(نورهان عەلی)
کارەساتا بسەر دەڤەرا شنگالێ دە هاتی ژ لایێ رێکخراوا تیرورستیا داعش ل 2014 بو ئەگەرێ رەڤین و دەرچونا خەلکێ دەڤەرا شنگالێ بۆ دەڤەرێن دەوروبەر. ژ وان یێن بەرێ خۆ داین چیای یان بەرێ خۆ داین باژێرێن کوردستانێ و رێژەیەک ژ وان هەر ئێکسەر کۆچکرن و چونە وەلاتێن ئەوروپی ب قاچاغی و ل جیهانێ بەلاڤبون، لدەمێ کارەساتێ ژمارەکا زۆر ژ خەلکێ دەڤەرێ هاتە کوشتن و گرتن، یێن قورتال بوین ژ دەستێن تیرورستێن داعش و ل 2014 شیاین خۆ بگەهیننە دەڤەرێن پاراستی و هێمن ل باژێرکێن کوردستانێ دا ل ژێر چادران نیشتەجێ دبن، ژمارەکا کەمپان بۆ هاتیە ئامادەکرن و ئەڤە 9 سال بۆرین بسەر مانا وان لکەمپان دا، هەر چەندە پشتی کارەساتێ ب ٤ هەیڤان دەڤەر هاتە رزگارکرن ژ تیرورستان، لێ بەلێ هەر خەلکێ دەڤەرێ باوەری نەبوو و هەست ب ئارامیا دەڤەرێ نەدکرن.
ئەڤە ژ لایەکی، و ژ لایەکێ دی دەڤەر بتەمامی هاتیە هەرفاندن و خەلکێ دەڤەرێ شیانێن ئاڤەدانیێ نینن.
“تا نوکە ژمارەکا کێم یا وەلاتان دانپێدان ب جینوسایدا ئێزدیان کریە”.
کارەساتا شنگالێ هەمی مەرجێن جینوسایدبونێ تێدانە لێ بمخابنی ڤە تا نوکە ژمارەکا کێم یا وەلاتان دانپێدان ب جینوسایدا ئێزدیان کریە. هەگەر دانپێدان ب جینوسایدێ هاتە کرن دێ هەمی ئەو کەسێن دەست دگەل ڤێ کارەساتێ هەین ژ لایێ دادگەهێن نیڤدەولەتی ڤە هێنە سزادان ، هەروەسان دێ خەلکێ دەڤەرێ هێتە قەرەبۆکرن و زڤرن دەڤەرێن خۆ و هاریکاریا وان هێتە کرن ژ بۆ دوبارە ئاڤەدانیێ و ژیانکرنێ، هەروەسان دێ پتر کار لسەر گرتیێن دەستێ داعش هێتە کرن ژبەر کو هێشتا ژمارەیەک ژ گرتیان بێ سەروشوێنن، هەردیسان دێ خودانێن قوربانیێن کارەساتێ هێنە قەرەبۆکرن.
9 سال نە دەمەکێ کورتە بەلکو عەمرەکە و پێتڤی بوو نوکە گۆرانکاریێن مەزن هاتبان رویدان.
خەلکێ دەڤەرێ زڤریبا سەر مال و حالێن خۆ، حکومەتێ و لایەنێن بەرپرسیار خۆ لێ کربا خودان.
لێ بمخابنی ڤە نە مالە و نە حالە لبن چادران دا لبەر سەرما زڤستانێ و گەرما هاڤینێ، هزرا هەمیان کۆچکرن و دەرکەفتنە ژ وەلاتی گەلەک بێ هیڤی بوینە، پتریا وان ئێشێن دەرونی لێ پەیدا بوینە درەوشەکا گەلەک خراب دانە، هیڤیە جهێن بەرپرسیار خۆ ل دەڤەرێ و خەلکێ دەڤەرێ بکەن خودان دا دوبارە دەست ب ژیانکرنێ بکەن.
Comments are closed, but trackbacks and pingbacks are open.