بچووکترین شەھیدێ پێشمەرگە بوو دشەڕێ تیرۆرستێن داعش دا

• زێ بادینان ، سەلاح جەمیل سندی:

وەلات عەبدولکەریم
بچووکترین شەھیدێ پێشمەرگە بوو دشەڕێ تیرۆرستێن داعشدا ل سنوورێ قەزا زاخۆ

شەھیدێ نەمر ( وەلات عەبدولکەریم یوسف) ل بەروارا ( ٣/٦/ ١٩٩٧)ێ ل گوندێ ( پلێسیێ) ل دەڤەرا (دێرکا حەمکو ) ل قەزا ( قامشلۆ ) ل کوردستانا رۆژئاڤا ژ مالباتەکا ھەژار و کوردپەروەر چاڤێن خوە ب دیمەنێن جوان و ڕەنگینێن کوردستانێ ڤەدکەت و ھەر د گوندێ خۆ دا دچیتە خواندنگەھێ و ھەتا قوناغا پێنجێ بنەرەتیێ ( سەرەتاییێ ) تەمام دکەت و جھێ شانازییێ یە، کو شەھیدێ نەمر قوتابیەکێ زۆر ھوشیار و زیرەک بوویە ژبەرکو ھەر ژ پۆلا ئێکێ ھەتاکو پۆلا پێنجێ بنەرەتی ب پلێن باش دەرچوویە بەلێ ژبەر ھەژاری و دەست کورتیا خێزانا خۆ دەست ژ خواندنا خۆ بەرددەت و ناچار دبیت دگەل خێزانا خۆ ل سالا ( ٢٠٠٤ ) بچیتە باژێرێ شامێ ( دیمەشق )ێ و دگەل باب و ھەردوو برایێن خۆ ژبۆ نان پەیداکرن و بژێوییا خێزانا خۆ پالە و کرێکاریێ بکەت. لێ ژبەر کاودانێن سیاسی یێن سالا ( ٢٠١٢)ێ ل سووریێ خێزانا شەھیدی جارەکا دن دزڤرنە دەڤەرا خۆ ( دێرکا حەمکو ) ل قەزا قامشلۆ، لێ وێرێ ژی دبینن کاودانێن دەڤەرا وان ھێدی ھێدی بەرەڤ ئالۆزییێ ڤەدچن و خێزانا شەھیدی بریارێ ددەن ب ئێکجاری کوردستانا رۆژئاڤا ب جە ب ھێلن و بەرەڤ ھەرێما کوردستانێ ب ئێن و ل کەمپا ( دومیز ) ل دھۆکێ بۆ ماوێ بیست رۆژان بنەجە دبن و پاشنێ دئێنە باژێرێ زاخۆ و ھەتا نھۆ ژی ل وێرێ ئاکنجینە.
بابێ شەھیدی بڤی ڕەنگی دبێژیت: ( ھەر ژ دەستپێکا ھاتنا مە بۆ کوردستانێ من دڤیا بمە پێشمەرگە دناڤ رێزێن پێشمەرگەیێ کوردستانێ دا لێ ژبەر چەند ھۆیەکان من نەشیا خۆ ناڤنڤێس بکەم لێ پشتی ھاتنا تیرۆرستێن داعش و گرتنا ھندەک دەڤەرێن کوردستانێ و دروست بوونا پێشمەرگەیێن رۆژ کوڕێ من زۆری ل من کر و گۆت ئیلەە ئەز دێ بمە پێشمەرگە، لێ ھندی ئەز ما مە ب پێڤە و من گۆتێ ھێشتا ژییێ تە ییێ بچووکە ئەز دێ چم گۆتی نە ئیلەە ئەز دێ بمە پێشمەرگە و بەرەڤانیێ ژ ئاخا خۆ کەم من ژی گۆتێ پا بلا ب کەیفا تەیە ). ئەو بوو شەھیدێ نەمر و چاڤنەترس دژیێ ھەڤدە سالییێ دا ل بەروارا ( ١٥/١٠ / ٢٠١٤)ێ دگەل فەرماندێ رۆژ عەقید ( جەلال شەرنەخی ) تەڤلی ناڤ رێزێن پێشمەرگەیێ رۆژ دبیت و بۆ ماوێ دوو مھان ل فێرگەھا ( بنەسلاوا ) ل پارێزگەھا ھەولێرێ مەشق و راھێنانێن سەربازی دکەت و پاشنێ دچیتە چەپەرێن پێشیێ یێن شەڕی ل گوندێ ( خرائج ) ل ناڤبەینا قەزا شنگال و تەلەحفەرێ ل وێرێ بۆ ماوێ ھەیڤەکێ د ئەرکێ خۆ یێ خەبات و بەرەڤانیێ دا بوو، لێ ژ نشکەکێڤە د سپێدەھیا زووییا رۆژا( ٧/١/٢٠١٥)ێ دا تیرۆرستێن دڕندە یێن داعش ب ترۆمبێلێن بۆمبەکری ھێرشەکا ھۆڤانە دکەنە سەر بارەگایێ وان د خواندنگەھا گوندی دا و پشتی شەڕ و پەڤچوونەکا سەخت و گران تیرۆرستێن داعش ترۆمبێلەکا بۆمبەکری ب بارەگا و خواندنگەھا گوندی ڤە دپەقینن و ژ ئەنجامێ وێ پەقینێ شەھیدێ نەمر ب گرانی و دژواری بریندار دبیت و پشتی ڤەدگوھێزنە نەخۆشخانا ئازادی و پاشنێ نەخۆشخانا ڤین یا تایبەت ل دھۆکێ، لێ بمخابنیڤە شەھیدێ نەمر ژبەر گرانی و سەختییا برینا خۆ ل رۆژا ئەینیێ و ل بەروارا ( ١٦/ ١/ ٢٠١٥)ێ ل نەخۆشخانا ڤین دچیتە بەردلوڤانیا خودێ و دگەھیتە کاروانێ ھەردەمێ نەمران و ب ئەڤێ ژی گیانێ شەھیدی دبیتە ستێرەکا گەش و پریسقەدار ل ئەسمانێ جوانێ کوردستانێ و ھەروەسان ژی خێزان و مالباتا شەھیدی بریارێ ددەن کوڕێ خۆ ل ھەرێما کوردستانێ و ل باژێرێ زاخۆ و ل گۆرستانا تلکەبەرێ ب ڤەشێرن و ناڤێ شەھیدی ژی وەکو بچووکترین شەھیدێ پێشمەرگە دشەڕێ تیرۆرستێن داعشدا ل رێڤەبەریا کاروبارێن شەھید و ئەنفالکریان ل زاخۆ ھاتیە دیارکرن و تۆمارکرن.
ھەژییە بێژن ژی شەھیدی وەلات گەنجەکێ زۆر زیرەک و خودان ھەستەکێ نیشتمانی و نەتەوایەتی و پێشمەرگەیەکێ زۆر بوێر و چاڤنەترس بوویە و ھەر د ژییێ گەنجاتیا خۆدا خوە ژبۆ خزمەتکرنا بیروباوەر و ئارمانجێن ڕاست و پیرۆزێن رێبازا کوردایەتیێ تەرخان کربوو و ھیچ تشتەکێ نەشیا رێگری و ھزرا ڤی گەنجی بگۆھۆریت و ژ خەبات و تێکۆشین و پێشمەرگایەتێ سار بکەتەڤە بەلکو ھەردەم ب ئیرادە و ورەیەکا بلند و لسەر رێبازا کوردینیێ درێژی ب خەباتێ دپێناڤێ ئازادی و سەربلندییا گەل و رزگارکرنا ئاخا پیرۆزا کوردستانێ ددا و بوویە نموونەیەکێ جوان ژ گەنجێن خۆگۆریکەرێن کوردستانێ لەوما ژی بابێ شەھیدی دبێژیت ئەم وەکو خێزان و مالباتا شەھیدی شانازییێ ب خەبات و شەھیدبوونا کوڕێ خۆ دکەین و پەیمانێ ددەن ل سەر رێبازا کورد و کوردینیێ ھەردەم د بەرژەوندییێن گەل و وەلاتێ خۆ دا بین و نھۆ ژی ئەز و دوو کوڕێن خۆ بناڤێ ( سالار و مەتین ) پێشمەرگەنە ل ھێزا ئێک ل بەتالیوونا سێ دناڤ رێزێن پێشمەرگەیێ رۆژدا و درێژی ب خەبات و رێبازا پیرۆزا کوڕێ خۆ ددەین.