دلدار محەمەد
هەرکەس ب رەفتارا خۆ پێناسەیەکێ بۆ خۆ پەیدا دکەت و کومەکا رەفتاران کەساتیەکێ پەیدا دکەت رەفتار خۆدیکا کەساتیا وی و پیڤەرێ دیارکرنا سەنگا وی / وێ کەسی یە ، لێ
ژ بلی ڤێ چەندێ هندەک رەفتارێن گشتی ژی هەنە کو تاکەکەس دناڤ جڤاکی دا دکەڤنە بن کاریگەریا ئێک و دوو و پێکڤە رەفتارەکێ دکەنە رەفتارەکا گشتی د جڤاکی دا ب زیقی دیار دبیت ، رەنگە ببیتە ئێک ژ سیمایێن دیارێن وی جڤاکی د قوناغەکا دەستنیشانکری دا
ئەگەر چاڤخشاندنەکێ بکەین دێ ب زەلالی دیاربیت دڤی دەمی دا جڤاکا کوردی ژی ژ هندەک رەفتارێن وەکهەڤێن تاکێ خۆ د نالیت ، کو تاکێن وی بۆ د خەبتن و بێ کو ئارمانجەکا روهن و زەلال هەبیت ، ژ وان ژی هیڤی و خەونا ناڤداربوونێ یە بێی هەبونا ئارمانجەکێ !
کەسەک یان کومەکا کەسان دێ هەولدەن ناڤدارببن و بهێنە نیاسین ، بێی کو بزانن ناڤداربوون بوچی ؟ ناڤداربوون کەنگی ؟
و سوشیال بتنێ تێرا هندێ هەیە کو مرۆڤ بگەهیتە وێ باوەریێ کو ناڤداری ژ وەسیلێ یا دەربازی ئارمانجێ بوی ، بێی کو هندەک ئارمانجێن زەلال و پاقژ و ساخلەم ل پشت ڤێ ناڤداربوونێ هەبن
دەمێ بەرسڤا وان دوو پرسیارێن لسەری هەلاویستی و شێلی د مینیت ، ناڤداری دبیتە ئارمانج ، نەکو رێکەکا قەنجی کاریێ ، هنگێ ناڤداری ژ رێکەکا خزمەتکرنێ بەرەڤ ترانە پێکرنێ کاروانێ خۆ د هاژوت
وی دەمی هەر تشت قابلی هندێ یە ئەو بێخنە بەر شالوکا ترانێن خۆ ، بۆ ناڤداریێ ، هەر تشت هێژایی هندێ یە خەبەران ببێژینێ بتنێ دا ناڤدارببین و لایک و ڤیو ب فرن ! یا ژڤێ دلئێش تر ئێدی ئەم جرعەتێ دکەین پیرۆزیا ژی بدەینە بەر لەهیا ترانە پێکرنێ بۆ هندەک لایکێن بێ ئارمانج ، پرسیارەکا دی یا ب ئێش هەردەم دگەل ڤی بابەتی خۆ د ئازرینیت ، باشە ئەوێ ڤالا د لایڤی دا د پەیڤیت مە قەبیل کر یێ ڤالایە ، بۆچی هندە بینەر ل ڤالاتیێ کوم دبیت ، بۆچی پوستەکی لسەر کتێبەکی بنڤیسە لایکێن تە نا گەهنە 50 لایکان! و تۆ ببێژە ئیبراخ بێ وە نە د خۆش بوون ، سەحکە رێژەیا کومێنتان
هندەک جاران باوەری بۆ مرۆڤی چێ دبیت هشیارکرنا جڤاکی ب رەنگەکێ گشتی وەکی کورد دبێژن (ژ نڤێژا سپێدێ فەرترە ) ژ بەرکو خرڤەبوون ل ڤالایەکی رامانا ڤالاتیەکا گشتی ددەت
بەلێ کی دێ هشیارکەت ؟ نڤیسەرێ مایە ب بەرژەوەندا خۆڤە ، هەلبەستڤانێ د عەشقا چاڤان دا نقوم بوی ، یان میدیایا مایە ب سەروچاڤێن ئێک و دوو ڤە ، یان رەوشەنبیرێ ل چوکەری دگەریێت ؟ نزا !
- دکاری هەموو بابەتێن خۆ ببینی ….
Comments are closed, but trackbacks and pingbacks are open.