا خویناوی چێبوو کو پتر ژ (۱٤۰) کەس شەهید و (٤۰۰) کەس ژی بریندار بوون و پرانییا وان ئافرەت و زارۆک و پیر و پەککەفتی بوون. کەمپا زێوە لـ ساڵا (۱۹۸۱)ـێ هەتا دوماهیکا شەڕێ عێراقێ و ئیرانێ چەندین جاران کەفتە بەر هێرش و بوردومانێن فڕۆکێن ڕژێما بەعسا عێراقێ و بـ ڕەنگەکێ هۆڤانە و دڕندانە پیر و پەککەفتی و زارۆک و ئافرەت کەفتنە بەر وان هێرشا، لێ د ڤێ ڕوژێ دا بوردومانەکا جودا بوو ژیێن پێشتر و ژ هەمییا دڕندەتر و جەرگبڕتر بوو، پتر ژ سەدان کەسان شەهید و بریندار بوون.
ـــــــــــــــــــــــــــــــــــــــــــــــــــــــــــــــــــــــــــــ
٢. کارەساتا (ڕۆژا ڕەشا باژێڕێ سلێمانیێ)
بەری (٥٩) ساڵان و دڕۆژەکا وەک ئەڤڕۆدا و لـ ڕێکەفتی (۹ / ٦ / ۱۹٦۳)ـێ، سوپایێ عێراقێ لـ سەردەمێ گۆڕ بـ گۆڕ [عەبدولسەلام عارف]، دەست بـ ھەوێن دەست بسەردا گرتن و دەستەسەرکرنا ھەڕەمەکی یا خەلکێ باژێڕێ سلێمانیێ کر ژ ئەگەرێ شکەستنا سوپایێ عێراقێ لـ بەرامبەری ھێزێن پێشمەرگەی لـ دەربەندیخان.
تاوانبار [زەعیم / سەدیق مستەفا] ڕابوو بـ ئەنجام دانا وێ کارەساتێ و ھزاران خەلکێ بـ ڕوومەت و خودان شەرەف و کوردپەروەرێ باژێڕێ سلێمانیێ بـ ھەڕەمەکی دەستەسەر کرن لـ دویڤدا نێزیکی (١٠٠) کەسێن سڤیل ژوان گرتییا لـ حامیەیا سلێمانیێ گولەباران کرن و شەھید کرن و دویڤداتر تەرمێن وان لـ دۆلەکێ ڤەشارتن کو پشتی ھنگی ئەو دۆل بـ (دۆلا مرنێ) ھاتە نیاسین.
کەس و کارێن وان شەھیدان نەشیان ژبەر دڕندایەتییا ڕژێما وی دەمی یا عێراقێ و سوپایێ خوینڕێژ تەرمێن خۆشتڤیێن خۆ بزڤڕینن، پشتی بوورینا پێنج ڕۆژا ژ شەھید کرنا وان، ژنوی کەس وکارێن وان تەرمێن وان ژ وێ دۆلێ ئینان دەرێ و لـ گۆڕستانا (شێخ موحیەدین) لـ سلێمانیێ ڤەشارتن.
ھەژی گۆتنێ ـیە کوشتنا وان (١٠٠) کەسان ژ ئەگەرێ ھندێ بوو کو ئەفسەرێن ڕژێمێ داخاز ژوان کر ئاخفتنێن کرێت بێژنە ڕێبەرێ کوردان و سەرکردێ شۆڕەشێ [مەڵا مستەفا بارزانی] لـ بەرامبەری ئازادکرنا وان، لێ وان مرن ھەلبژارت و ڕەتکرەڤە کو ئاخفتنا بێژنە بارزانیێ نەمر، لـ دویڤدا زەعیم سەدیق فەرمانا کوشتنا وان دا و بـ ڕەنگەکێ ھۆڤانە و دویر ژ هەر بھایەکێ مرۆڤایەتیێ شەھید کرن.
زەعیم سەدیق مستەفا، ئەفسەرەکێ سوپایێ عێراقێ بوو سەر بـ فرقا سەربازی یا میسل، پۆستێ فەرماندارییا لیوا (٥) پاشی لیوا (٢٠) وەرگرت پشتی کۆدەتایا ساڵا (١٩٦٣)ـێ بـ سەرکردایەتییا [عەبدولسەلام عارف].
تێبینی / پلا (زەعیم) یا وی دەمی لـ بەرامبەری پلا (عەمید) یا نوکەیە.
ھزار سڵاڤ لسەر گیانێ شەھیدێن ڤان ھەردوو کارەساتێن ناخ ھەژین یێن کەمپا زێوە و حامیە یا سلێمانیێ و تەڤایا شەهیدێن ڕێکا ئازادییا کورد و کوردستانێ بن.
سەرشووڕی و شەرمەزاری و شکەستن و ژناڤچوون و نەمان بۆ دوژمن و نەحەزێن گەلێ کورد بن.
ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ
بەر هەڤکرن ملازم وليد نورالدين بوزو هركي
(٩)ـی (٦)ـی (٢٠٢٢)
Comments are closed, but trackbacks and pingbacks are open.