سكرتێرێ گشتیێ نەتەوێن ئێكگرتی كۆمارا ئیسلامییا ئیرانێ ب پێشلكرنا مافێن كوردان خەتاباركر و ڕاگەهاند، چارەنڤیسێ هژمارەكا زۆر ژ چالاكڤانێن كورد كو ل دەستپێكا ئەڤ ساڵە ژلایێ هێزێن ئەمنیێن ئیرانێڤە هاتینە دەستەسەركرن یێ دیار نینە.
د ڕاپۆرتەكێدا كو بۆ 47 خولا كۆمبوونێن جڤاتا مافی مرۆڤ بەرهەڤكرییە، ئەنتۆنیۆ گۆتێرس، سكرتێرێ گشتیێ نەتەوێن ئێكگرتی بەحسێ پێشلكرنا مافێن خەلكێ كورد دكەت ل ئیرانێ و ئاشكرا كرییە كو دساڵا 2020 دا ب كێماتی 69 كورد ل ئیرانێ هاتینە سیدارەدان و دهەمان ساڵدا بتاوانێن دژایەتیكرنا ئاسایشا نیشتیمانی و دژایەتیكرنا خودێ و ئەندامبوون دگەل گرووپێن سەلەفی، سزایێ سێدارەدانێ بۆ 10 زیندانیێن سیاسیێن كورد دەرێخستییە.
ئەنتۆنیۆ گۆتێرس د ڕاپۆرتا خودا ئاشكرا كرییە، تنێ دمەها كانینا دوویێ یا ئەڤ ساڵەدا زێدەتر ژ 100 چالاكڤانێن كورد ژلایێ هێزێن ئەمنیێن ئیرانێڤە هاتینە دەستەسەركرن و چارەنڤیسێ هژمارەكا وان چالاكڤانان یێ دیارنینە.
سكرتێرێ گشتیێ نەتەوێن ئێكگرتی بەحسێ ڕەوشا خراب یا زەینەب جەلالیان، زیندانییا سیاسییا كورد دكەت و دبێژیت، جەلالیان ل ساڵا 2008 هاتییە زیندانكرن و هەتا نوكە مۆلەتا بەروەختا دەرچوونێ ژ زیندانێ بۆ نەهاتییەدان.
دەربارێ پێشلكرنا مافێن پێكهاتەیان ل ئیرانێ گۆتێرس د ڕاپۆرتا خۆدا خۆیاكرییە كو، دوو ژنێن چالاكڤانێن كورد ل سننە و كرماشان لسەر فێركرنا زمان و گەشەپێدانا كەلتۆرێ كوردی هاتینە زیندانكرن، دیسان بەحسێ توندوتیژیێن هێزێن ئەمنیێن ئیرانێ كرییە لهەمبەر كۆڵبەران و دبێژیت: توندوتیژی ل دژی كۆڵبەران زۆر زێدەبووییە و جهێ دلگرانیێ یە، و ئاشكرا كرییە كو زێدەتر ژ 70 هزار كەس ل پارێزگەهێن هەژارێن ئیرانێ كارێ كۆڵبەریێ دكەن و پڕانیا وان كوردن.
سكرتێرێ نەتەوێن ئێكگرتی دبێژیت: ل ساڵا 2020 بكێماتی 60 كۆڵبەر ژلایێ هێزێن ئەمنیێن كۆمارا ئیسلامیڤە هاتینە كوشتن، كو هژمارەكا وان زارۆك بوون و 70 كۆڵبەرێن دی ب تەقەیا وان هێزان بریندار بوویینە و هەتا نوكە دەستهەڵاتدارێن ئیرانێ ڤەكۆلێن لسەر هیچ حالەتەكێ كوشتنا كۆڵبەران نەكرییە.
Comments are closed, but trackbacks and pingbacks are open.