((سلاح ذوو حدین ))

شەریف ئامێدی

ناڤ و نیشانێت سەرهاتیەکا منن دگەل ماموستا و زانایێ ئاینی یێ مەزن و بلیمەت سەیدایێ (مەلا مصطفی رێکانی) رەحما خودێ لێبیت و گیانێ وی یێ پیروز لفیردەوسێ شادبیت دگەل ئەولیاء و ئەصحابی و چاك و صالحا ان شاء الله .
سەرهاتیا من دگەل ڤی مروڤێ خودێ نیاس و زانایێ مەزن ڤەدگەڕیت بو سالێت نوتا.
وی سەردەمی من نڤێسینگەهەك یان بێژین تومارگەهەکا ڤیدیوێ هەبو بناڤێ ( ڤیدیو سەرهلدان ) ڕەنگە بیرا گەلەك هەڤالا لێ بێت مە هەلەکەفت و شەهیان و دیلان وێنەدکرن .
جامێرەك هاتە دەف من گوتە من مە مەولیدەكا هەی هەکە تە بو مە وێنەکربا ئانکو ڕومالا ڕێ و رەسمێت ڤێ مەولیدێ وێنەکربان دا وەکو بیرهاتن لدەف مە مابان من گوتێ بلا سەر چاڤا .

ئەز دگەل چومە مالا وان بڕاستی وی جامێری گەلەك کەس داخازکربونە مالا خو ب وێ هەلکەفتێ ژوانا گەلەك مەلا و زانا وگوتاربێژێن مزگەفتا یێن بەرنیاس لباژێرێ دهوکێ و دەور و بەرا ئێك ژوان زانایێت مەزن و جوامێر و لدەف من گەلەك پایە بلند و پڕ بوها سەیدایێ هێژا و خوشتڤی ( مەلا مصطفی ڕێکانی )بوو خودێ ژێ رازیبیت ان شاء الله چاوا خەلکێ پارێزگەها دهوکێ و هەر کەسێ سەیدا دیتی و نیاسی و گول گوتارێت وی یێت ئاینی و ئاموژگاریێت وی بوی ئێکسەر چویە ددلیدا و حەژێکری چاوا ئەف خەلکە هەمیێ ژێ ڕازیە ان شاء الله وەسا خودایێ مەزن ژی دێ یێ ژێ رازیبیت و لبحەشتا خو یا بەرین لناف مێرگێت بحەشتێ دێ دلشاد و بەختەوەرکەت .
دابزڤڕینە ف سەرهاتیا من دگەل سەیدای پشتی هەمی مێهڤانێت مەولیدێ شیڤ خاری خارنەکا بەرفرەهـ و بەرکەفتی خودانێ مەولیدێ بەرهەفکربو خودێ خیرا وی مەزنکەت و مەولیدا وی ژێ قبیلکەت .
من ژی هەمی مێهڤان و رێ ورەسمێت مەولیدێ وێنە کرن هەکو من بەرێ کامیرا خو دایە سەیدای گوتە من کا ڕاوەستە جارێ مە وێنە نەکە داخو درستکەین ئانکو خو ماقیلکەین پاشی وێنێ مە بگرە و دەستهاڤێتە دەرسوکا خو و جل و بەرگێت خو راستکرن باش دبەر خوڕا چون ئەو و هەڤالێت خو پاشی گوت ئها نوکە تو دشێی مە تەصویرکەی کەنیا من هات ئەز بشکوڕیم پشتی من وێنی وی و هەڤالێت وی گرتین دا چم کوژیەکێ دی یێ وێ هەلکەفتێ وێنەکەم گازی من کر گوتە من بوچی تو بشکوری هەکو ئەم دبەرخوڕا دچوین مە خودرستکر؟ من گوتێ سەیدا هندەك مەلا و زانایێت ئاینی دبێژن کامیرە و وێنەگرتن حەرامە و بهیچ ڕەنگەکی نا چێبیت مروڤ بێنە وێنەکرن بەلێ هەکو من بەرێ کامیڕێ دایە هەوە هوین شنی دبەرخورا چون هەوە هنداما خو درستکر ژبو کامیرێ ژبەر وێ چەندێ ئەز بشکوریم و کەنیا من هات ، سەیدای ژی بکەنیڤە و بدێمەك خوش و قەسەکا خوشتر کەرەمکر گوت کامیرا تە (سیلاح ذوو حەدەینە) ئانکو چەکەکێ دوو سەرە تو دشێی بو کارێن باش بکاربینی وەکی مەولیدا ڤی جامێری و هند کارێت دی یێت باش و باشتر و دیسا تو دشێی بو کارێت خراب ژی بکاربینی .

دوعا خازین ژخودایێ مەزن و دلوڤان سەیدایێ مەزن و پڕ قەدر و قیمەت لبحەشتا خو یا بەرین شادکەت و جهێ وی لناف مێرگێت بحەشتێ بیت ان شاء الله .

بڕاستی وەغەرا سیدایێ مەلا مصطفی خوسارەتیەکا مەزنە بو هەمی کوردستانێ بگشتی ودەڤەرا بەهدینان بتایبەتی ( انا لله وانا الیه راجعون) .

• دکاری هەموو بابەتێن خۆ ببینی …