دایک، زارۆک و زمان
نڤێسینا: شرین بەرواری
بێ گومان هەر نەتەوەیەک ب زمان و کلتۆرێ خوە دهێتە ناس کرن و زمان یەک ژ رەگەزێن سەرەکە یێن نەتەوەیی و نیشتمانی یە.
بۆچی زمانێ نەتەوەکێ ب زمانێ دایکێ ژی هاتیە پێناسە کرن؟ چ پەیوەندی دناڤبەرا زمانی و دایکێ دا هەیە؟ دایک ئەو رەگەزە کو یەکەم مامۆستایا زمانی یە بۆ زارۆکان، چونکە هەر ژدایکبوونێ ب زێمار و لای لای و گۆتنێن خوە زارۆکی فێری زمانی دکەت و چاڤکانیا سەرکە یا فێربوونا زمانی یە، لەوما ژی زمانێ نەتەوەیی ب زمانێ دایکێ ژی هاتیە پێناسە کرن.
گرنگی یا دایکێ د پاراستن و وەرار و فێر کرنا زمانی دا ب راستی جهێ گەنگەشێ نینە، لەوما هندی کو دایک پتر یا زمان زان بیت و یا زنگین بیت ب وشە و درست ئاخفتنێ و پاقژ ئاخفتنێ، دێ زارۆک ژی ب وی ئاوایی فێر بیت و پەروەردە بیت.
ب سەدان ساڵان دەمێ خاندن و خاندنگە و کتێب و چ تشت نەبوون، دایکا کورد زمانێ کوردی پاراست و بەرەباب بۆ بەرەباب زارۆک ب زمانێ کوردی ئاڤدان و پەروەردە کرن و هەمی ستەم و زۆرداری یا داگیرکەران نەشیا دایکێ و زمانی ژێک ڤەقەتینیت و رێ لێ بگریت و د خاندنگەها خوە دا خاندنگەها زمانێ دایکێ زمانێ کوردی پاراست و زارۆک پەروەردە کرن، بێ گومان رۆلێ بابێ ژی گرنگە نابیت ژبیر بکەین، لێ دایک سەرۆکانی یا زمانی یە.
د ڤێ رەوشا نوکە ئەم تێدا ب سەدەما پێشڤەچوونێن تەکنەلۆژی و گەهاندنێ و تێکەلبوونا زمانان و ئاوارەبوونا بەردەام و هێرشێن فەرهەنگی یێن داگیرکەران کاریگەری لسەر زمانێ کوردی ژی کریە و ئالۆزی و تێکەتنا پەیڤ و ئیدیەمێن بیانی و شاش نڤێسین و ئاخفتنا نە رێزمانی نوکە هند بەڵاڤ بوویە، کو تەنێ دایک دشێت ب زمانەک پاقژ و بێ زیوان، ب رێزمانەک کوردی یا رەسەن، زمانێ کوردی بپارێزیت و بەرەبابێ نوکە و زارۆکێن مە ب کوردی چ وەک زمان چ وەک کلتۆر پەروەردە بکەت.
Comments are closed, but trackbacks and pingbacks are open.