حکومەتا هەرێما کوردستانێ ئامارا سێ هەیڤێن ئەڤسالە یا هنارتن و فرۆشتنا پەترۆلێ بەلاڤ کر

حکومەتا هەرێما کوردستانێ ئامارا سێ هەیڤێن ئەڤسالە یا هنارتن و فرۆشتنا پەترۆلێ ژ 1/4/2022 تا 30/6/2022 بەلاڤ کر.

ل گۆرەی ئامارێن هەرێمێ کو پشتبەستن ب ئامارێن کۆمپانیا دیلۆیت کریە، د وان سێ هەیڤان دا 37 ملیۆن و 618 هزار و 577 بەرمیلێن پەترۆلێ ب بهایێ 100.38 دۆلار بۆ هەر ئێک بەرمیل ب رێکا بۆریان هاتینە هنارتن، داهاتێ وان 3 ملیار و 776 ملیۆن و 446 هزار و 251 دۆلارن.

هەروەسا 237 هزار و 475 بەرمیل ژی ل ناڤخۆ ب رێکا پالاوگەهان ب بهایێ 54.08 دۆلاران بۆ ئێک بەرمیل هاتینە فرۆشتن و داهاتێ وان 12 ملیۆن و 844 هزار و 28 دۆلارن.

داهاتێ گشتی یێ وان سێ هەیڤان گەهشتیە 3 ملیار و 789 ملیۆن و 290 هزار و 279 دۆلاران، ژ وی داهاتی ملیارەک و 632 ملیۆن و 695 هزار و 579 دۆلار بۆ شایستەیێن کۆمپانیێن پەترۆلێ و قەران هاتینە مەزاختن، هەروەسا 584 ملیۆن و 609 هزار و 407 دۆلار ژی بۆ خەرجیێن دی یێن پەترۆلێ یێن مینا ڤەگوهاستن و کۆگەهکرنێ هاتینە مەزاختن.

هەروەسا هاتیە، پشتی مەزاختنا هەمی خەرجیان، ملیارەک و 571 ملیۆن و 985 هزار و 275 دۆلار بۆ حکومەتێ ماینە و دێ بۆ دانا مووچەیان هێنە خەرجکرن.