ده‌سته‌یا دادوه‌رى یا بلند دوماهى ئامارێن حاله‌تێن ژێكجودابوونێ ل عیراقێ به‌لاڤكرن و تێدا هاتییه، بتنێ د ده‌مێ هه‌یڤه‌كێ دا نێزیكى 5 هزار حاله‌تێن ژێكجودابوونێ ل عیراقێ هاتینه تۆماركرن.
ل دویڤ ئامارێن ده‌سته‌یا دادوه‌رى، ل هه‌یڤا ته‌مووزا بوورى نێزیكى 25 هزار حاله‌تێن هه‌ڤژینییێ هاتینه تۆماركرن، د به‌رامبه‌ردا 4 هزار و 827 حاله‌تێن جودابوونێ هاتینه تۆماركرن.
دیار ژى كریه، ده‌ڤه‌را ره‌سافه یا سه‌ر ب پارێزگه‌ها به‌غداڤه ل رێزا ئێكێ دهێت و بتنێ د هه‌یڤا ته‌مووزێ دا 596 حاله‌تێن جودابوونێ ل دادگه‌هان هاتینه تۆماركرن.
ده‌ڤه‌را كه‌رخ ل پارێزگه‌ها به‌غدا ژى ل رێزا دووێ دهێت كۆ 522 حاله‌ت و پارێزگه‌ها موسل ژى ل رێزا سییێ دهێت كۆ 180 حاله‌تێن جودابوونێ لێ هاتینه تۆماركرن.
ئاشكه‌را ژى كرییه، كۆیا گشتى یا حاله‌تێن ژێكجودابوونێ د ده‌مێ هه‌یڤه‌كێ دا گه‌هشتییه 4 هزار و 827 حاله‌تان، كۆ ئاماره‌كا گه‌له‌ك مه‌ترسیداره.
ڤه‌كۆله‌ر جڤاكى ئه‌گه‌رێن ژێكجودابوونا هه‌ڤژینان بۆ خرابییا ره‌وشا ئابوورى و فشارێن ده‌رونى ڤه‌دگه‌رینن.
Comments are closed, but trackbacks and pingbacks are open.