سەرۆك مەسعود بارزانی ب هه‌لكه‌فتا 70سالیا دامه‌زراندنا ئێكه‌تییا ئافره‌تێن كوردستانێ په‌یامه‌ك راگه‌هاند، و تێدا دوپاتكر كو ئێكه‌تییا ئافره‌تێن كوردستانێ ئێكه ژ ده‌سكه‌فتێن هه‌ره گرنگێن شۆره‌شا ئه‌یلولێ.
ئه‌ڤرۆ سه‌رۆك بارزانى ب هه‌لكه‌فتا 70 سالیا دامه‌زراندنا ئێكه‌تییا ئافره‌تان په‌یامه‌ك به‌لاڤكر و پیرۆزباهی ل سكرتێر و ئه‌ندامێن مه‌كته‌با سكرتایه‌تیا ئێكه‌تیا ئافره‌تێن كوردستانێ و سه‌رجه‌م ئافره‌تێن كوردستانێ كر.
سه‌رۆك بارزانى ئاماژه ب هندێ ژى كر، ئێكه‌تییا ئافره‌تێن كوردستانێ ئێكه ژ ده‌ستكه‌فتێن هه‌ره گرنگێن شۆره‌شا مه‌زنا ئه‌یلولێ و ئامرازه‌كێ گرنگ و كاریگه‌ره بۆ پێگه‌هاندن و هشیاركرنا ئافره‌تێن كوردستانێ و به‌رفره‌هكرنا پشكدارییا وان د ژیانا سیاسى و خه‌باتا گه‌لێ كوردستانێدا، ودوپاتكریه د ڤێ رێكێدا ئێكه‌تییا ئافره‌تان ماندیبوون و قوربانییێن زۆر ژى داینه.
سه‌رۆك بارزانى ئاماژه ب وێ چه‌ندێ ژى كر، د ڤێ قوناغێدا ئه‌ركێ ئافره‌تان ژ لایێ نیشتیمانى و پێگه‌هاندنا ئافره‌تان و به‌ره‌ڤانیكرن ژ مافێن مه‌ده‌نى و سیاسى یێن ئافره‌تا زۆر یێ گرنگه، و هیڤیخواست كو د داهاتیدا به‌رده‌وامبن لسه‌ر رۆلێ خۆ یێ كاریگه‌ر و پێشه‌نگ ژ بۆ پێشڤه‌برنا دۆزا ره‌وایا گه‌لێ كورد و به‌ره‌ڤانیكرن ژ ماف و داخوازییێن ئافره‌تان، و داخوازا سه‌ركه‌فتنێ بۆ خواست.
Comments are closed, but trackbacks and pingbacks are open.