ساسان عەونی: ب بڕیارا سەرۆكێ حكومەتێ ساڵانە كوژمێ 900 ملیۆن دیناران بۆ شوونواران دهێنه ته‌رخانكرن
ل هەولێرێ كۆنفرانسێ زانستیێ پاراستن و گه‌شه‌پێدانا شوونواران و كەلەپوورى هاته ئه‌نجام دان، وەزیرێ باژێرڤانیێ ژى ئاماژە دا کو سەرەڕای قەیرانا دارایی ب بڕیارا سەرۆكێ حكومەتێ ساڵانە ب كۆژمێ 900 ملیۆن دیناران بۆ شوونواران هاتنه ته‌رخانكرن. وەزارەتا باژێرڤانیێ د راگه‌هاندنه‌كێ دا كو هژمارا فه‌رمییا فه‌یسبووكێ دا به‌لاڤكرییه، ئەڤڕۆ دووشەمبى 29/11/2021، ل باژێرێ هەولێرێ ب سەرپەرشتییا ساسان عەونی، وەزیرێ باژێرڤانى و گەشتوگوزارێ دووەمین كۆنفرانسێ زانستیێ شوونوار و كەلەپوورى ل ژێر ناڤێ (پاراستن و گه‌شه‌پێدانا شوونوار و كەلەپوورى ل هەرێما كوردستانێ هاته ئه‌نجام دان). ساسان عەونی، د كۆنفرانسى دا گۆتاره‌ك پێشكێشكر و د پشكه‌كا ئاخفتنێن خوه دا جەخت كر، كو شوونوار و كەلەپوور د ئەجێندایا حكومەتا هەرێما كوردستانێدا پێگەهه‌كا تایبەت هەیە، وەك ناسنامەیا نیشتیمانی و وەك مێژوو ورابردوویێ مه ب كووراتییا هزاران سالان ڕەگوڕیشەێن خوه ل سەر خاكا خوه هەیە. هەروەسا ئاماژەكر، كو هەر ژ ڤى لایى ڤه حكومەتا هەرێمێ و سەرۆكێ حكومەتێ ب گرنگی ڤه ل وى ڕۆل و ئەركى دنێرن كو شوونوار هه‌نه، له‌ورا و د سه‌ر قەیرانێن دارایی ژى را ب بڕیارا سەرۆكێ حكومەتێ ساڵانە ب كۆژمێ 900 ملیۆن دیناران بۆ ئەوى سێكتەرى هاتنه تەرخانكرن و كۆنفرانسێ داهاتیێ وەزارەتا باژێرڤانى و گەشتوگوزارێ بڕیار دا كو ب ڕێژا 1%ی داهاتێ باژێرڤانییان بۆ شوونوار و كەلەپوورى بهێته خەرجكرن.
Comments are closed, but trackbacks and pingbacks are open.