ئەڤڕۆ بیرەوەرییا 75 ساڵییا دەرباز بوونا بارزانی ژ ڕویبارێ (ئاراس) بەرەڤ ئێکەتییا سۆڤیەتی یا بەرێ

ئەڤڕۆ بیرەوەرییا (٧٥) ساڵییا دەرباز بوونا بارزانی یێ نەمر و ھەڤاڵ و پێشمەرگێن وی ـیە ژ ڕویبارێ (ئاراس) بەرەڤ ئێکەتییا سۆڤیەتی یا بەرێ.

بەری (٧٥) ساڵا و لـ ڕۆژەکا وەکی ئەڤڕۆ، لـ ڕێکەفتی (١٨ / ٠٦ / ١٩٤٧)ـێ، پشتی ژناڤچوونا کۆمارا مھاباد لـ ڕۆژھەلاتێ کوردستانێ و خۆبدەستڤە نەبەردان بۆ ئیرادەیا دوژمنی، بارزانی و ھەڤاڵێن وی سەلماند کو چ ھێزەک نەشێت ڕێکێ لـ ئیرادەیا ملەتەکی بگریت کو دڤێت ئازاد و سەربخۆ بیت و قەوارە و بڕیار و ئاخ و ئاڵا و وەڵاتێ خۆ ھەبیت.

پشتی خاتر خاستنا بارزانی و پێشمەرگە و ھەڤالێن وی لـ کەس و کار و خۆشتڤیێن خۆ لـ چەمێ (گادەر) لـ سێگۆشەیا سنوورێ ناڤبەرا عێراق، تورکیا و ئیرانێ، ڕێکا مان و نەمانێ و ھات و نەھاتێ ھەلبژارت، دڤیا سنوورێ چار دەولەتان ببڕن و دگەل ھەر ھێزەکێ ڕوی بـ ڕوی ببن کو بڤێت ڕێگریێ لێبکەت.

پشتی کۆمبوونێ دگەل [شێخ ئەحمەدێ بارزانی]، گەھشتنە ئەنجامی، بارزانیێ نەمر زۆر بـ ھویری و حەکیمانە ئەو بڕیار دا دگەل ھەڤالێن خۆ بەرەف ئێکەتییا سۆڤیەتی یا وی دەمی بـ ڕێ کەڤیت، وی باش دزانی کو ڕێک گەلەکا بـ زەحمەتە و گەلەک ئاستەنگ دێ کەڤنە دڕێکا وان ـدا، دڤیا زێدەتر ژ (٤٠٠) میلا ببڕن و نێزیکی (٦٠) ڕۆژا بـ ڕێکێ ـڤە بن، و دڤێت سەرکێشییا (٥٠٣) ھەڤال و پێشمەرگێن خۆ بکەت ھەتا دگەھینیتە کەنارێ سەرفەرازیێ.

چوون بەرەڤ ئێکەتییا سۆڤیەتی، بۆ بارزانی یێ نەمر چار ڕەوشێن پڕ ئازار و بـ زەحمەت بوون، ئەوژی:
ـ ژناڤچوونا کۆمارێ و دەستەسەرکرنا پێشەوا [قازی موحەمەد].
ـ ڤەگەڕیانا [شێخ ئەحمەدێ بارزانی] و کەس و کار و خێزان و ماڵباتا وی بۆ عێراقێ.
ـ بـ ڕێ کەفتن بەرەف ئێکەتییا سۆڤیەتی بەرەف چارەنڤیسەکێ نەدیار.
ـ دەرباز کرنا (٥٠٣) پێشمەرگا ژ ڕویبارێ ئاراس.
ئەڤ چار بابەتە، ھەرچەندە گەلەک بـ ئازار و بـ زەحمەت بوون، لێ بارزانی دزانی کو ئەگەر بسەر وان ـدا سەرکەفت، ئەوە دێ بنە جھێ گرنگیێ و مفای بۆ ملەتێ کورد و دۆزا وی و دێ ئەنجامێن باش ژێ پەیدا بن.

ژ چەمێ گادەر بەرەف دەڤەڕا بارزان و لـ شێروانا مەزن ژ ڕویبارێ (چامە) بەرەف باکوورێ کوردستانێ و دەرباز کرنا چیایێن چارچەل و گۆڤەند و گەلیێ کۆتۆل و چەندین دۆل و نھاڵا، کو ھەمی بـ بەفرێ ھاتبوونە داپۆشین و دڤیا بارزانی بسەردا سەرکەڤیت دگەل (٥٠٣) پێشمەرگا بگەھنە ڕویبارێ ئاراس و ژ ڕویبارێ دەرباز بن.. لـ ڕێکێ لـ دەڤەڕێن سنوورێ ناڤبەرا عێراقێ، تورکیا و ئیرانێ ھەتا دگەھیتە دەڤەڕێن سنووری ین ناڤبەرا تورکیا و ئێکەتییا سۆڤیەتی، لـ گەلەک دەڤەڕا ژبلی ھندێ کو ھاریکارییا وان نەھاتە کرن، بەلکو شەڕژی دگەل دکر و ڕێگری ـژی لـ کاروانێ بارزانی و ھەڤالێن وی دکر، لێ دڤێت وێ چەندێ ـژی بێژین کو لـ ھندەک جھا نان و ئاڤ ددایێ و پێشوازییا وان دکر.

گەلەک ژ ھەڤالێن بارزانی لـ ڕێکێ بریندار بوون، (١١) پێشمەرگە شەھید بوون و گەلەک ژی نەساخ بوون، لێ چ تشتەک نەشیا وی کاروانی ڕاوەستینیت. ژبەرکو بارزانی ـژی خەونەکا مەخن ھەبوو شیا سەرکاروانییا ھەڤالێن خۆ بکەت و بـ سەلامەتی بگەھینیتە کەنارێ ئاشتیێ و ئارامیێ. پشتی (٥٧) ڕۆژا بارخانی و ھەڤالێن خۆ گەھشتنە ڕویبارێ ئاراس، (٥٠٣) پێشمەرگێن ماندی، برسی و تێھنی، نەساخ، لێ گەلەک بـ ھێز لـ ئیرادە و بیروباوەڕ بـ بارزانی و ڕێبازا وی.

گەھشتنا بارزانی و ھەڤالێن وی بۆ سەر ڕویبارێ ئاراس و دەرباز بوونا وان، دربەکا کوژەک بوو بۆ دلێ دوژمن و نەیارێن دۆزا ملەتێ کورد، دھەمان دەم ـدا خۆشی و ھێز دا ملەتێ کورد و نیشتمانی.

پیرەمێردێ شاعر دشعرەکێ ـدا بۆ دەرباز بوونا بارزانی و ھەڤالێن وی دبێژیت:
عەشرەت هەوارە عەشرەت هاوارە کەوتومە ئاراس ئاو بێ بوارە پێم نیە منیش شوێن ئەوان کەوم هەنگاوێک بنێم پیرم ئەکەوم لێرەش وا کەوتووم بەدەم دەردەوە لە ئێشی دووری و ئاهی سەردەوە بەڵکەم بە ئاهم دەوران وەرگەڕێ یا وا وەرگەڕێ ئێڵم سەرکەوێ با زرمەی تۆپی زەڕی بەرکەوی ئەوسا دووعای من وا گیراو دەبێ لە خانەی خاکا ئاواتم نابێ ئینجا تەلقینم بدەن بە کوردی بڵێن ئاواتت هاتە دی مردی…

چ شێخ ئەحمەدێ بارزانی و چ ئەو ھەڤال و پێشمەرگێن کو دگەل ـدا بوون، چ مالبات و ملەتێ وی، ھەمییا باوەڕییا تەمام بـ بارزانی ھەبوو کو دێ لـ ئاست بەرپرسیاریەتیێ ـدا بیت و پەیام و دۆزا ملەتێ کورد دێ گەھینیتە قۆناغەکا بلند و دێ بـ سەربلندی زڤریت، لـ دوماھیێ ھەر وەکر و ئەنجام ژی ھەر وسا دەرچوون.

دڤێ بیرەورەیێ دا:
ھزار لـ گیانێ سەرور و ڕێبەرێ کوردان [بارزانی یێ نەمر] بن، ئەو سەرکردەیێ ھەمی ژیانا خۆ تەرخان کری ژ بۆ ئازادی و سەربخۆیی و سەرفەرازییا گەل و وەڵاتێ خۆ.
ھزار سڵاڤ لـ گیانێ ھەڤال و یاوەر و پێشمەرگێن بارزانیێ نەمر ئەوێن ڕێکا مان و نەمانێ و، ھات و نەھاتێ گرتی و چارەنڤیسەکێ نەدیار و مەترسیدار ھەلبژارتی، لێ چۆک بۆ دوژمنا نەدانای و یاوەرییا بارزانی کر و خەبات کر ژ پێخەمەتی بدەستڤەئینانا مافێن گەلێ کورد.
ھزار سلاڤ لسەر گیانێ شەھیدێن ڕێکا بزاڤا ڕزگاری و ئازادیخوازییا کورد و کوردستانێ بن
شکەستن و نەمان بۆ دوژمن و نەحەزێن ملەتێ کورد

بەرهەڤکرن ، سەلاح سندی

زێ بادینان