- زێ بادینان
ب ھزاران تڕۆمبێلێن بێ تابلۆ ( توز و با) ل ھەرێما کوردستان ھەنە و بەرپرسەکێ ھاتن وچوونێ ژی ئاشکراکر، پلان ھەیە ھەموو تڕۆمبێلێن بێ تابلۆ بھێنە تۆمارکرن و تابلۆ بۆ بھێتە گرێدان ئەوژی پشتی بڕیارا بەغدا بۆ تۆمارکرنا ئەڤان تڕۆمبێلێن توزوبا.
عەمید ئەسعەد مەلا کەریم، پەیڤدارێ ھاتن وچوونا ھەرێما کوردستانێ بۆ ئاژانسا خانی دیارکر” ھژمارەکا زۆرا تڕۆمبێلێن بێ تابلۆ ل ھەرێما کوردستانێ ھەنە و دناڤا خەلکی دا ب تڕۆمبێلێن توزبا دھێنە نیاسین، بەری نوکە وەزارەتا نافخۆ بڕیاردا زانیاری ل دۆر ھەموو تڕۆمبێلێن توزوبا بھێنە کۆم کرن و ب رێیا تژیکرنا فۆڕمەکێ زێدەتری ١٩ ھزار تڕۆمبێل ھاتینە تۆمارکرن، بەلێ ھژمارەکا زۆرا وان تڕۆمبێلان ھەنە و نەھاتینە تۆمارکرن ل رێڤەبەرایەتیێن ھاتن وچوونێ، تۆمارکرنا وان تڕۆمبێلان تنێ بۆ مەرەما کۆمکرنا زانیاریان بوویە.
عەمید ئەسعەد مەلا کەریم ئاماژەکر” نوکە رێڤەبەرایەتیا گشتیا ھاتن وچوونێ مژۆلی دیتنا چارەسەرێ یە بۆ تڕۆمبێلێن بێ تابلۆ، چونکە ھاتن وچوونا ئیراقێ بڕیاردایە ھەموو تڕۆمبێلێن توزوبا بھێنە بناڤکرن و تۆمارکرن، ئەم ژی د چوارچوڤێ ئیراقێ داینە، هه‌كه ئەو تۆمار بکەن، ئەڤە ھەرێما کوردستانێ ژی دێ بڕیارێ دەت تڕۆمبێلێن توزوبا بھێنە تۆمارکرن و بناڤێ خەلکی بھێنەکرن.
Comments are closed, but trackbacks and pingbacks are open.