زانیارێن نوێ لسەر مووچەیێ پلە بلندان بزانە

زێ بادینان .

دگەل بەلاڤکرنا مووچەیێ ڤێ جارێ ئێدی دێ یاسایا چاکسازیێ لسەر هەمی پلەبلندێن خانەنشینکری و د کاری دا هێتە بجهئینان کو 3 ملیار دینار و 500 ملیۆن دینار دێ بۆ ڤەگەرنە خەزینەیا حکومەتێ.

ژێدەرەکێ تایبەت ژ وەزارەتا دارایی بۆ گاڤ نیوز دیارکر؛ سەرجەمێ مووچه‌يێ پله‌بلندان ئه‌وێن خانه‌نشين نێزيكى 6 مليار و 500 مليۆن ديناره‌ و ب بجهئينانا قانوونا ژماره‌ 2 يا سالا 2020 يا چاكسازيێ دێ ژ مووچه‌يێ خانه‌نشينیا پله‌يێن بلند زێده‌تر‌ ژ 3 مليار و 500 مليۆن ديناران ڤه‌گه‌ڕنه‌ خه‌زينه‌يا گشتى و گۆت: سه‌رجه‌مێ گشتى يێ مووچه‌يێ پله‌بلندان، ئه‌وێن د وه‌زيفێ دا و ئه‌وێن ب پله‌يێن بلند هاتينه‌ خانه‌نشين كرن 11 مليار دينارن وسه‌رجه‌مێ مووچه‌يێ مووچه‌خۆران ل هه‌رێما كوردستانێ د گه‌هيته‌ 895 مليار ديناران، ئانکۆ مووچه‌يێ پله‌يێن بلند ئه‌وێن د وه‌زيفێ دا و ئه‌وێن خانه‌نشينكرى بتنێ 1.2% يا سه‌رجه‌مێ گشتى يێ مووچه‌يێن گشتى يه‌”.

ژێدەرێ گاڤ دیارکر؛ بڕیارە دگەل بەلاڤکرنا مووچەیێ ڤێ جارێ بڕیار بچیتە د وارێ بجهئینانێ دا.

ده‌رباره‌يى مووچه‌يێن پله‌ بلند، پەڕلەمانتارەکی بۆ گاڤ نیوز دا دیارکرن؛ نه‌حه‌قيه‌ك ل سه‌ر ئه‌ندام په‌ڕله‌مانان هه‌يه‌ و سه‌رۆكاتيا په‌ڕله‌مانى ژى ل سه‌ر وێ نه‌حه‌قيێ بێ ده‌نگه‌ و وه‌ك پێدڤى رۆنكرنێ ناده‌ن و د پرسیت: بۆچی د میدیایێ دا ده‌ما به‌حسێ مووچه‌يێ پله‌ بلندان دكه‌ن، بتنێ ناڤێ په‌ڕله‌مانتاران دئينن؟!

د مادده‌يێ 7 ژ قانوونا چاكسازيێ بڕكا ئێكێ: ب رۆنى به‌حس ل پله‌بلندان دکەن ئه‌و ژى 18 جۆرێن پله‌ بلنديێ د ناڤا سازيێن قانوونى و ده‌ستوورى يێن هه‌رێمێ دا هه‌نه‌.

ل گۆرەی یاسای چاکسازیێ هەر کەسەک ب پلەیا بلند هاتبیتە خانەنشینکرن و ژێی وی نەگەهشتبیتە 45 سالان و 15 سالان ژی خزمەت نەبن، دێ تنێ 20٪ ژ مووچەیێ خۆیێ درست وەرگریت کو یێ پەڕلەمانتاران دبیتە 1.800.000 دینار.

ژێدەرێ وەزارەتا دارایی بۆ گاڤ نیوز دا زانین؛ ئەڤ یاسایە دێ لسەر هەر چوار خولێن پەرلەمانی و هەر 8 کابینەیێن حکومەتێ هێتە بجهئینان.