جەژنی قەوڵتاس………….

سڵاو کوردستانیان
سڵاو لە کلتووری کوردی و ڕەسەنایەتی
پیرۆزبێت جەژنەکانی کورد و کوردستان
لێرەوە پیرۆزبایی خۆم ئاراستەی برا و خوشکانی كاكەیی دەکەم لە کوردستانی پیرۆز و جیهان بە بۆنەی جەژنی سێ شەوەی یاران جەژنی قەوڵتاس .
هیوادارم هەموو ڕۆژێکی کوردستانیان هەمیشە جەژنی ڕەسەنایەتی کوردی و خۆشی بێت ۰
کورتەیەک لەسەر جەژنی قەوڵتاس یان سێ شەوەی یاران
یارانی قەوڵتاس 7 کەس بوون، ئەو حەوتەوانەیەی کە سوڵتانی یارسانەکان (سوڵتان سوهاک) بۆ کاروباری کۆمەڵایەتیی هەڵیبژاردبوون کە بریتی بوون لە قولی، شابدین، شاکە، شا نەزەر، عیسا، شاموراد و پیرە دلاوەر.
رۆژێک ئەو 7 کەسە لە ئازەربایجانی ئێرانەوە رێگەی چوون بۆلای سوڵتان لە هەورامان (رۆژهەڵاتی کوردستان) دەگرنەبەر تاوەکو لە “پەردیوەر” بچنە خزمەتی سوڵتان. بەڵام ماندوویەتیی رێگە لە نزیک کێوی شاهۆ لە شاری پاوەی ئێستا، وایان لێدەکات کە تووشی لەخۆباییبوون بن و دەڵین ئەگەر سوڵتان سوهاک حەقە با خۆی بێتە پێشوازیمان.
یارسانەکان باوەڕیان وایە سوڵتان سوهاک حەقە و ئاگاداری هەموو قسە و گوفتار و کردارێکیانە. بۆیە لێیان تووڕە دەبێت و مستەفا داودان دەنێرێتە پێشوازییان. مستەفا داودان لە ئایینی یارسان هەمان ئیزرائیلە. بۆیە مستەفا بە فەرمانی سوڵتان هەورێک لە ئاسمان دروستدەکات و سێ شەو بەسەریاندا بەفر دەبارێنێت و دەبن بە ژێر بەفرەوە. ئەو گەشتەی یاران لەکاتی چلەی گەورە روویداوە.
کاتی بەڕۆژووبوونی قوڵتاسی لە چواردەیەمی چلەی گەورەی زستان تاوەکو حەڤدەیەمی زستانە. ئەو یارسانانەی کە سێ رۆژی یارانی قەوڵتاس بەڕۆژوو دەبن، بڕوایان وایە لەوکاتەوە بە ئەمری سوڵتان سوهاک و بە شوکرانەی رزگاربوونی یاران، بەڕۆژووبوون لە سێ رۆژی رۆژووی قەوڵتاس بەسەریاندا واجب کراوە و لە شەوی سێیەم دەبێتە جەژنیان و رێوڕەسمی جەژن دەگێڕن.
رێوڕەسمەکانی جەژنی قەوڵتاس لە پێنج رۆژی یەک لەدوای یەک بەڕێوەدەچن، بەڵام رێوڕەسمەکان هەمان رێوڕەسمە هەمیشەییەکانی یارسانەکانە. خواردنەکان برنج و کەڵەشێرن بە رۆنی حەیوانی لە هەر شەوێکدا. نانی پیرۆزی “گردە”، قوربانیکردنی مەڕ، نانی تیری و شوکرانە کە بریتین لە هەنار و شەکر و نەبات دەبرێنە خزمەتی جەم و لە رێوڕەسمی جەم و لە جەمخانە پیرۆز دەکرێن.
لە رۆژی جەژن کە رۆژێک دوای سێ رۆژی بەڕۆژووبوونەکەیە، یاران لە جەمخانەکان سەردانی یەکدی دەکەن و جەژنە پیرۆزە لە یەک دەکەن.