زەنون سلێڤانەی
كوردان گەلەك دەردەسەری ددەستێن حكومەتێن سەردەستدا برینە سەر، حكومەتا عیراقێ ل سەر دەستێ رژێما بەعسا ژناڤچووی ژی باشترین نمونە بوو، ئەڤێن دناڤ دا نەژیابن یا گولێ بووی یان ئەڤێن دناڤدا ژیایێن ب چاڤێن خوە یا دیتی و پێدڤییە ئەم ھەمی چ بچیك و چ مەزن وان رۆژان ژبیرنەكەین دەما رەئیس عورەفایەكێ ئەمنێ دشیا باژێری تێك ب شلقینیت و دەھان زێدەگاڤییان بكەت، سڤكاتییا ب گەنجان، سەرا ریھـ بەردانێ و كرنا بەرا جل و بەرگێن كوردی.
مە ھەمیان چ ئەڤێن دوی دەمیدا ژیاین یان ئەوێن پشتی ھینگێ، ھەمی خەون و بزاڤێن مە ئەو بوون ئەو زورداری و سڤكاتی ل سەر گەلێ مە یێ كورد رابن، خەلك ھەست نەكەت ئەو ژ كەسەكێ دی كێمترە، ھاولاتیبوون دناڤبەرا ھەمی تاكێن كومەلگەھێدا ھەبیت بێ جوداھییا رەگەزی و ئاینی و نەتەوەیی. نابیت ب بەھنا حزباتیێ یان ئاینی جوداھیێ د رەفتاركرنێ و مامەلەكرنێ دا ھەبیت بەلكو دڤێت ھەمی ھاولاتی د یەكسان بن.
یا من دڤێت بێژم ئەگەر لدەمەكێ سڤكاتییا ب گەنجێن كورد ژ لایێ رەئیس عورەفایەكێ ئەمنێ ڤە بوو و ژبەر بەردانا ریھان و كرنا جل و برەگان سڤكاتی بێھاتبایە كرنێ، دڤێت ئەڤرو ئەم گەنجێ خوە بلند رابگرین و ھەیبەتا وی بلند بكەین، گەنج نە بتنێ ھێزە، لێ ئەوە مللەتان رادگریت و پێشكەفتنێ پەیدا دكەت.
دڤێت ژیانا وان خوش بكەین، كاری بۆ پەیدا بكەین و ژبەركو ژیانا نەخوش و ئایندێ نەدیار و بێكاری ھەمی ژی جورە سڤكاتیینە ب گەنجی دھێتە كرنێ و باوەرناكەم جوداھی دگەل ئەوا مە گوتیدا ھەبیت بتنێ شێواز و دەم ھاتینە گوھورین. دڤێت پێكڤە كاری بكەین ل سەر راگرتنا سڤكاتیێ و بێبھاكرنا گەنجان.
Comments are closed, but trackbacks and pingbacks are open.