دناڤبەرا هەڤڕکیێن پارتایەتی دا ، خەلک بوویە قوربانی

غیاس خالد زێباری

ب درێژاهیا زێدەتر ل سەد ساڵایە خەلکێ کوردستانێ ب شانازیڤە خۆ دکەتە قوربانی ئازادی و ڕزگاریا گەل و وەڵاتی و گەهشتن ب ماف و ئارمانجێن نەتەوی و نشتیمانی، پشتی ڤان هەمی ساڵێن خەبات و قوربانیدانێ ل سەرهەلدانا پیرۆزا ساڵا ١٩٩١ پشتی ئیرادا خودایێ مەزن ، ب هێزا بیر و باوەرا و ئێکرێزیێ خەلکێ کوردستانێ دەرگەهــ و قەید و زنجیرێن پۆڵایی یێن داگیرکاریێ و بندەستیێ شکاندن و چڕایەکێ ئازادی و رزگاریێ دیت، ئەو ژی ئاڤاکرنا پەرلەمان و حکومەتا هەرێما کوردستانێ و قەوارێ هەرێمێ ب گشتی بوون .

خەلکێ کوردستانێ چاڤەرێ بوو بڤێ ئازادی و رزگاریێ بیرەوەریێن تاڵ و کارەسات و ئێش و ژانێن وان سەد ساڵا بکەتە خۆش و بەختەوەری و ئاڤەدانی و پێشڤەچوون و پێشکەفتن و بەرەڤ قۆناغاێن مەزنتر بچیت، لێ مخابن نە دەولەتا عیراقێ یا نوو ئەوا لسەر بنەمایێن دیموکراسیێ و فیدالیەتێ و سەروەریێن یاسایی و دەستووری هاتیە ئاڤاکرن ، بەرامبەر خەلکێ کوردستانێ ئەرکێن خۆ یێن مرۆڤایەتی بجهــ ئینان ، نەژی حزبێن کوردستانێ درۆشمێن خۆ یێن بریقەدار و نشتیمانی و نەتەوایەتی و خزمەتا گەل و وەڵاتی کرنە کریار ، بتایبەت پشتی ساڵا ٢٠٠٥ ێ هەتا نهۆ .

مخابن جهێ حزبێن کوردستانێ هەڤڕکیێ لسەر خزمەتێن زێدەەر یێن وەڵاتیان بکەن بۆ دابینکرنا پشتەڤانیا خەلکی کۆ ب دەنگێن وان ل دەستهەڵاتێ بمینینن یان بگەهنە دەستهەڵاتێ ، کەفتینە د هەڤڕکیەکا نەسرۆشتی دا لسەر پرسێن دارایی و کارگێری و زێدەتر و مەزنترکرنا کۆمپانیێن بازرگانی و پرۆژە و کارگەهێن حزبی و بەرپرس و پلەدارا …!

لجهێ هندێ دەستپێخەریا بسازیکرنا سازیێن رێڤەبرنێ و سەروەریا یاسایێ بکەن ، هێشتا ململانێ لسەر کۆنترۆلکرنێ لسەر داهاتێ دەروازێن سنووری و داهاتێ ناڤخۆیی دکەن ، داکۆ حکومەت نەشێت مۆچێن مۆچەخۆرا دابین بکەت ، پشتی نێزیکی سیهــ ساڵا لسەر ئاڤاکرنا حکومەتێ هێشتا هێزێن پێشمەرگەهی و ئێمناهیێ و …. هتد دبن ئەجندا و فەرمانێن حزبادانە ، پێتڤی بۆ گاڤێن دەستێکی یێن حکومەتێ و سازیێن دەستهەڵاتا هەرێمێ نەخاسمە سەرۆکاتیا هەرێمێ و پەرلەمانی بنشتیمانیکرنا سازیێن لەشکری و ئێمناهیێ بانە و جهێ هەر وەڵاتیەکێ کوردستانی دناڤدا هەبا .

ئەڤە چەند ساڵە ب دەرئینان و بازرگانیکرنا نەفتا کوردستانێ ، کوردستانێ جهەکێ تایبەت و گرنگ ل نەخشێ بازارێ نەفت و غازا جیهانی ڤەگرتیە و رۆژانە فرۆتنا سەدان هزار بەرمیلێن نەفتێ دهێنە فرۆتن، هێشتا خەلکێ کوردستانێ لبەر بێ نەفت و غازیێ دناڵیت و نەشێن پشکا پێتڤی یا سۆتەمەنی بۆ چەندین پرۆژێن بەرهەمئینانا کارەبێ دابین بکەن کۆ پارەیەکێ مەزن لێ خەرج کریە و نیڤەکا رۆژێ خەلکێ کوردستانێ یێ بێ کارەبە …! نەژی شیانە مۆچێن مۆچەخۆڕێن کوردستانێ ب درستی دابەش بکەن .

رۆژانە ب زێدەکرنا باجا و بریارێن جودا داهاتێ کوردستانێ زێدە دکەن ، لێ نەشیانە کۆنترۆلا بازاری بکەن و رۆژ بۆ رۆژێ بهایێ پێتڤیێن خەلکی گرانتر دبن و خەلک وێ هزرێ دکەت لسەر حسابا وان داهاتێ حکومەتێ زێدە دبیت .

هەڤڕکیێن حزبا سنوورێن هەرێمێ ژی دەرباز کرن و زۆر نەمایە لسەر پۆستێن دناڤ دەوڵەت و حکومەتا ئیراقێ دوبەرەکیێن مەزنتر درۆست بکەن و ب ئەنجام و بەرکەفتیێن هەلبژارتنا ژی ڕازی نابن …!
ئەم نابێژین هەرێما کوردستانێ دەستکەفت و خزمەت نەبوونە ، بەلکی کار و پرۆژێن مەزن و جهێ شانازیێ هەبوونە و رەوشێن دژاو دەرباز کرینە و شیانە هەرێما کوردستانێ وەکی ئێک ژ دەڤەرێن ئێمن و سەقامگیر دناڤ دەڤەرە ئاگرین دا بپارێزن و لسەر ئاستێ سیاسی و دبلۆماسی دگەل جیهانێ د ئاستەکێ هەرە باشدانە و د هندەک لایانڤە مینا وەڵاتەکێ سەربەخۆ جیهان سەرەداریێ دگەل هەرێما کوردستانێ دکەت ، ئەڤەژی دەستکەفتەکێ هەرە مەزنە .

یا ژ هەمیێ مەزنتر ئەوە ئەم وەکی کورد خودان سەرۆک و رێبەرەکێ هەرە مەزن و دلسۆز و ئاشتیخوازین کۆ سەرۆک ( مسعود بارزانی ) یە و لسەر دەست و دەسپێشخەریێن جەنابێ وی پرسێن مەزنێن سیاسی یێن ئیراقێ یێن دهێنە چارەسەرکرن و ئاگرێ ڤولکانێن مەزن یێن دهێنە ڤەمراندن ، پێتڤی یە ئالیێن سیاسی یێن کوردستانێ ژی ب دەستپێشخەری و ڕێنمایێن جەنابێ وی ڕازی ببن و دەستا ل هەڤڕکیێن نەڕەوا یێن حزبایەتی و کەسایەتی بەردەن ، بلا هەڤڕکی لسەر کار و خزمەتێن زێدەتر بن، چونکی خەلکێ کوردستانێ یێ دبیتە قوربانی وان هەڤڕکیێن نەرەوا و نەسرۆشتی و پێتڤی یە حکومەتا هەرێما کوردستانێ ژی بلەز ئاڤڕیەکێ ل ڕەوشا خەلکێ کوردستانێ بدەت و داهاتێ هەرێمێ ب هەمی بەشێن خۆڤە بێخیتە دخزمەتا خەلکی و پرۆژێن خزمەتگۆزاری و ژێرخانا ئابۆری دا و لەزێ ل پرۆژێن خۆ یێن چاکسازی بکەت . چونکی ڕەوشا خەلکی د مەترسیێ دایە و ئەگەر چ کارڤەدان ژی نەبن ، ل هەلبژارتنا خەلک دێ تۆڵڤەکرنێ لحزێن سیاسی کەت .

• دکاری هەمووبابەتێن خۆ ببینی ….