دێژین سەلیم ، هیڤیا من ئه‌وه كه‌ڤالێن خوه ببه‌مه ژ ده‌رڤه‌ی و نیشا خه‌لكێ بیانی بدەم
- زێ بادینان ، هـــەمەرەنگ:
شێوه‌كارا گه‌نج (دێژین سه‌لیم عه‌بدولعه‌زیز) د دیداره‌كێ دا بۆ رۆژناما ئه‌ڤرۆ گۆت: حه‌زكرنا من بۆ هونه‌ری، ب تایبه‌ت كارێ شێوه‌كاری و چێكرنا كه‌ڤالان بۆ به‌ری چه‌ندین سالان دزڤریت، ئه‌ڤ چه‌نده وه‌ك به‌هره‌یه‌كه ل ده‌ف من چنكو من زانكۆیا ب دووماهی ئینای و خواندنا من یا دووره ژ هونه‌ری، به‌لێ حه‌ز ژێ دكه‌م و ل دووف شیانێن خوه كاردكه‌م، بۆ زانین د ئه‌ڤ ساله‌دا من پشكداری د سێ پێشانگه‌هێن هه‌ڤپشك دا كریه و ل 2018 من پشكداریه‌ك هه‌بوو، نوكه نێزیكی بیست كه‌ڤالان من هه‌نه و به‌ری نوكه من چه‌ند كه‌ڤالێن خوه فرۆتینه، هه‌روه‌سا ل دووف داخوازیان ژی من وێنێن چه‌ندین كه‌سایه‌تیان وه‌ك پۆرترێت چێكرینه، و هنده‌ك ژوان ب دیاری پێشكێشكرینه.
دێژینێ گۆت: ل ده‌مێ چێكرنا كه‌ڤالان ئه‌ز هه‌ستێن خوه هه‌روه‌سا جوانیا سروشتی و جوانیا ناخێ مرۆڤی و شیانێن كچان وێنه دكه‌م، و بزاڤێ دكه‌م د هه‌ر كه‌ڤاله‌كی دا كومه‌كا ره‌نگان بكاربینم و جهێ خۆشحالیێ كو نوكه وه‌كو به‌رێ نه‌مایه و ئێدی كڕینا كه‌ڤالێن خۆمالی ژلایێ خه‌لكه‌كی ڤه ده‌ستپێكریه، بۆ زانین ده‌مێ ئه‌ز یا خه‌مگین بم یان یا كه‌یفخۆش بم ئه‌و ده‌م بۆ من بۆ چێكرنا كه‌ڤالان یێ گونجایه و هیڤیا من ئه‌وه ل چه‌ند سالێن بهێن بشێم كه‌ڤالێن خوه ببه‌مه ژ ده‌رڤه‌ی و نیشا خه‌لكێ بیانی بدەم
Comments are closed, but trackbacks and pingbacks are open.