غیاس خالد زێباری
مەها ئادارێ ب مەها کوردا دهێتە نیاسین ، ل دەستپێکێ هەتا داویێ هەمی بیرەوەریێن روودانێن تاڵ و شرینن ، هندەک بیرهاتن د خەمگینن و رووندک ل ساڵڤەگەڕێن وان دهێنە بارین مینا وەغەرا ڕێبەرێ مەزن و بابێ دیرۆکی و کنیاتیێ نەتەوا کورد مەلا مستەفای بارزانی ل ١/٣/١٩٧٩ ، یان بیرەوەریا پیلانا خیانەتکاریا جزائر ئەوا ئۆمێدا کوردا بۆ ئازادیێ و ڕزگاریێ و پێکڤە ژیانا گەلێن ئیراقێ ژناڤ بری ل ٦/٣/١٩٧٥ ، یان کارەساتا کیمیا بارانکرنا باژارێ هەلەبچە یا جەرک پڕ و وژدان هەژین ئەوا هەمی یاسا و ڕێسا و ڕەوشت و بنەمایێن مرۆڤایەتیێ بەزاندی و (٥٠٠٠) وەڵاتیێن سڤیل بێ گۆنەهــ شەهید کری ، یان ژی سێدارەدانا پێشەوا قازی محەممەد ئێکەم سەرۆک کۆمارێ کوردستانێ ، ئەو کۆمارا بوویە فاکتەرێ بهێزبوونا هەست و هزرێن نەتەوی و نشتیمانی و گەهاندنا حەز و ڤیانا کوردستانیا بۆ سەرخۆبوونێ ل ٣١/٣/١٩٤٧ ، هەر وەها کۆچا مەلیونیا خەلکێ باشوورێ ل رۆژێن داویا ئادارا سالا ١٩٩١ ئەو کۆچا وژدانا مرۆڤایەتیێ هەژاندی و وەڵاتێن مرۆڤ دۆست و مرۆڤ پەروەر نەچار کری خەلکێ کوردستانێ ب پارێزن بەری هەمیا وەڵاتێ فەڕەنسا و …..هتد
بیرهاتنێن گەش و خۆش ژی ب هەمان شێوە د زۆرن چ جەژن و سەرکەفتن بن وەکی جەژنا نەورۆزا نەتەوی و سەرساڵا نوی یان سەرکەفتنا شۆڕەشا مەزنا ئیلۆنا نشتیمانی بسەر رژێما ئیراقێ کۆ ڕێکەفتنا ١١ ێ ئادارا ساڵا ١٩٧٠ لێ بەرهەم هات ، ئەو سەرکەفتنا ب ڕەنگەکێ فەرمی دانپێدان ب پشکەکا زۆرا مافێن گەلێ کورد هاتیە کرن کۆ ئۆتۆنۆمی بوو ، یان ژی بەڕپابوونا شۆڕەشا شێخ سەعیدێ پیران ل ٧/٣/١٩٢٥ و ئێکەم شۆڕەشا بارزان ب ڕێبەریا پێشەوایێ وی سەردەمی یێ ڕێبازا بارزان ( شێخ ئەحمەد بارزانی ) ل ١٥/٣/١٩٣١ ، ئەو شۆڕەشا کورت یا دۆژمنێن مەزن ب سەرکەفتن و داستانێن خۆ یێن بێ وێنە حیبەتی کری و دەنگڤەدانەکا زۆر دایەڤە و …هتد
مەبەستا من نە ئەوە ڤان روودان و بیرهاتنا ڕێز بکەم و بدەمە دیارکرن ، مەبەست ئەوە کۆ ئەڤ هەمی روودان و بیرهاتنێن تاڵ و شرین ، چەند بانگەواز و پەند و وانە و ئامۆژگارینە کۆ پێتڤی یە خەلکێ کوردستانێ مفای لێ وەربگریت ، ژوانا حەز و ڤیانا خەلکێ کوردستانێ بۆ ئازادی و ڕزگاریێ و بلندیا هەستا وان یا نەتەوی و نشتیمانی ، و مینا جەژنا نەورۆزا سەرساڵ و ئێک ڕێزی هێڤێنێ سەرکەفتنێ بوونە، چونکی هەمی سەرکەفتنێن گەلێ کورد و شۆڕەش و سەرهەلدان ژ ئەنجامێ ئێکرێزیێ بوونە، ئەڤرۆ ژی داخازیا خەلکێ کوردستانێ ل سەرکردایەتیا سیاسی یا کوردستانی ڤەگەراندنە بۆ وێ ئێکرێزیێ ، ئەگەرێ سەرەکیێن روودانێن تاڵ و کارەسات ژی ژ ئەنجامێ دووبەرەکیێ و نەتفاقیا لایەنێن سیاسی و هەبوونا خیانەتێ بوویە ژ پێخەمەت بەرژەوەندێن تایبەت ، کۆ جهێ شەرمزایێ نە ژلایێ پڕانیا خەلکێ و نەڤێت جارەکا دی دەستکەفتێن مە یێن سیاسی و قەوارێ هەرێما کوردستانێ بکەڤیتە د مەترسیێ دا و ببنە قوربانی بەرژەوەند و هەڤرکیێن وان یێن دکەڤنە دخزمەتا دوژمن و نەیار و داگیرکارا دا .
ب ڕەنگەکێ گشتی بیرهاتنێن ئادار و نەورۆزێ یێن گەش و ڕەش پەند و وانە و سەربۆڕن بۆ کوردستانێ ب خەلک و دەستهەڵاتڤە، پێتڤی یە مفا لێ بهێتە وەرگرتن کۆ خالێن نەرێنی دووبارە نەبن و یێن ئەرنی ژی ئەرێنیتر بکەن ، بۆ خزمەت و بەرژەوەنێن گشتی .
- دکاری هەموو بابەتێن خۆ ببینی…
Comments are closed, but trackbacks and pingbacks are open.