پەیڤدارێ حكومەتا هەرێما كوردستانێ ل دۆر بابەتێ یاسایا مافێ ب دەستڤەئینانا زانیارییان بەرسڤا سەرۆكا پەرلەمانی ددەت.
دەقێ راگەهاندنا پەیڤدارێ حكومەتێ:
بەرێز د. رێواز فایەق، سەرۆكا پەرلەمانێ كوردستانێ د چارچووڤێ كۆمبوونا خۆە دا ل گەل رێكخراوێن نەحكومی یێن سلیمانییێ و حەلەبجە ئاماژە ب وێ یەكێ كرییە كۆ حكومەتا هەرێما كوردستانێ دڤێت دەستكارییێ د ( یاسایا مافێ ب دەستڤەئینانا زانیارییان ) دا بكەت. ئەم رادگەهینین كۆ كابینا نەهێ یا حكومەتا هەرێما كوردستانێ چ نیازێن ب ڤی شێوەی نینن و چ داخوازییەك ژی بۆ هەمواركرنا وێ یاسایێ ئاراستەی پەرلەمانێ كوردستانێ نەكریە.
سەبارەت ب دەرچواندنا رێنماییێن یاسایا مافێ ب دەستڤەئینانا زانیارییان، سەرۆكێ جڤاتا وەزیران ل رێكەفتی 22ی حوزەیرانا 2022ێ و ب بریارا ژمارە ( 157 ) و د خالا سیێ دا هەرئێك ژ سەرۆكاتییا دیوانا جڤاتا وەزیران، سكرتارییەتا جڤاتا وەزیران، فەرمانگەها میدیا و زانیارییان و دەستەیا سەربەخۆ یا مافێن مرۆڤی راسپاردینە بۆ ئامادەكرنا رەشنڤیسێ رێنماییێن ئاسانكارییێن جێبەجێكرنا یاسایا مافێ دەستكەفتنا زانیارییان ل هەرێما كوردستانێ. سۆپاسییا سەرۆكا پەرلەمانێ كوردستانێ دكەین كۆ پشتی دوو هەیڤ و نیڤان ژ بریارا سەرۆكێ جڤاتا وەزیران، پشتەڤانییا خۆە بۆ دەرچواندنا رێنمایان دەربری.
حكومەتا هەرێما كوردستانێ دوپات دكەت كۆ پابەندی پەیرەوكرنا شەفافیەتێ یە د بەلاڤكرنا زانیارییان و ب كریار ژی ئەڤ یەكە جێبەجێ كرییە.
جوتیار عادل
پەیڤدارێ حكومەتا هەرێما كوردستانێ
3ی ئەیلولا 2022ێ
Comments are closed, but trackbacks and pingbacks are open.