رۆژنامەڤانی و ھەژموونا حزبێ

رۆژنامەڤانی و ھەژموونا حزبێ

زەنون سلێڤانەی ـ زاخو
پارێزگەها دهوکێ ب ناڤەندا سەرەکیییا دەڤەرا بادینان دھێتە ناسكرن، چەندین كەنال و دەزگەھێن راگەھاندنێ لێ ھەنە و ھەر دەزگەھەكی ژڤان چەندین نڤیسەر و رۆژنامەڤان تێدا كار دكەن، بەلێ نائێتە ڤەشارتن ژی، كو بزاڤا رۆژنامەگەریێ ل سەر ئاستێ دەڤەرا بادینان، چ هیمایێ ئازادیێ پێڤە دیار نینە، ئەڤە ژی بۆ چەند خالان ڤەدگەریت.

سەروویا وان ژی، باندورا حزبایەتی ل سەر زالە و ئەڤە ژی ب رەنگەكێ زیق د پرانییا ڤان كەنال و دەزگەھان دا دیار دبیت، ھەر كەسێ بڤێت ھەلسەنگاندنەكێ بۆ بكەت. دەما دەزگەھـ و كەنال د ئازاد نەبن، رێ ل بلاڤكرنا بوچوونا ھەڤدژ ژی ناھێتە دان و ژ ڤی ئەگەری، گەلەك ئازادیێن دی بن پێ دبن، ژوان ئازادییا رادەربرینێ و ئازادییا خرڤە بوون و خوە پشاندانان.

رۆژنامەڤانی ژی وەك پێدڤی نەشێت دیڤچوونێ بۆ گەلەك دیاردەیان بكەت

دەما بەروبیاڤێ ئازادییا روژنامەڤانی لبن ھەر بەھانەیەكێ بەر تەنگ دبیت، ھەژموونا حزبی زێدە دبیت، دەستھەلاتا عەشایری زێدە دبیت و ژ ھەمیێ ژی گرنگتر، رولێ یاسایێ كێم دبیت و لجھێ وێ حزب و عەشیرەت جھێ خوە دگرن. ژبەركو زێدەگاڤی، گەندەلی، كەمتەرخەمی و نە دادی…. پەیدا دبن، رۆژنامەڤانی ژی وەك پێدڤی نەشێت دیڤچوونێ بۆ گەلەك دیاردەیان بكەت و رەنگە گەلەك روودان و بویەر ژی بھێنە ڤەشارتن و نخافتن و برێكین حزبی یان عەشایری و دووری یاسایێ بھێنە چارەسەركرن.