بەریتانیا دەستخۆشیێ ل قوباد تالەبانی دكەت
زێ بادینان
كونسولخانەیا بەریتانیا ل هەرێما كوردستانێ دبێژیت: پەسەندكرنا بودجەیا ئەڤ سالە، دی دەلیڤەیەكێ پەیدا كەت بۆ ئەنجامدانا چاكسازییێ و دووبارە ئاڤەدانكرنێ پشتی كۆڤید 19.
كونسولخانەیا بەریتانیا ل هەرێما كوردستانێ د پەیامەكێ دا دبێژیت: رێككەڤتنا هەرێمێ و بەغدا و پەسەندكرنا بودجەیێ، دشیاندایە ببیتە دەستپێكەك بۆ ب هێزكرنا پەیوەندیێن ل ناڤبەرا هەولێر و بەغدا.
د وێ پەیامێ دا هاتییە: ئەم ل ڤێرە دەستخۆشیێ ل قوباد تالەبانی جێگرێ سەرۆكێ حكومەتا هەرێما كوردستانێ دكەین بۆ وی رۆلێ مەزن یێ گێڕای بۆ ئەنجامدانا دان وستاندنێن بودجێ، هەڤدەم پیرۆزباهیێ ئاراستەی وان ژی دكەین یێن رۆلێ خۆ تێدا هەبووین، پیرۆزباهیێ ل هەردوو حكومەتێن عیراقێ و هەرێمێ دكەین بۆ مسۆگەركرنا گەهشتنا رێككەڤتنێ ل سەر بودجێ.
هەروەكی دهێتە زانین، بەری هنگی ژی كونسوخانەیا ئەمریكا ژی ل هەرێما كوردستانێ پیرۆزباهی ل هەردوو حكومەتێن عیراقێ و هەرێمێ كربوو بۆ گەهشتنا وێ رێككەڤتنێ و پیرۆزباهی ژی ل شاندێ دان وستاندنكارێ هەرێما كوردستانێ كربوو كو قوباد تالەبانی جێگرێ سەرۆكێ حكومەتا هەرێمێ سەرۆكاتییا وی شاندی كربوو.
Comments are closed, but trackbacks and pingbacks are open.