جۆ بایدن، سەرۆکێ ئەمریکا راگەهاند، د وێ باوەریێ دایە ڤلادیمێر پوتین، سەرۆکێ رۆسیا بریارا داگیرکرنا ئۆکرانیا دابیت.
جۆ بایدنی ئاماژە کریە، ئەو هێزێن رۆسیا پشتەڤانیێ لێ دکەت یێ ئاگربەستێ ژناڤ دبەن و یێ تومەتا هێرشێن لسەر دۆنباس هاتینە نە کرن، د ئێخیتە ستویێ ئۆکرانیا.
سەرۆکێ ئەمریکا دوپاتکر، رۆسیا بشوەکێ جددی بزاڤێن چاواشەکاری دەستپێکرینە، د نوکە دا ل سنوورێ ئۆکرانیا و بیلارۆس و دەریایێ رەش دا 150 هزار لەشکەر بەلاڤکرینە، لەورا ئەمریکا د وێ باوەرێ دایە د چەند حەفتیێن داهاتی دا رۆسیا دێ هێرشێ کەت و دێ پایتەختێ ئۆکرانیا”کیڤ” کەتە ئارامنج، یێ کۆ دوو ملیون و 800 هزار کەسێن بێ گونەهــ تێدا دژین، لەورا ئەگەر رۆسیا پلانا خوە بجهبینیت دێ کارەساتێن مرۆڤی درست کەت.
بایدنی دوپاتکر، دڤی دەمی دا رۆسیا بەرپرسیارەتیا هێرشا لسەر باخچێ زارۆکان ل دۆنباس دئێخیتە ستویێ ئۆکرانیا و دبێژیت وان خوە بۆ ئەنجامدانا هێرشێن مەزنتر ئامادەکریە.
سەرۆکێ ویلایەتێن ئیکگرتی یێن ئەمریکا دیارکر، ژ پێخەمەت رێگری کرن ل بزاڤێن رۆسیا بۆ داگیرکرنا ئۆکرانیا هەر تشتەکێ ژ دەستێن وان هاتتبیت یێ کری، ئەگەر رۆسیا پلانا خوە بجهبینیت دێ کارەساتان ل دووڤ خوە ئینیت، لەورا ئەمریکا و هەڤپەیمانێن خوە د ئامادەنە پارێزگاریێ ژ هەر بهوستەکا ئاخا ناتۆ بکەن.
جۆ بایدنی گوت: هێزا لەشکەری نا هنێرینە ئۆکرانیا بەلێ دێ بەردەوامیێ ب هەڤکاری و پشتەڤانیێ ئوکرانیا دەین، وەلاتێن رۆژئاڤا ژی د ئێک دەنگن و د رژدن سزایێن دژوار لسەر رۆسیا بسەپینن.
Comments are closed, but trackbacks and pingbacks are open.