سەردار هێتوتی
ژ ئەنجامێ حەز و هزرێن سۆزداری، ب ساڵانە قوتابی و خویندکار ل ڤی وەڵاتی باجا ڕێنما و بریارێن وەزارەتێ ددەن، وەزارەتەکە ل شەڤێ بریارێ ددەت سوبەهی بێهنڤەدانە، سوبەهی دەوام دێ هەبیت.
بۆ ساڵا نوی یا خاندنێ دوو جارا ساڵناما خاندنێ هاتە دانان و پلانێن مامۆستایان سەرئێک بوون.
زێدە ناخازم لسەر بابەتێ ساڵنامێ باخڤم، ب تنێ د ڤی بابەتی دا من لبەرە بەحسێ بێهنڤەدانێن قوتابخانا بکەم، ئەڤ بێهنڤەدانە ب شێوەکێ زانستی کو دگەل کەتوارێ خاندنێ بگونجن نەهاتینە دانان، بەلکو زێدەتر بریارێن کەسی پێڤە دیارن.
نەورۆز، خۆدان پیرۆزییا هزاران سالییە ل نیک گەلێ کورد، ئەڤ جەژنە سەروەرا هەمی جەژنانە، د ڤێ جەژنێ دا ژبلی گوهرینا سەقایێ دنیایێ، حەزا ژیانێ و گەریانێ و دەرکەفتنێ ل نیک تاکێ کورد پەیدا دبیت.
ب ناڤ وەزارەتا پەروەردێ، یاکو ب ساڵانە بێی بەرنامە بێهنڤەدانێن بهاری دئێخیتە دوماهیا زڤستانێ و قوتابی و خویندکارا ژ خۆشیێن وەرزێ بهارێ بێبەهر دکەت، ئەڤ بریارە دکەڤنە د کڤانێ نەزانینێ دا.
ڕاستە، ئادار هەیڤا قەدەرا کوردانە، د ڤێ هەیڤێ دا سەرهڵدان و کیمیاباران و ئازادییا کوردستانێ تێکەل دبیت، لێ ئەو ڕۆژ بلا ڕۆژێن شانازیا گەلێ مەبن و ببنە بێهنڤەدان ژبلی ڕۆژا کیمیابارانکرنا هەڵەبجە، داکو قوتابی وێ ڕۆژێ ب چالاکی ببیربین، یادیتر هەمی زێدەگاڤیە، هەر ژ یازدێ ئادارێ هەتا نەورۆزێ بەس ڕۆژێن پێدڤی بێهنڤەدان بمینن و یادیتر دەوام یا بەردەوام بیت و بێهنڤەدان بکەڤیتە پشتی نەورۆزێ دا قوتابی و خویندکار خۆشیێ ل دەمێ خۆیێ بهاری وەرگرن.
بها و سەنگا نەورۆزێ ل نیک حکومەتا هەرێمێ هند کێمبوویە، ناچیتە ئاستێ کریسمسێ، بۆ کریسمس و سەرساڵا زاینی زێدەتری هەفت ڕۆژا بێهنڤەدانە کو دەمەکێ زوورە و ژبۆ نەورۆزێ ب تنێ سێ ڕۆژێن هەژارن.
پێشنیار دکەم و داخازێ ژ نڤیسەر و ڕەوشەنبیرا دکەم داخازێ ژ ڤێ وەزارەتێ بکەن کو ساڵناما بێهنڤەدانێ بهێتە سەرڕاستکرن و ڕۆژێن نەتەوی لبەرچاڤ بهێنە وەرگرتن و ب سڤکی ل نەورۆزێ نەنێرن.
بێهنڤەدانێن دوماهیا وەرزێ پایزێ نەمینن و ب بەرنامە بهێنە ڤەگوهاستن بۆ دەسپێکا وەرزێ بهارێ، دا کارتێکرنێ ژ پلانێن خاندنێ و ڕێڤەبرنا ناڤەندێن خاندنێ نەکەن و ئێدی ئادار نەبیتە هەیڤا بێسەروبەریێ ل ناڤەندێن پەروەردێ.
ڕۆژا ئالا و ڕۆژا جلکێت نەتەوەی و رۆژا قوتابی و خویندکاران ب ڤی شێوەیی نەمینن بەلکۆ کار بۆ باشتر بڕێڤەبرنا وان بهێتەکرن.
ئەڤە و ژبلی چەند تێبینیێن دیتر کو فەرە بۆ باشتر بڕێڤەبرنا پرۆسا خاندنێ یا ساڵانە ل کوردستانێ بەرچاڤ بهێنە وەرگرتن دا کو ئەڤ پرۆسە د دەمێ خۆدا بهێتە دەستپێکرن و دەمێ خۆدا تمام بیت و بابەتێ خاندنێ هەمی بهێتە وەرگرتن.
جون دێوی دبێژیت: خاندن نە ب تنێ خۆئامادکرنە بۆ ژیانێ، بەلکی ژیان بخۆیە. لەوما دبێژم: وەرن دا پێکڤە ژیانا خۆ ژ بێسەروبەریێ دەربازی ژیانا سەردەم بکەین.
Comments are closed, but trackbacks and pingbacks are open.