دهوک، پێشبینا 15 هزار گەشتیاران دکەن
زێ بادینان
رێوار محەمەد رەشید، پەیڤدارێ رێڤەبەریا گشتی یا گەشتوگۆزارێ ل پارێزگەها دهۆکێ بۆ ” زێ بادینان ” گوت د ھەمی ھەلکەفتان دا رێڤەبەریا گشتی یا گەشت و گۆزارێ ل پارێزگەھا دھۆکێ پلانەکا باش ددانیت بۆ وێ چەندێ ب باشترین شێوە پێشوازی و خزمەتا گەشتیاران بکەت بۆ جەژنا نەورۆزا ئەڤ سالە ژی رێڤەبەریا مە پلانەکا باش بۆ ڤێ مەرەمێ دانایە و ١٥ تیم پێک ئیناینە و ئەڤ تیمە دێ ل زالگەھێن سەرەکی یێن کو گەشتیار د ناڤ دا دھێنە د ناڤ پارێزگەھا دھۆکێ دا راوەستن و دێ ئاڤێ و شریناھیان و پرۆشەران و نەخشەیێ پارێزگەھا دھۆکێ ل سەر گەشتیاران بەلاڤ کەن، ھەروەسا چەندین لافیتێن بخێرھاتنا گەشتیاران دێ ب زمانێ کوردی و عەرەبی ل زالگەھان و ئەو جھێن گەشتیار قەست دکەنێ ھەلاویسین، زێدەباری ڤێ چەندێ د رۆژێن جەژنا نەورۆزێ دا دێ کیسێن بەرمایکان ژ لایێ رێڤەبەریا مە ڤە ل سەر سەیرانی و گەشتیاران ھێنە بەلاڤکرن ژ پێخەمەت پاراستنا ژینگەھا جوانا پارێزگەھا دھۆکێ و نڤیسینگەھێن دانا پێزانینان ب گەشتیاران ل گەلیێ باژێرێ دھۆکێ و ھاڤینگەھا سیلاڤێ و رێڤەبەریێن گەشتوگۆزارێ ل قەزایێن (ئاکرێ، زاخۆ، شێخان، ئامێدیێ) یێن ب سەر رێڤەبەریا مە ڤە دێ بەردەوام د خزمەتا گەشتیاران دابن و مە ھەماھەنگیەکا باش ل گەل ھەمی سازیێن پەیوەندیدارێن میری کریە ب تایبەتی ھێزێن ئێمناھیێ ل زالگەھان کو ئاسانکاریێن زێدەتر بۆ وان گەشتیاران بکەن یێن سەرەدانا پارێزگەھا دھۆکێ دکەن، ھەروەسا بەردەوام ئەم کۆمبوونان ل گەل خودانێن بنگەھێن گەشتیاری یێن پارێزگەھا دھۆکێ ئەنجام ددەین بۆ وێ چەندێ داشکاندنێ بۆ گەشتیاران د بھایان دا بکەن و ب باشترین شێوە خزمەتا وان بکەن داکو روویێ پاقژ و جوانێ پارێزگەھا دھۆکێ بۆ گەشتیاران بدەنە دیارکرن، ھەکە رێیا پارێزگەھا دھۆکێ ل ھەمبەر ھاتنا گەشتیاران یا ڤەکری بیت و چ رێکارێن نوو نەھێنە دەرکرن ئەم دێ ژ رۆژا ١٨/٣/٢٠٢١ ھەتا رۆژا ٢٥/٣/٢٠٢١ ئامارا ھاتنا گەشتیاران بۆ پارێزگەھا دھۆکێ وەرگرین و د ڤان رۆژێن ئامار تێدا دهێتە وەرگرتن ئەم پێشبینیا هاتنا نێزیکی 15 هزار گەشتیاران بۆ پارێزگەها دهۆکێ دکەین.
نوکە گەشتیار ب ترۆمبێلێن خۆ یێن تایبەت و ب شێوەیێ گرۆپ ژی دهێنە پارێزگەها دهۆکێ بەلێ ب مەرجەکی پشکنینا کۆرۆنایێ ئەنجامدابیت و دگەل دابیت و 72 دەمژمێر ب سەر دا دەرباز نەببن
Comments are closed, but trackbacks and pingbacks are open.