سه‌رۆكێ هه‌رێما كوردستانێ په‌يامه‌ك ل دۆر ره‌وشا سياسى يا ئيراقێ به‌لاڤكر و تێدا هێز و لايه‌نێن په‌يوه‌نديدار يێن ئيراقى گازيكرن دا كو ل هه‌ولێرێ كۆمببن و ده‌ست ب دانوستاندنه‌كا رژد بۆ ده‌ربازكرنا ره‌وشا نوكه يا وه‌لاتى بكه‌ن.
د په‌یاما سه‌رۆك نێچيرڤان بارزانى دا هاتيه؛ ب دلگرانیه‌كا كوير ل پێشهاتێن سياسى و ئه‌منى يێن ئه‌ڤرۆ يێن به‌غدا و هنده‌ك جهێن دى دنێرين، داخوازێ ژ هه‌مى لايه‌نان دكه‌ين ل سه‌ر خۆ بن و رێ نه‌ده‌ن ره‌وش ژ بن كونترۆلێ بده‌ركه‌ڤيت.
تێدا هاتيه ژى؛ خۆنيشاندانێن ئاشتيانه مافه‌كێ ده‌ستوورى يێ پاراستى يه، لێ ئالۆزى و راگرتنا سازییێن ده‌وله‌تێ چ كێشه‌يان چاره‌سه‌ر ناكه‌ن و ره‌وشێ دێ ئالۆزتر لێكه‌ن، له‌وا پێدڤيه شكۆيا سازییێن ده‌وله‌تێ پاراستى بیت.
سه‌رۆكێ هه‌رێمێ ديار ژى كر؛ پێدڤيه هێزێن ئه‌منى ب ئاگه‌هى و هوشيارى سه‌ره‌ده‌ريێ ل گه‌ل ره‌وشێ بكه‌ن و رێكێ نه‌ده‌ن خۆنيشاندان و رويدان ببنه ئه‌گه‌رێ تێكچوونا پتر يا ره‌وشا ئه‌منى و كه‌فتنا قۆربانيان دناڤ ئيراقيان دا.
خۆيا ژى كر؛ ڤه‌گه‌ڕيان بۆ لوژيكى و ده‌ستپێكرنا دانوستاندنه‌كا نيشتيمانى و به‌رپرسيارانه، پێدڤى ب هه‌ميان هه‌يه دا كو ئيراق ژ ڤێ ره‌وشا سه‌خت رزگار ببيت.
د به‌يانێ دا هاتيه ژى؛ هه‌رێما كوردستانێ وه‌ك هه‌رده‌م دێ ژ بۆ چاره‌سه‌ريێ و لێكتێگه‌هشتنا لايه‌نێن ئيراقى هاريكار بيت، له‌وا دوباره هێز و لايه‌نێن په‌يوه‌نديدار يێن ئيراقى گازى دكه‌ين دا كو ل هه‌ولێرێ كۆمببن و ده‌ست ب دانوستاندنه‌كا رژد بۆ ده‌ربازكرنا ڤێ ره‌وشێ بكه‌ن.
Comments are closed, but trackbacks and pingbacks are open.