سه‌رۆكێ نوينه‌رايه‌تيا حكومه‌تا هه‌رێما كوردستانێ ل به‌غدا ئه‌ڤرۆ سێشه‌مبيێ راگه‌هاند كو حكومه‌تا ئيراقێ بڕيار دايه تا 20 رۆژێن دى گازا سپى بۆ هه‌رێما كوردستانێ بهنێريت.
فارس عيسا بۆ فه‌رمانگه‌ها ميديا و زانيارى راگه‌هاند؛ ل گۆره‌ى رێككه‌فتنا هه‌ولێر و به‌غدا، پێدڤيه تا 20 رۆژێن دى پشكا گازى سپى ژ به‌غدا بگه‌هيته هه‌رێما كوردستانێ و ئه‌ڤ پرۆسێسه دێ ژ 15ى ڤێ هه‌يڤێ ده‌ستپێكه‌ت.
ئاشكرا ژى كر؛ ل سه‌ر راسپارده‌يا سه‌رۆكێ حكومه‌تا هه‌رێما كوردستانێ، ئه‌و ل 20ى ئيلۆنا بۆرى ل گه‌ل هه‌ر ئێك ژ ئيحسان عه‌بدولجه‌بار وه‌زيرێ په‌ترۆلێ يێ ئيراقێ و د. حامد يوونس زه‌وبه‌عى بريكارێ وه‌زاره‌تێ كۆمبوويه كو ل گۆره‌ى وێ حكومه‌تا هه‌رێما كوردستانێ دێ برێ 257 مليۆن و 500 هزار لترێن گازا سپى ژ حكومه‌تا فيدرالى كڕيت و بۆ هه‌ر خێزانه‌كا هه‌رێما كوردستانێ دێ 200 لتر هێنه دابينكرن.
ل گۆره‌ى داتايێن حكومه‌تا هه‌رێما كوردستانێ؛ ژ به‌رى نوكه ب بهايێ بازرگانى گازا سپى ژ به‌غدا ب هه‌رێما كوردستانێ دهاته دان ئانكۆ بۆ هه‌ر لتره‌كێ 400 دينار دهاتنه وه‌رگرتن، لێ د كۆمبوونا سه‌رۆكوه‌زيرێن هه‌رێمێ و ئيراقێ دا رێككه‌فتن هاتيه كرن كو بۆ هه‌ر لتره‌كێ 150 دينار بهێنه وه‌رگرتن و بجهئينانا ڤێ چه‌ندێ ل سه‌ر به‌غدا دراوه‌ستيت.
حكومه‌تێ ديار ژى كريه؛ ل سالا 2021 ژى ل سه‌ر هه‌مان بڕ رێككه‌فتن هاتبوو كرن، لێ حكومه‌تا فيدرالى سه‌ره‌راى وه‌رگرتنا پاره‌ى، گازا سپى ژى ب دروستى نه‌هنارت و ب تنێ 10 مليۆن لتر بۆ هه‌رێما كوردستانێ ڤرێكرن و د نوكه دا 9 مليار و 268 مليۆن دينارێن هه‌رێما كوردستانێ ل ده‌ف وه‌زاره‌تا په‌ترۆلێ يا ئيراقێ نه.
د. كه‌مال محه‌مه‌د وه‌زیرێ سامانێن سروشتى یێ حكومه‌تا هه‌رێما كوردستانێ د ده‌مه‌كێ دى دا ژ ئه‌ڤرۆ راگه‌هاند بوو كو ل 20ى ڤێ مه‌هێ دێ ده‌ست ب به‌لاڤكرنا گازا سپى ب سه‌ر مالان دا هێته كرن و ل قووناغا ئێكێ دێ ل ده‌ڤه‌رێن چیایى بیت.
ئاشكراكر ژى كربوو كو پاره‌یێ 320 هزار به‌رمیلان هاتیه دابینكرن و گرێبه‌ست ژى هاتیه كرن و ل قووناغا ئێكێ دێ ل ناوچه و ده‌ڤه‌رێن چیایى و وان جهان هێنه به‌لاڤكرن یێن پار گازا سپى وه‌رنه‌گرتین
Comments are closed, but trackbacks and pingbacks are open.