غیاس خالد زێباری
ئەڤرۆ لدەمێ ئاهەنگا دەرچوونا ئەفسەرێن پێشمەرگەهی ل خۆلا ٢٧ یا کولیجا لەشکری ل زاخۆ رێزدر نێچیرڤان بارزانی سەرۆکێ هەرێما کوردستانێ و فەرماندێ گشتی یێ هێزێن پێشمەرگەهی ، گۆتارەکا زۆرا گرنگ و هەمە لایەنی ئاراستەکر ، لسەر چەندین مژار و بابەتێن رۆژەڤا کوردستانێ وئیراقێ، یێن سیاسی و کارگێری و یاسایی و ئێمناهی و لەشکری راوەستا و دیتن و بەرنامێ خۆ بەرامبەر راگەهاند .
ئەگەر لسەر هەمی مژار و بابەتا ڕاوەستین و شرۆڤە بکەین ، دێ ل چیرۆکا رۆستەمی درێژتر بیت .
ئەوا من زێدەر گرنگ و پێتڤی د دڤێ گۆتارا جەنابێ سەرۆکێ هەرێما کوردستانێ دا دیتی ، بابەتێ مایتێکرنا حزبا د کارۆبرێن پێشمەرگەهی و گرنگیا ئێکرێزیا پارتیێن کوردستانێ بۆ ، دەربارەی مژارا ئێکێ جەنابێ وی ب راکشاوی و زەڵالی چەندین جارا گۆت پێتڤی حزبێن کوردستانێ دەستا ل مایتێکرنا پێشمەرگەی بەردەن و ئەڤ میتێکرنا وان مەترسیەکا جددی یە لسەر کوردستانێ، بتایبەت پارتی و ئێکەتی ، بەراهیێ پەیام ئاراستەی پارتیا خۆ کر پاشان ئێکەتیێ ، ئەڤ مژارا سەرۆکێ هەرێمێ و فەرماندێ گشتی یێ هێزێن پێشمەرگەهی ، دەربڕینێ ل رژدیا جەنابێ وی دکەت بۆ نشتیمانیکرنا هێزێن پێشمەرگەهی و رزگارکرنا وان دبن ئەجندایێن هزرێن حزبایەتی و کۆمکرنا وان دناڤ وەزارەتا پێشمەرگەی وەکی سازیەکا تایبەت کۆ ئەرکێ وان بەڕەڤانی و پاراستنا کوردستانێ و قەوارێ هەرێما کوردستانێ و دابینکرنا ئێمناهیێ و سەقامگیریێ بیت .
ئەڤە ژی هیڤی و داخازا خەلکێ کوردستانێ یە و هەتا نهۆ بەشەکێ نڤیسکار و رەوشەنبیرێن کوردستانێ و وەڵاتێن دۆستێن کوردا لسەر مایتێکرنا حزبا د کار و بارێن پێشمەرگەهی دا جهێ ڕەخنەگرتێ بوویە .
مژارا نە تفاقی و دووبەرەکیا هێز و ئالیێن سیاسی یێن کوردستانێ دیسان ب تایبەتێ دناڤبەرا پارتی دیموکراتی کوردستان و ئێکەتیا نشتیمانی ، سنوور بەزادن و زێدە درێژ بوو ، ئەڤێ ژی خەلکێ کوردستانێ بێزار و بێ ئۆمێد کریە و لسەر ئاستێ ئیراقێ و جیهانێ ژی زیااێن مەزن گەهاندینە قەوارێ هەرێما کوردسانێ و بزاڤا رزگاریخوازیا کوردستانی ب گشتی ، ئەگەر سەردەمێ ئێکرێزیا حزبێن کوردستانی دگەل پەرتەوازەیا ئەڤرۆ بەراور بکەین دێ دیار ببیت کۆ رۆل و پێگەهێ کوردا دناڤ ئیراقێ دا چەن لاواز بوویە و مەترسیێن ئێمناهیێ و هێرشکرنێ لسەر درۆست کریە ، هەر وەکی ئەم دبینین بەردەوام کوردستان دبیتە ئارمانجا مۆشەک و بۆمبێن دوژمنا ، دیارە گاڤ و هەوڵێن ئێکرێزیا هێز و ئالیێن سیاسی یێن کوردستانێ ئێکە ژ پرۆژە و پلان و بەرنامێ رێزدار نێچیرڤان بارزانی وەکی سەرۆکێ هەرێما کوردستانێ ، راستە ئەڤ هەوڵ و گاڤێن بەرێز سەرۆکێ هەرێمێ د گرنگ و پێتڤی نە ، لێ بۆ نێچیرڤان بارزانی نەیا سەیر و حیبەتی یە، چونکی هندی مە دیتی و زانی بەرێز نێچیرڤان بارزانی خودان ئەڤ گاڤ و هەڵویستێن نشتیمانی و نەتەوی بوویە و هەردەم فاکتەرێ تفاق و ئێکرێزیێ بوویە و لسەر ئاستێ کوردستانێ و ئیراقێ و جیهانێ ب ئەندازیارێ ئاشتیێ و ئاشتەوایی یێ و خودان کەسایەتیەکێ کاریزمایی بۆ ئێکلاکرنا پرس و ئاریشێن مەزن ب دیاڵۆگ و دبلوسی .
دیارە بەرێز نێچیرڤان بارزانی چ وەک سەرۆکێ هەرێما کوردستانێ یان وەکی فەرماندێ گشتی یێ هێزێن پێشمەرگەهی ب ئەرکێ خۆ یێ بەرپرسیاریا نشتیمانی و ئەخلاقی رادبیت بۆ چارەسەرکرنا ڤان پرس و ناکۆکیێن مەترسیێ لسەر خەلکێ وی و وەڵاتێ وی و قەوارێ هەرێما کوردستانێ دروست کری و وەکی جێگرێ سەرۆکێ پارتی دیموکراتی کوردستان ژی دیار دبیت کۆ ئەڤە ئێکە ژ سیاسەت و بەرنامە و ستراتیژیەتا پارتیا وی بۆ بەرژەوەندێن گشتی یێن کوردستانێ و کوردستانیا ، هیڤی یا خەلکێ کوردستانێ ئەوە هەمی پارتیێن کوردستانێ بەری هەمیا پارتی دیموکراتی کوردستان و ئێکەتیا نشتیمانیا کوردستانێ ، پشتگیریا گاڤ و دەستپێشخەری و بەرنامێ سەرۆک نێچیرڤان بکەن بۆ درۆستکرنا ئێکرێزیەکا نشتیمانی و نەهێلانا مایتێکرنێن حزبی د کار و بارێن پێشمەرگەهی دا ، چونکی خەلکێ کوردستانێ بێزار کریە و زێدەتر نەشێت هەدارێ بکێشتیت و دوست و پشتەڤانێن دۆزا کوردی ژی دێ زێدەتر رژد بن بۆ پشتەڤانیا بەردەوام و ئامادەکاریێن باشتر ژی ب ئێکرێزیێ دێ هێنە کرن بۆ خۆگونجاندنێ لگەل گۆڕانکاریێن داهاتی چ لسەر ئاستێ کوردستانێ و ئیراقێ یان ژی لسەر ئاستێ دەڤەرێ ب گشتی .
خودێ نەکەت بەرۆڤاژی ژی چ گونەهــ لسەر جەنابێ سەرۆکێ هەرێمێ رێزدار نێچیرڤان بارزانی نامینین و تاوان دێ کەڤیسەر سەر ملێن وان حزبا . ( وما علی الرسول الا البلاغ المبین)
Comments are closed, but trackbacks and pingbacks are open.