نایف مەحمود
ڕەخنەگرتن ئێک ژ بنەمایێن پێشڤەچون و هشیارکرنا هەمی کومەلگەهانە، پتریا وەلات و دەولەتێن پێشکەفتی ل سەر بنەمایێ ڕەخنێ و قەبولکرنا ڕەخنێ بەرەف پێش چوینە. یا خویایە کو دوو جورێن ڕەخنەگرتنێ هەنە ئەوژی یا ئاڤاکەر(ئەرێنیpositive) و یا خرابکەر ئانکو (نەرێنیnegative)، ڕەخنا ئەرێنی ئەوە یا کو شاشی بهێنە راستڤەکرن و کێماسی بهێنە دەست نیشان کرن، داکو لێ زڤرین هەبیت بو درست کرنا وان شاشیان و پێداچونەکێ د کارو کریار و نڤێسین و پلان و بەرنامێن خوە دا بکەن مفای ژ ئەزمون و سەربورا ڕەخنەگرتنێ وەربگرن. لایەنێ بەرپرسیار ڤێجار چ ل سەر ئاستێ تاکەکەسی بیت یان بگەهیتە لایەنێ حکومەتێ و دام و دەزگایێن میری دهەمی سێکتەران دا، ژبو وێ یەکێ ئەڤ ڕەخنە گرتنا ئەرێنی و پوزەتیڤ ببیتە خەلەکا پێکڤەگرێدنا پەیوەندیان دناڤبەرا ڕەخنەگر و حکومەتێ دا یا کو مە پێ مەبەست ب تایبەتی، چونکی ئەڤ جورێ ڕەخنێ ژ مروڤێن دلسوز دەست پێ دکەت داکو مللەتی ئاراستە بکەن ژ پێشڤەتر ب حکمێ هندێ کو ئەو خوە بەشەک دبینن د هەر لاوازی و پاشڤەمانا د وەلاتیدا هەی، لەورا ب وژدان و باوەری دکەڤنە بەروکێ رەخنەگرتنا ئاڤاکەر. بڤێ پرا پەیوەندیان یا کو دناڤبەرا ڕەخنەگرو لایەنێ دکەڤیتە بەر ڕەخنێ هیڤیەک چێدبیت دگەهیتە ئاستێ وێ باوەریێ کو کێماسی و شاشی بهێنە راستڤەکرن گورەی وێ راستیا دهێتە سەلماندن، ئەگەر ئەڤ جورێ ڕەخناگرتنا ئەرێنی و پوزەتیڤ و ئاڤاکەر تا رادەیەکی یا زڤر ژی بیت یانژی یا سورو سور ژی بیت هەلبەت دێ پێشوازی لێ هێتە کرن و دبیت ئارمانجا خوژی پێک بینیت، چونکی ئەڤ شێواز و مژارا ئەم باس ل سەر دکەین ڕەنگڤەدانا کومەلگەهەکێ هشیار و ئازا و رەوشەنبیرە ب حکمێ وێ یەکێ ئەو فەزایێ ئازادێ بو هاتیە رەخساندن ژلایێ دەستهەلات و حکومەتێ ڤە. بەروڤاژی ڕەخنا نەرێنی و وێرانکەر ژی ئەڤرو بویە هوکارێ تێکدانا سەقامگیریا هەرێما کوردستانێ و فاکتەرەکێ سەرەکیێ نە ئارامیا سیاسیە و بەلکی هوکار ژی بویە بو دوژمنکاریێ و توندڕەوی و نەڤیان وکەرب کیێنێ، ب داخ مخابنی ڤە کو خزمەتا پێشڤەچونا بیاڤێ ڕەخنە گرتنێ ناکەت، گرنگە ئەم خوە ب خودانێن چارەسەریێ ببیین و ببینە بەشەک ژ بەرفرەهکرنا بنەمایێن ڕەخنەگرتنا ئەرێنی، نەکو تشتەک بو بەرژەوەندا مروڤی بتنێ یانژی پارتا مروڤی نەبیت هینگێ بکەڤیتە د چەبەرێ عینادێ و نەڤیانێ دا بەرامبەر حکومەتێ یان ژی لایەنێن پەیوەندیدار، خزمەتا گشتی و بەرژەوندیێن ملەتی ژ هەر تشتەکی پێدڤی ترن کو ڕەخنێ لێ بگرین بشێوازەکێ جوان و ئەرێنی، ب مەرەما ڕەخنا ئاڤاکەر هینگێ دێ کارین گوهرینان پەیداکەین و وەلاتێ خو بەرەف ئاسویەکێ گش ڤە بەین.
- دکاری هەموو بابەتێن خۆ ببینی…
Comments are closed, but trackbacks and pingbacks are open.