دھۆک-KDP.info- رێڤەبەرێ شینواران ل پارێزگەھا دھۆکێ ئاشکرا کر کو ژ ئەگەرێ شەرێ دناڤبەرا چەکدارێن پەکەکێ و سوپایێ تورکیا دا مەترسیا ژ ناڤچوون و تێکدانێ ل سەر ٧٩ جھێن شینواری یێن پارێزگەھا دھۆکێ پەیدابوویە و وان ھەمی لایەنێن پەیوەندیدار ل دۆر ڤێ چەندێ ئاگەھدار کرینە.
د.بێکەس بریفکانی، رێڤەبەرێ شینواران ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو ئەو شەرێ نوکە د ناڤبەرا چەکدارێن پەکەکێ و سوپایێ تورکیا دا ل سنوورێ ھندەک ژ دەڤەرێن پارێزگەھا دھۆکێ دھێتە ئەنجامدان ژ بلی وێ چەندێ کو زیان گەھاندیە خەلکێ ھندەک ژ گوندێن پارێزگەھێ و خەلکێ وان گوندان دەربەدەر کری، د ھەمان دەم دا مەترسیا ژناڤچوون و تێکدانێ ئێخستیە ل سەر ٧٩ جھێن شینواری ل سنوورێن ھەر ئێک ژ قەزا (ئاکرێ و ئامێدیێ و زاخۆ) یێن سەر ب پارێزگەھا دھۆکێ ڤە کو مێژوویا ھندەک ژ وان شینواران بۆ سەردەمێن بەری زاینی ڤەدگەڕیت و گۆت: “ئەڤ جھێن شینواری یێن کو نوکە مەترسیا ژناڤچوون و تێکدانێ ل سەر ھەی د جوراوجورن و ژ خواندنگەە و مەزارگەە و گۆرستان و مزگەفت و کەلھا و ھتد… پێک دھێن، بەلێ مە ھەمی لایەنێن پەیوەندیدار ب نڤیسارێن فەرمی ل دۆر ڤێ مەترسیێ ئاگەھدارکرینە و مە داخواز کریە کو پێدڤیە پێنگاڤێن بلەز بھێنە ھاڤێتن بۆ وێ چەندێ ئەڤ جھێن شینواری بھێنە پاراستن، ژ بەر کو ھەر جھەکێ شینواری یێ بھێتە ژناڤبرن یان تێکدان ب ھیچ رەنگەکی ناھێتە زڤراندن ڤە”.
ناڤھاتی ئاماژە دا وێ چەندێ کو ژ بەر ھەمان ئەگەر ھندەک ژ جھێن شینواری ل پارێزگەھا دھۆکێ ھاتینە خرابکرن و تێکدان وەکی شکەفتا (بارۆخێ) و شکەفتا (قومریێ) ژی ل ھەیاما بۆری ھاتبوو بۆمبەبارانکرن، بەلێ ژ بەر مەترسیا شەرێ دناڤبەرا چەکدارێن پەکەکێ و سوپایێ تورکیا دا ئەو نەشیاینە ھەتا نوکە سەرەدانا وان دەڤەران بکەن بۆ وێ چەندێ زیانێن دروستێن گەھشتینە وان جھێن شینواری بزانن و گۆت: “نوکە ھزار و ٤٠٠ جھێن شینواری یێن تۆمارکری ل پارێزگەھا دھۆکێ ھەنە و نوکە ئەم کار ل سەر ژمارەکا دی یا شینواران دکەین بۆ وێ چەندێ ئەو ژی ل پاشەرۆژێ بھێنە تۆمارکرن”.
Comments are closed, but trackbacks and pingbacks are open.