▪ “خودایێ ئەڤیندار”

ئامادە كرن و نڤیسینا: كەمال كوردی

ئەوا كو ڕاستی بت من خوەستبوو ئو من بڕیار دابوو كو بۆ دەمەك كورت چوو مەتن و بابەتان نەنڤیسم و ژ بوو دەمەك كێم بهێنڤەدانەك بدەم خوە ئوو داكەڤم ناڤا كویراتیا خەیالێن خوە ئەوێن ئالووز و شەوتی نێ هەر ژ خوە ڕە دەما ئەز دناڤا دەریایا ئالووز و ب پێلێن ئەنتەرنێتی دگەڕیام،سترانەكا هونەرمەندا هێژا حومەیرا كوو ئێكەك ژ هونەرمەندێن دەنگ خوەش و ب ناڤ و بانگێ وەڵاتێ ئێرانە بالا من كشاند و هەست و هشێن من لڤاندن و من نەكاری كوو دەست ژ بوو نڤیسینا چەند دێرەكا نەبەم ل بارا وێ سترانا بالكێش كو یا پڕە ل نهێنی و پەیڤێن جوان و زێدە ب ڕامان ئوو من خوەست كوو هوون ژی پشكەك ژ هزرا من بن و دگەل مندا داكەڤن ناڤا پێلێن ڤان ئاخفتن و هزرێن جوان كو داخوازا مرۆڤ بوونێ ژ خەلكێ جیهانێ ڕە دكەت. نها ئەزێ ئاخفتن و پەیڤێن ڤێ سترانێ ژ وەڕە ب دەق و مەتنا نڤیسكی ئینم زمان. دونیا یا پڕ بووی ژ ستەم و ستەمكارییێ، ئەوا كو نها ب سەرێ جیهانێ دهێت ئەز باوەڕم كو چووجاران ب ڤی ڕەنگی د دیروكا زەڤی و مرۆڤاندا چێنەبوویە.ستەم و ستەمكاری هەوارێن وێ بلندبووینە و قێڕینا هەژار و نەدار و ستەملێكریا تا عەرشێ خودێ بلند بوویە و زەڤی د ڤێ نالەبارییێدا خەمبارە و دهەژیت، گەلوو ما هون نابینن، بیڤ لەرز و بوركان و ب ڕیڤەچوونا عەردی؟؟؟ ما هون نابینن لەهی و بارانێن ب لەز و مال وێرانكەر؟؟؟ ئێدی دونیا چاوا ئوو ب چ ڕەنگەك هاوار بكەت و مرۆڤێن جیهانێ هایدار بكەت، لێ مرۆڤ نڤستینە، هشێ وان نڤستی و مرییە،ستەم و مالوێرانییێ پەمبی خستیە گوهێ مرۆڤان هەر ژ بەر ڤێ چەندێ ژی خانما هونەرمەند ب ڤی ڕەنگی دەست پێدەكەت و دبێژی” هەیڤا ئەڤیندارییێ شەوقا خوە لێبدە، بارانا ئەڤیندارییێ بباره، ئەی ڕوژ و تاڤا محبەت و حەژیكرنێ بناخە و ڕهوڕیچالێن پیسی و خراپی و ڕق و كینان بسووژینە.ئەی مرۆڤینە وەرن ئوو توز و غوبارا كینان ڤەشوون، نێ ئەڤ هەموو تەماعی و پەلەپەل و خەم خوارن ژ بوو چ؟؟؟ كا ژ من ڕە ببێژن گەلوو ئەڤ دونیایە مالا كێیە؟؟ سوڵتان و شاه و پاشا هەر هەمی چوون و كوشك و تەلارێن وان ب جێھ مان، پاشا و گەدا مرن و دونیا هەر وەكوو خو مایەڤە. هەیڤا ئەڤیندارییێ شەوقا خوە لێبدە، بارانا ئەڤیندارییێ بباره. كا كەسەك ژ من ڕە ببێژیت چوو كەسەك هەیە كوو بچەك ئوو دنكەك ژ مالێ دنی دگەل خوە ڕە برییە، كێ پەیمان نوو كرییە كو دیسان و جارەك دی بۆ سبێ هەبیت و بلند بوون و هەلاتنا تاڤێ ببینیت دەما كو مرۆڤ دزانیت ڕوژەك ژ ڕوژان ل ناڤ دچیت و فەنا دبیت، دەما كو دمریت و ڕح ل لەشی دادكەڤیت و ژێ جودا دبیت. ڤێجا ئێدی ئەڤ هەموو شەڕ و جەنگ و بەرچێل گرتن ژ بوو چییە، كا ژ من ڕە بێژە كییە ئەوێ مای د دونیایێ دە؟؟؟دیسانڤە هون دزانن سوڵتان و شاه و پاشا هەر هەمی چوون و كوشك و تەلارێن وان ب جێھ مان، پاشا و گەدا مرن و دونیا هەر وەكوو خو مایەڤە. هەیڤا ئەڤیندارییێ شەوقا خوە لێبدە، بارانا ئەڤیندارییێ بباره. گەلوو باشه بووچی دەما كو مرۆڤ دگەهیت هێز و دەستهەڵات و مەزناتییێ، خوە وندا دكەت، خوە مەزن دكەت و دەست دهاڤێژیت ستەم كرنێ، نێ هون دزانن ڕوژەك هەر ئەڤ عەمر و ژییێ كورتێ مە دێ ب داوی هێت ئوو دبین خوراك و خارنا ئاخێ، ئێدی چوون شوونەك ژ مە نامینیت و دێ فەنا بین و كەس هەر هزرا وی ژ ب مە ڕا ناهێت، ژ بەركوو دزانن كوو پاشا و گەدا مرن و دونیا هەر وەكوو خو مایەڤە. هەیڤا ئەڤیندارییێ شەوقا خوە لێبدە، بارانا ئەڤیندارییێ بباره. یەزدانێ ب توانا و دلوڤان ئەم ژ بوو مروڤ بوونێ خوەستینە، ئەم ژ بوو ڕوناهی و نوورا ڕاستی و حەقیقەتێ خوەستینە، یەزدان و خودایێ ئەڤیندار ئەم ژ بوو ئەڤین و ڤیان و محبەتێ خوەستینە نە ژ بوو تووڕە بوون و نفرەت و كین، ئەم هەمی ژ ئاخین و هەر ژ بوو ئاخێ ژی ڤەدگەڕین ، ئەم ژ بوو هەتا هەتا هەر ناژین و ئەم ل بلنداهیا چوو ئاسمانا ژی نینە نێ هون باش دزانن پاشا و گەدا مرن و دونیا هەر وەكوو خو مایەڤە. هەیڤا ئەڤیندارییێ شەوقا خوە لێبدە، بارانا ئەڤیندارییێ بباره. گەلوو بیرو هزر و فكرینا وە چ دبێژیت؟؟؟ هون چەوا ل هەستێن ڤێ سترانێ دگەهن؟؟ ب دیتنا من ب تنێ گوهداری كرنا ئاخفتن و نڤیسین و پەیڤ و ئاوازێن جوان و خووشكووك ئوو مەلاقی لێدانا وان و ب بەژن و بالا وان دا گووتن نە گرنگە، یا گرنگ ئەڤە كو ئەم مرۆڤێن جیهانێ ب خوەدا بچینەڤە، پچەك د ناڤا كویراتیا دل و دەروونێ خوەدا بگەڕهین و دەست ب بڵاڤكرنا باشی و خوەشی و ئەڤینێ بكەین دا مە جیهانەك قەنجتر، بەهەشتەك جوان ل سەر ڕوویێ عەردی هەبت و پەیمان و ئەهدان د گەل خودایێ خوە تازە كەین كو ئەم مرۆڤین و تووڤێ مروڤانتی دچینین و ئەوا كوو یەزادن دخوازیت ئەمێ وێ بكەین.دا هەكە ئەم مرین و بەرەڤ نەمان ژی چووین، ئەم ب دلەك ڕەحەت هەڕین گوڕێ هەیا كو شەرمزاری خودایێ خو نەبین لە جیهانەك دن و پشكا دەرچوویا خودی كو ڕحا مەیە و ب ئەمانەت ل با مەیە ئەم ب پاقژی ژ وی ڕە ڤەگەڕینین.