دوهی رۆژا چارشەمبی 12ی چریا ئێكێ دەستەیا دەستپاكییا عیراقێ هەژمارەكا دۆسەیێن گەندەلییێ ل هەرسێ پارێزگەهێن سەلاحەدین، بەسرا و دیالە ئاشكەراكرن كو تێدا نێزیكی 20 ملیار دیناران هاتینە دزین یان ب هەدەردان.
دەستەیا دەستپاكییێ ئاشكەراكرییە، سەرۆكێ پێشتر یێ جڤاتا پارێزگەها سەلاحەدین زێدەتری هەشت ملیار دینارێن پاداشتێن فەرمانبەرێن خوە دزینە، ل پارێزگەها بەسرا د چەند دۆسەیەكێن گەندەلییێ دا هەشت ملیار دینارێن دی هاتینە ب هەدەردان و ل پارێزگەها دیالە ژی سەرۆكێ پێشتر یێ ئێك ژ دیوانێن وەقفا وێ پارێزگەهێ نێزیكی دوو ملیار دینارێن ئاواران برینە.
ئەو دۆسەیە د تایبەتن ب برنا پارەیێ ئاوارە و فەرمانبەران و زیانگەهاندنێ ب مۆلك و مالێ گشتی ژلایێ هەژمارەكا بەرپرسان ڤە، بریار هاتییەدان سەرۆكێ پێشتر یێ جڤاتا پارێزگەها سەلاحەدین بانگهێشتی دادگەها ڤەكۆلینان یا رەسافە بهێتەكرن ب تۆمەتا زیانگەهاندنا ب مەبەست ب پارێ وی جهێ وی لێ كار دكر. ل فەرمانگەها ژینگەهێ یا بەسرا ژی سێ ئامیرە ب بهایێ پێنج ملیار و 75 ملیۆن دیناران هاتینە كرین و نەهاتینە بكارئینان، و زێدەتری دوو ملیار دیناران ژی ل درۆستكرنا قوتابخانەیەكێ هاتینە ب هەدەردان. هەروەسا فەرمانا بانگهێشتكرنێ بۆ سەرۆكێ پێشتر یێ ئێك ژ دیوانێن وەقفا دیالە بۆ دادگەهێ هاتییە دەركرن ب تۆمەتا دزینا زێدەتری ئێك ملیار دینارێن پارێن ئاوارەیێن دیالە.
Comments are closed, but trackbacks and pingbacks are open.