سه‌رۆكێ حكومه‌تا هه‌رێما كوردستانێ پشكدارى د رێوره‌سمێن ب كارخستنا پالاوگه‌ها لاناز دا كر.
ئه‌ڤرۆ 26ى چریا ئێكێ یا سالا 2022ێ سه‌رۆكێ حكومه‌تا هه‌رێما كوردستانێ مه‌سرور بارزانى پشكدارى د رێوره‌سمێن ب كارخستنا پالاوگه‌ها لانازدا كر و گوتاره‌ك پێشكێشكر.
ده‌قێ گوتارا مه‌سرور بارزانى :
ب ناڤێ خۆدێ مه‌زن و دلوڤان
به‌رێزان ئاماده‌بوویێن هیێژا
گه‌له‌ك یێ كه‌یفخوشم دئه‌ڤى ده‌میدا پشكدارى دانانا به‌رێ بنیاتى یێن چه‌ندین پرۆژه‌یێن گرنگ و ڤه‌كرنا هنده‌ك ژ ئه‌وان پرۆژه‌یێن ستراتیژى بووم، یێن كو ل هه‌رێما كوردستانێ هاتینه بجهئینان.
ئه‌ڤرۆژى خۆشحالم كو جاره‌كا دى دگه‌ل هه‌وه ل ئه‌ڤى جهى بۆ ب كارخستنا پالاوگه‌ها لاناز به‌رهه‌ڤبووین، كو ئێك ژ پالاوگه‌هێن هه‌ره پێشكه‌ڤتى یێن هه‌رێما كوردستانێیه و ل سه‌ر ستانداردێن جیهانیژى پالاوگه‌هه‌كا گه‌له‌ك گه‌له‌كا پێشكه‌ڤتییه.
سوپاسى و ده‌ستخوشییێ ل كۆمپانییا لاناز و ئه‌وان وه‌به‌رهێنه‌ران دكه‌م، یێن وه‌به‌رهێنان ل هه‌رێما كوردستانێ كری و ئه‌ڤ پالاوگه‌هه ل ئه‌ڤى جهى درووستكرى داكو بكه‌ڤیته خزمه‌تا خه‌لكێ كوردستانێ، و خزمه‌ته‌كا زێده‌تر یا درووستكرنا ژێرخانه‌كا بهێز یا ئابوورى بۆ هه‌رێما كوردستانێ بكه‌ت.
ده‌ستخوشییێ ل هه‌وه دكه‌م و پیرۆزه ل خه‌لكێ كوردستانێ.
ئه‌ڤ پالاوگه‌هه ژبلى هندێ كو ژلایێ به‌رهه‌مێن ژێ ده‌ردكه‌ڤن ڤه دێخزمه‌ته‌كا مه‌زن بۆ وه‌لاتییان كه‌ت، بوویه جهه‌ك بۆ به‌رده‌ستكرنا ده‌رفه‌تێن كارى، نه‌بتنێ ل ئه‌ڤێ ده‌ڤه‌رێ، به‌لكو ل هه‌موو ده‌ڤه‌رێن دى یێن هه‌رێما كوردستانێ، په‌یداكرنا ده‌رفه‌تێن كارى ئێك ژ به‌رنامه‌یێن حكومه‌تا هه‌رێما كوردستانێ بوو، كو هه‌رده‌م پشته‌ڤانى ل كه‌رتێ تایبه و كه‌رتێ گشتى دكر ده‌رفه‌تێن كارى بۆ خه‌لكێ كوردستانێ په‌یدابكه‌ن.
هه‌رێما كوردستانێ هه‌روه‌كو بۆ هه‌وه‌ژى یا دیار، خۆدان سامانه‌كێ مه‌زنێ سرۆشتییه و گه‌له‌ك یا ده‌وله‌مه‌نده، ب مخابنیڤه ل رژێمێن به‌رێ و سالێن بوورى، ئه‌ڤ سامانه ل شوونا بۆ خزمه‌تكرنا خه‌لكێ عیراق و هه‌رێما كوردستانێ بكارهاتبا، بۆ كرینا چه‌كى و خۆ پرچه‌ككرن و خۆسه‌پاندن و شه‌ركرن و وێرانكارییان بكار دهات، و ئه‌م هه‌تا به‌رى راپه‌رینێ ب چ شێوه‌یان نه‌دشیاین مفاى ژ ئه‌وى سامانێ سرۆشتى ببینین یێ كو خودایى دایه خه‌لكێ هه‌رێما كوردستانێ.
به‌لێ سوپاس بۆ خۆدێ، سال پشتى سالێ، وه‌به‌رهێنانه‌كا زێده‌تر د ئه‌ڤى كه‌رتیدا هاته‌كرن، و ئه‌ڤ سامانه كه‌ڤته خزمه‌تا خه‌لكێ هه‌رێما كوردستانێ و هه‌موو عیراقێ ب گشتی، به‌رى نوكه سامانێ كوردستانێ بۆ ژناڤبرن و وێرانكرنا گوندان بكارهاتییه، نوكه ئه‌ڤ سامانه بۆ ئاڤه‌دانكرنا كوردستانێ بكاردهێت، ئه‌م به‌رى سالا 2003ێ پشتى رووخانا رژێما به‌رێ یا عیراقێ، نه‌دشیاین وه‌كو پێدڤى وه‌به‌رهێنانێ دئه‌ڤى كه‌رتیدا بكه‌ین، به‌لێ پشتى كو مه پێكڤه ده‌ستووره‌ك نڤێسى، ل وێرێ ئه‌رك و ده‌ستهه‌لات و مافێن خه‌لكێ عیراقێ و خه‌لكێ هه‌رێما كوردستانێ ژى هاتنه دیاركرن، ل وێرێ گه‌له‌ك ب روونى یا دیاره كو هه‌رێما كوردستانێ دشێت چه‌وا مفاى ژ ئه‌وان سامانێن سرۆشتى وه‌ربگریت و ئه‌م چه‌وا شیاین مفاى ژ ئه‌وى ده‌ستوورى بۆ پێشخستنا ئابوورێ هه‌رێما كوردستانێ وه‌ربگرین و بۆ پێشخستنا ئابوورێ عیراقێ ژى دهاریكاربین.
ب مخابنیڤه هنده‌ك جاران ئه‌وا پێشبینى دكه‌ى وه‌كو خوه بجهـ ناهێت، ئه‌م چاڤه‌رێیى هندێ بووین كو پشتى په‌سه‌ندكرنا ده‌ستوورى، بێى جووداهى ئه‌ڤ ده‌ستووره بهێته بجهئینان و ده‌ستهه‌لاتدارێن به‌غدا هه‌موو ده‌ستوورى وه‌كو خوه بجهـ بینن، به‌لێ ب مخابنیڤه ئه‌ڤ چه‌نده روونه‌دا و مه گه‌له‌ك جاران دیت كو هنده‌ك كه‌سان ب حه‌ز و ئاره‌زویێن خوه ته‌فسیرێن جۆدا بۆ ده‌ستوورى كرن، و ل هنده‌ك جهان ژى ئه‌ڤ ده‌ستووره ب جۆره‌كێ دى دهاته بجهئینان، و بجهئینان ژى بشێوه‌یه‌كى بوو كو ب مخابنیڤه خه‌لكێ عیراقێ و هه‌رێما كوردستانێ ژێ دمفادار نه‌بوون، هه‌روه‌كو دبینین ل گه‌له‌ك جهێن دى یێن عیراقێ خه‌لك ژ خزمه‌تگوزارییێن ده‌ستپێكێ بێ به‌هربوویه، ئه‌ڤه رامانا وێ چه‌ندێ ناده‌ت كو عیراق خۆدان سامانه‌كێ سرۆشتى یێ مه‌زن نینه، به‌لكو به‌رۆڤاژى سامانه‌كێ مه‌زن ل عیراقێ هه‌یه، به‌لێ ئیداره‌یه‌كا خراب هه‌بوو، پێشلكرنا ده‌ستوورى ئێك ژ وان شاشییان بوو كو ب مخابنیڤه هه‌تا نوكه ژى یا به‌رده‌وامه، هیڤیدارین پشتى ده‌ست بكاربوونا حكومه‌تا نوو یا عیراقێ، ئه‌م ل به‌غدا و هه‌رێما كوردستانێ بشێین پێكڤه قانوونا نه‌فت و غازێ بنڤێسین، و ل جڤاتا نوونه‌رێن عیراقێ بهێته په‌سه‌ندكرن كو و دخزمه‌تا هه‌موو خه‌لكێ عیراقێ و هه‌رێما كوردستانێدا بیت.
Comments are closed, but trackbacks and pingbacks are open.